1 Tawarika 23 - Wunta Mempori

Pontiaa anggaa a nto Lewi

¹ Mansano mota'uomo i Daudi ka tende ntumuwu, ipotoroo i Salomo, ana ntamano gagi mokole a nto Isaraeli.

² Ipumpu ira luwu anu langkai potorodo i Isaraeli, luwuno mbo'u sando mpesomba ka to Lewi.

³ Ka i'amba dumoa ira to Lewi anu metinuwu tolu pulu nta'u ka torea. Ondae medinoa nte'o'asa, porokono tolu pulu ka oalu nsowu tama.

⁴ ”Inso i olodo, rua pulu ka opaa nsowu mia asalakono medagaio anggaa a raha-Do i Ue; nomo nsowu mia asalakono gagi puu mpo'atora ka puu mpobitara;

⁵ pato nsowu mia gagi puu mpodagai pewowa langkai; ka pato nsowu mia anggaado umunde-unde Ira i Ue mompake parewa pontonda penani anu kuweweuomo.” Ipotae i Daudi.

⁶ I Daudi mbo'u tumia-tia ira a bawaa montonda luwuno anano i Lewi: i Geresoni, i Kehati ka i Merari.

⁷ Tewinso inuleno i Geresoni, onaemo i Ladani ka i Simei.

⁸ Luwuno anano i Ladani, onaemo i Yehieli, petewawano, saru i Setami ka i Yo'eli; porokono otolu mia.

⁹ Luwuno anano i Simei, onaemo i Selomiti, i Hasieli ka i Harani; porokono otolu mia. Luwuno mia andio anu gagi petewawa a mpepe'etuano i Ladani.

¹⁰ Luwuno anano i Simei, onaemo i Yahati, i Sisa, i Yeu ka i Beria. Onaemo atuu luwuno anano i Simei; porokono opaa mia.

¹¹ I Yahati, onaemo petewawa ka i Sisa, mia ko'orua, sine i Yeu ka i beria nahi dope'ana hadio, onaemo ka dogagi asa mpepe'etua saru asa po'anggaa.

¹² Luwuno anano i Kehati, onaemo i Amarami, i Yisihari, i Heberoni ka i Usieli; porokono opaa mia.

¹³ Luwuno anano i Amarami, onaemo i Haruni ka i Musa. I Haruni pinakosi saru inuleno hawe nahina tampulaano ka dompopokomempori parewa anu tedoa mempori, ka dompotunu pesomba i aro-Do i Ue, ka dompekakaako Ira ka mompowee ronso a nee-Do hawe nahina tampulaano.

¹⁴ Luwuno anano i Musa, tetenaa-Do Ue Ala atuu, wininso a laro nsuku Lewi.

¹⁵ Luwuno anano i Musa, onaemo i Geresomi ka i Elieseri.

¹⁶ Anano i Geresomi, onaemo i Sebueli, asa mia petewawa.

¹⁷ Anano i Elieseri, onaemo i Rehabia, asa mia petewawa. I Elieseri nahina anano anu susua, sine luwuno anano i Rehabia mehadio ira ntu'u.

¹⁸ Anano i Yisihari, onaemo i Selomiti, asa mia petewawa.

¹⁹ Luwuno anano i Heberoni, onaemo i Yeria, asa mia petewawa, i Amaria, ana ko'orua, i Yahasieli, ana ko'otolu ka i Yekameami, ana ko'opaa.

²⁰ Luwuno anano i Usieli, onaemo i Mika, asa mia petewawa ka i Yisia, ana ko'orua.

²¹ Luwuno anano i Merari, onaemo i Mahali ka i Musi. Luwuno anano i Mahali, onaemo i Eleasari ka i Kisi.

²² I Eleasari mate nahi pe'ana ntama. Onae butu me'ana beine luwu. Luwuno anano i Kisi, potehado, umala ira gagi kombiado.

²³ Luwuno anano i Musi, onaemo i Mahali, i Ederi ka i Yeremoti; porokono otolu mia.

²⁴ Onaemo atuu inuleno i Lewi montonda pepe'etuado, luwuno petewawa a mpepe'etuado, i tempono domebinuri nte'o'asa menunu saru porokono needo anu tinuwu rua pulu nta'u ka torea. Ondae anu me'anggao weweuano pesomba i raha-Do i Ue.

²⁵ Hangano mepauomo i Daudi, ”Ondae i Ue, Ue Alano i Isaraeli, moweeako iramo rodoa a bawaa-Do ka Ondae mo'ia i Yerusale ranta nahina tampulaano.

²⁶ Bakanandio, to Lewi nami ira mentandeo mbo'u Kema Mempori ka luwuno parewa anu pinake a mpesomba i tu'ai.”

²⁷ Menunu saru petenano i Daudi anu pokotompa, luwuno anano i Lewi anu mebinuri, onaemo anu tinuwuno rua pulu nta'u ka torea.

²⁸ ”Anggaado, onaemo mokowali ira anano i Haruni a mpoweweua pesomba i raha-Do i Ue, me'orusuo kintala ka luwuno bolongko ka pompokomorinaa luwuno sangka mempori ka me'anggao anggaa anu hinao penggoeno saru pesomba i raha-Do Ue Ala:

²⁹ Ondae asalakono mpo'orusu roti pesomba ka tarigu moiko ntu'u weweua pesomba kaanga, roti monipi anu nahi peragi, kaanga pesomba anu rinarami i wawono poraramia ka anu sinaloako lana, saru luwuno ponsa'u ka posongka.

³⁰ Ondae mbo'u anu mpopohawe pontarimakasi ka po'unde-unde tia-Do i Ue sompo mo'oru, kanatuu koa mbo'u sompo ngkiniwia,

³¹ ka sompo mpopesombaako luwuno pesomba tinunu ndi Ondae i Ue ia oleo Saba, wula wo'ohu ka oleo langkai, menunu saru porokono anu lano pinakosiomo i aro-Do i Ue.

³² Ondae asalakono mpekakaakono anggaado a Ngkema Tepotowoa ka po'ianga mempori, saru anggaado mpokowali ira anano i haruni, luwuno pepaekompodo a mpoweweua pesomba i raha-Do i Ue.”