1 KORINTI 8 - Wunta Mempori

Mongkona pesomba a lahumoa 8:1-13

¹ Mongkona bau pesomba a lahumoa tomento'orio, ”luwuto hinao ponto'orito.” Ponto'ori anu kanandio weweuo mia gagi mompelangka-langkai, sine pompehohawa mowangu.

² Tewala hinao asa mia anu potaeno, nine hinao aasa ”ponto'orino,” ka onae naapo koa mbo'u ihaweo ponto'ori, ba kana'umpe anu asalakono ka ihaweo.

³ Sine mia anu mehohawa Ira Ue Ala, Doto'orio Ue Ala.

⁴ Mongkona mongkaa bau pesomba a lahumoa tomento'orio, ”nahina lahumoa i wawontolino ka nahina Ue Ala susua sangkadio Ondae Ue Ala anu asa-asa-Do.”

⁵ Hangano maupo hinao hapa anu nineeako ”pinesombai susua,” moiko i suruga, maupo i tolino – ka lano mentee hadio ”pinesombai susua” ka hadio ”ue” anu kanandio –

⁶ sine ndi ontae butu koa aasa Ue Ala, onaemo Ondae i Ama, anu ndi Ondae insoano luwuakoano ka anu tia-Do tomentuwu, ka aasa koa Ue, onaemo Ondae i Yesu Kerisituu, anu hangano Ondae luwuakoano pinokogagiomo ka hangano Ondae ka tomentuwu.

⁷ Sine komba luwuno mia anu hinao ponto'ori atuu. Hinao mia, anu hangano da te'onggo mpiha a luwuno lahumoa, mongkaa bau atuu kana bau pesomba a lahumoa. Ka hangano molema aroado, aroado atuu tesosa'ariako onae.

⁸ ”Kaanga komba iwawa kita lalu umpedaako Ira Ue Ala. Nahina hapa-hapa rugito, ba nahi tompongkaa ka nahina hapa-hapa urato, ba tompongkaa.”

⁹ Sine idagaiomo, ka si maluamu andio gagi watu tetidudo mia anu molema.

¹⁰ Hangano tewala domengkita komiu mia anu hinao ”ponto'ori,” tekonai mpentoro mpongkaa a raha mpesombaa lahumoa, kombake mia anu molema aroano atuu pinokoroso ka ikaano bau pesomba a lahumoa?

¹¹ Nde ba kanandio mia anu molema, onaemo pepaekompomu, anu tiano koa mbo'u ka Domate i Kerisituu, gagi mate hangano ”ponto'ori” mu.

¹² Tewala hangano anu kanandio ka utehala a luwuno pepaekompomu ka belaio aroado anu molema, a menteeano omue tehala ndi Ondae i Kerisituu.

¹³ Onaemo pu'uno tewala kaanga gagi watu tetiduno pepaekompoku, ranta nahina tampulaano nahi aku mongkaa mbo'u bau, ka si kugagi watu tetiduno pepaekompoku.