1 Mokole 21 - Wunta Mempori

I Nabo pinepate hangano lere anggorono

¹ Umarino atuu gagiomo teweweu andio. I Nabo, to Yisire'eli, hinao lere anggorono i horino langkanaeno i Ahabi, mokole i Samaria.

² I Ahabi motaeakono i Nabo, ”Wee'akumo lere anggoromu atuu aku mokogagio lere inahu, hangano po'iangano umpeda rahaku. Aku moweeakomu lere anggoro anu lalu moiko gagi euno. Sine tewala upemoikoopo, aku umowahiakono doi pototono olino.”

³ Sumangki i Nabo ndi Ahabi, ”Po'ineeomo Ondae i Ue umonto aku meweengakono tia pusakado uempu'uku ndi omiu!”

⁴ Ka i'amba i Ahabi mewinso a laro langkanaeno, saru mosa'o aroano ka tekuda hangano pau anu pinauno i Nabo to Yisire'eli atuu ndi onae, ”Nahi aku weeakomiu tia pusakado uempu'uku.” Onae mepombole a mpoturiano ka ipo'opoo rupano, ka nahi behe mongkaa.

⁵ I Isebeli, kombiano, aiwa ka ipotaeakono, ”Tembio kai mosa'o aroamu ranta nahi ubehe mongkaa?”

⁶ Sumangki i Ahabi ndi onae, ”Hangano kupotaeakono i Nabo, to Yisire'eli atuu: Wee'akumo lere anggoromu aku umowahiakono doi, ke ba inehemupo aku moweeakomu lere anggoro gagi euno. Sine isangki aku, nahi aku meweeangakono lere anggoroku atuu ndi omiu.”

⁷ Motae i Isebeli, kombiano, ndi onae, ”Nde komba omiu kandio-andio anu pabawa gagi mokoledo to Isaraeli? Ipewangumo, ipongkaamo, ka temawongko aroamiu! Ongkue anu ta weeakomiu lereno anggorono i Nabo, to Yisire'eli atuu.”

⁸ Ka i'amba i Isebeli moburi wunta a neeno i Ahabi, ka itondoniakono pontondonido mokole, ka i'amba umoliwi ira wunta atuu a luwuno mia memota'u ka a luwuno mia pinemota'u anu mpi'ia mpe'asa kota saru i Nabo.

⁹ A wunta atuu iburio, kanandio, ”Imempaleleomo a mpalili ka domempuasa ka tenaomo i Nabo mentoro i arono ntu'u.

¹⁰ Impontena mbo'u orua mia lambaha mentoro umaropio, ka ondae asalakono gagi sakosii umewaio saru motae: Utotonaa Ira i Ue Ala ka ondae mokole. Umarino atuu imewawao ibungkuno ka imewunoakono watu ranta kai mate.”

¹¹ Luwuno mia pe'asa kotano, mia memota'u ka mia pinemota'u anu mempo'ia i kota atuu, meweweuo kana anu iparetaako ira i Isebeli ndi ondae, kana anu teburi a wunta anu inoliwino ndi ondae.

¹² Domempaleleomo puasa ka domentenao i Nabo mentoro i arono ntu'u i olodo palili.

¹³ Ka i'amba orua mia lambaha atuu hawe ka dopentoro tepo'aroakono i Nabo. Mia lambaha atuudo gagi sakosii umewaio i Nabo i arodo palili, dopotae, ”Itotonaa Iramo i Nabo Ondae i Ue Ala ka ondae mokole.” Umarino atuu, domewawao i bungkuno kota ka do'amba mewunoakono watu ranta kai mate.

¹⁴ Umarino atuu mpotena ira mia lumako ndi i Isebeli saru lele andio, ”I Nabo mateomo winunoako watu.”

¹⁵ Sa umarino rumongeo nine mateomo i Nabo winunoako watu, motaeomo i Isebeli ndi Ahabi, ”Ipewangumo, i'alaomo lere anggorono i Nabo, to Yisire'eli atuu, kai pe'ueo. I Nabo anu nahi behe meweengakono ndi omiu kai inowahiaku doi, nami kongko mbo'u; onae mateomo.”

¹⁶ Rumongeo nine i Nabo mateomo, mewanguomo i Ahabi ka lumako a lere anggorono i Nabo, to Yisire'eli atuu, ta umalao lere atuu me'ueo.

¹⁷ Ka haweomo pau-Do i Ue ndi Elia to Tisibe atuu, unino,

¹⁸ ”Pewangumo, lakomo tepohaweakono i Ahabi, mokoledo to Isaraeli i Samaria. Onae tekonai i lere anggorono i Nabo. Onae lumako i ra'ai umalao lere atuu ta me'ueo.

¹⁹ Pauakonomo kanandio: Kanandio pau-Do i Ue: Umari mompepate, da morontuko mbo'u? Pauakono mbo'u: Kanandio pau-Do i Ue: A mpo'iangano dahu sumile'io reano i Nabo, i tu'ai koa mbo'u ta sumileio dahu reamu.”

²⁰ Motae i Ahabi ndi Elia, ”Gagi uhawe akumo, hei iwaliku?” Sumangki, ”Lano kuhawekomo, hangano upe'ataomo karoimu moweweu anu mosa'o a pongkita-Do i Ue.

²¹ Menteeano, Aku mompotii masolaa ndi omue. Aku rumoahiko ranta pingko ka moko'upuo luwuno tama inso a somborino i Ahabi, anu hinao potorono ke nahina potorono i Isaraeli.

²² Aku weweuo somborimu mengkena kana somborino i Yerobea, anano i Nebati ka somborino i Baesa, anano i Ahia, hangano upokotesingkao tekudaku, ka hangano wineweumu, to Isaraeli mpoweweu mbo'u hala.

²³ Ondae i Ue mepau Ira mbo'u mongkona i Isebeli: I Isebeli ira mengkaano dahu i bungkuno rere Yisire'eli.

²⁴ Isemamo koa inso a somborino i Ahabi anu mate i kota ta kumaano dahu ka anu mate i tonga pada ta kumaano manu-manu i laro meene.”

²⁵ Menteeano napi hori hina ia kana i Ahabi anu me'atao koroino moweweu anu mosa'o a pongkita-Do i Ue, hangano onae ipopandeio i Isebeli, kombiano.

²⁶ Tendeano onae moweweumo tedoa mokoburu tumonda ira lahumoa, mengkena kana anu wineweudo to Amori anu umariomo Dosaari Ira i Ue inso i arodo to Isaraeli.

²⁷ Rumongeo pinau atuu, i Ahabi berio sangkano, mompokona sawu po'inombo a ngkoroino ka mepuasa. Onae moturi saru mompake sawu po'inombo ka melempa telusa.

²⁸ Ka i'amba haweomo pau-Do i Ue ndi Elia to i Tisibe atuu,

²⁹ ”Nde ukitaomo i Ahabi tedoa me'urumako i aroku? Hangano onae me'urumakoomo i aro-Ku, nahi Aku mopotii masolaa tempono da ituwu. Ambapo a temponopo anano, Aku mompotii masolaa a somborino.”