1 Mokole 15 - Wunta Mempori

I Abiama, mokole i Yehuda

¹ A nta'u kohopulu ka oalu poparentano i mokole Yerobea, anano i Nebati, i Abiama gagi mokoledo to Yehuda.

² Otolu nta'u tehineno ipoparenta i Yerusale. Neeno ineno, i Ma'aka, anano i Abisalo.

³ I Abiama tuwu a laro luwuakoano hala anu wineweuno amano se'eluno napi onae. Onae, nahi buke aroano momperorohi ndi Ondae i Ue, Ue Alano, kana i Daudi, ama mpu'uno

⁴ Sine hangano i Daudi, onaemo ka Dopoweeakono i Ue, Ue Alano inuleno i Yerusale, ka Dopotoroo anano umeuo ka saru mokorosoo Yerusale.

⁵ Hangano i Daudi moweweu anu mentee a pongkita-Do i Ue ka nahi pansia inso a luwuno anu Doparentaakono i Ue asa ntinuwuno, sangkadio mongkona i Uria, to Heti atuu.

⁶ Gagiomo peteaa asa ntinuwuno olono i Rehabea ka i Yerobea.

⁷ Anu susuano inso a nteweweuno i Abiama ka luwuno anu wineweuno, kombake luwuno atuu teburi a wunta tutuludo luwuno mokole i Yehuda? Gagiomo peteaa i olono i Abiama ka i Yerobea.

⁸ I Abiama mate ka kinaburu i kota Daudi. Ka i'amba i Asa, anano gagi mokole umeuo.

I Asa, mokole i Yehuda 15:9-24

⁹ A nta'u korua pulu poparentano i Yerobea, mokoledo to Isaraeli, i Asa gagi mokoledo to Yehuda.

¹⁰ Pato pulu ka asa nta'u tehineno ipoparenta i Yerusale. Neeno ueno beine, i Ma'aka, anano i Abisalo anu beine.

¹¹ I Asa moweweu anu mentee a pongkita-Do i Ue kana i Daudi, ama mpu'uno.

¹² Onae nami po'eheako mbo'u pebelesua i wita atuu ka lumiahakono luwuno pelahumoaa anu wineweudo uempu'uno.

¹³ Tendeano ipokompenaa-naao i Ma'aka, ueno beine inso a mpotorono ine mokole hangano ueno atuu moweweu tinaha Asera anu minokoburuako. Ipobangkuo i Asa tinaha anu minokoburuako atuu ka itunuo i lembono Kideroni.

¹⁴ Maupo luwuno pongku wita pesombaa nahi liahakono, sine buke aroano i Asa metako ndi Ondae i Ue asa ntinuwuno.

¹⁵ Iwawao i raha-Do i Ue luwuno sangka memporido amano ka luwuno sangka memporino onaeno: wulaa, salaka, ka luwuno sangka susua.

¹⁶ Gagiomo peteaa i olono i Asa ka i Baesa, mokole i Isaraeli asa ntinuwudo.

¹⁷ I Baesa, mokole i Isaraeli lumako metea umewai ira to Yehuda. Ipokorosoo kota Rama, ta tumangkoroo mia meluarako ke mewinso i wita poparentaano i Asa, mokole i Yehuda.

¹⁸ Sine i Asa umalao luwu wulaa ka salaka anu da kongko a laro ponaapa arataano raha-Do i Ue ka anu ninaa i laro ponaapa arataa a rahado mokole, ka i'amba meweengakono a ngkaedo pegawaino. Ka i'amba mokole Asa tumena ira melako ndi Benihada anano i Taberimoni anano i Hesioni, mokoledo to Arami anu mo'ia i Damasi, saru pe'oliwi,

¹⁹ ”Hinao pedandiato ka pedandiado amaku ka amamu. Kitaomo, ku'oliwio ndi omue pompowee wulaa ka salaka. Gagi si pokogagio pedandiamu saru i Baesa, mokole i Isaraeli, kai ponsuka inso ndi ongkue.”

²⁰ I Benihada rumongeo po'emano mokole. Itena ira tadulako sorodaduno sumapoio luwuno kota i Isaraeli. Ioni, Dani, Abeli-Beti-Ma'aka, ka luwuno Kineroti saru luwuno wita Napatali, inangiomo.

²¹ Rumongeo anu gagi atuu, i Baesa mena-naa mokorosoo kota Rama ka ipo'ia mpiha i Tiresa.

²² Sine i mokole Asa tumena ira luwuno to Yehuda, nahina pinesusua. Ondae asalakono mpotande watu ka keu anu pinakeno i Baesa mokorosoo kota Rama. Ka i'amba mokole Asa pakeo mokorosoo Geba-Benami ka Misipa.

²³ Anu susuano inso a luwuno teweweuno i Asa ka luwuno mosiano, luwuno anu wineweuno saru luwuno kotano anu pinokorosono, kombake luwuno atuu teburi a wunta tutuludo luwuno mokoledo to Yehuda? Sine, i tempono imota'u marasai mompemahaki a orua karuno.

²⁴ I Asa mate ka ikinaburu i horino uempu'uno i kota Daudi, ama mpu'uno. Ka i'amba i Yosapa, anano, gagi mokole umeuo.

I Nadabi, mokole i Isaraeli

²⁵ I Nadabi, anano i Yerobea, gagi mokoledo to Isaraeli, a nta'u ko'orua poparentano i Asa, mokoledo to Yehuda. Onae moparenta i Isaraeli orua nta'u tehineno.

²⁶ Onae moweweu anu mosa'o a pongkita-Do i Ue, saru tumondao sala ntumuwu ka halano amano, anu gagi pu'uno to Isaraeli mpoweweu mbo'u hala.

²⁷ I Baesa, anano i Ahia, inso a mpe'etuno i Isakari, memoroko umewaio. I Baesa mepateo i kota Gibeoni, witado to Pelisiti, tempono i Nadabi ka luwudo to Isaraeli mengkaduo Gibeoni.

²⁸ I Baesa mepateo a nta'u ko'otolu poparentaano i Asa, mokole i Yehuda. Ka i'amba gagi mokole umeuo i Nadabi.

²⁹ Mansano gagi mokole, ipepate ira luwu somborino i Yerobea. Luwuno anu hinao penaano inso a nsomborino i Yerobea, nahina maupo te'asa pino'ineeno tuwu, ranta ka ipingko luwu, menunu saru pau-Do i Ue anu pinohawe-Do molalo tetenaa-Do i Ahia to Silo atuu.

³⁰ Mongkona atuu, hangano luwuno hala anu wineweuno i Yerobea, anu gagi pu'uno to Isaraeli mpoweweu mbo'u hala. Kanandiomo ipokotesingkao tekuda-Do i Ue, Ue Alado to Isaraeli.

³¹ Anu susuaano inso a nteweweuno i Nadabi ka luwuno anu wineweuno, kombake luwuno atuu teburi a wunta sejarado luwuno mokole?

³² Gagiomo peteaa i olono i Asa ka i Baesa, mokole i Isaraeli, asa ntinuwudo.

I Baesa, mokole i Isaraeli

³³ A nta'u ko'otulu poparentaano i Asa, mokole i Yehuda, i Baesa, anano i Ahia gagi mokole a luwuno Isaraeli i Tiresa. Onae moparenta rua pulu ka opaa nta'u.

³⁴ Onae moweweu anu mosa'o a pongkita-Do i Ue, ka itondao sala ntumuwu ka halano i Yerobea anu gagi pu'uno to Isaraeli mpoweweu mbo'u hala.