1 KORINTI 7 - Wunta Mempori

Mongkona pekombiaa 7:1-16

¹ Ka kanandio-andio mongkona luwuno anu imeburiakune. Onaemo moiko tama, ba nahi pekombia,

² Sine tumangkoroo masolaa a mpebelesua, moikoopo sompo tama ka ihina beineno onaeno ka sompo beine ka ihina tamano onaeno.

³ Asalakono tama umihiio kinereno beineno, kanatuu koa mbo'u beine a ntamano.

⁴ Beineno nahina pabawano a ngkoroino onaeno, sine tamano, kanatuu koa mbo'u tama nahina pabawano a ngkoroino onaeno, sine kombiano.

⁵ Si memambe olaiako, sangkadio tepo'asaamiu a tempo anu sarai, ka ipohawe koa tempo mekakai. Umarino atuu ka iwali tuwu me'asa, ka si popandei komiu i Mosa'o, hangano nahi mpokompeteao po'eheno aroamiu.

⁶ Mongkona andio kupauakomiu kana koloaa, komba songka.

⁷ Maupo kanatuu tedoa moiko, tewala luwuno mia kana ongkue; sine sompo mia montarima pompowee inso ndi Ondae Ue Ala tiano onaeno, anu asa mia pompowee andio, anu mehano pompowee atuu.

⁸ Sine a mia anu nahi dompekombia ka a ntuwu beine kupauako ira, moikoopo ka domekongko kana ongkue.

⁹ Sine tewala nahi dompokompeteao, moikoopo dompekombia. Hangano moikoopo mekombia sekonopo mo'ai hangano po'eheno aroa.

¹⁰ A mia anu mpekombia iramo ongkue – naahi, komba ongkue, sine Ondae i Ue – meparenta, aasa beine si teposuaakono tamano.

¹¹ Ka tewala onae teposua, asalakono ka ituwu mpiha nahina tamano ke mesintuwu saru tamano. Ka aasa tama si teposuaakono beineno.

¹² A mia susua ongkue, komba Ondae i Ue, motae: tewala hinao aasa pepaekompo mekombiaako asa mia anu nahi pompe'ala-ala ka beine atuu ineheno tuwu morokoakono, pepaekompo atuu nahi moiko iteposuaakono.

¹³ Ka tewala hinao aasa beine metamaako asa mia anu nahi pompe'ala-ala ka tama atuu ineheno tuwu morokoakono, si teposuaakono tama atuu.

¹⁴ Hangano tama anu nahi pompe'ala-ala atuu pinokomempori hangano kombiano ka kombiano anu nahi pompe'ala-ala atuu pinokomempori hangano tamano. Tewala komba kanandio, manasa luwuno anamiu onaemo ana mokoburu, sine kanandio-andio ondae onaemo nana'ote mempori.

¹⁵ Sine tewala mia nahi pompe'ala-ala atuu ineheno teposua, po'ineeomo doteposua; mongkona anu kanandio pepaekompo tama ke beine maluaomo. Sine Ondae Ue Ala moboi komiu ka imentuwu a laro rodoa.

¹⁶ Hangano kana'umpeke ka uto'orio, hei beine, nahi kokumaduduioke tamamu? Ba kana'umpeke ka uto'orio, hei tama, nahi kokumaduduioke beinemu?

Tuwu a laro nteweweu kana tempono Dopepoboi Ue Ala 7:17-40

¹⁷ Ka i'amba asalakono sompo-sompo mia ka ikongko tuwu kana anu Dopakosiakonomo i Ue ka a nteweweu kana tempono Dopoboio Ue Ala. Ndiomo pompakosi anu kuweeako ira luwuno bawaa.

¹⁸ Tewala asa mia pinoboi metindiomo, si koa i'ungkeakono ta wunio petindino atuu. Ka tewala asa mia pinoboi nahi petindi, siimo ipetindi.

¹⁹ Hangano metindi ke nahi petindi komba kinere. Anu kinere onaemo tumondao luwuno songka-Do Ue Ala.

²⁰ Moikoomo sompo-sompo mia ka ipo'ia a nteweweu, kana tempono Dopoboio Ue Ala.

²¹ Nde atakoke tempono upinoboi? Atuu komba tembio! Sine tewala mohaweko tempo ka upinotola, pakeomo tempo atuu.

²² Hangano aasa ata anu pinoboi-Do i Ue a anggaa-Do, onaemo mia tola, mia-Do i Ue. Kanatuu koa mbo'u mia tola anu pinoboi-Do i Kerisituu, onaemo tetenaa-Do.

²³ Me'inoli komiumo ka olino lesoomo inowahi. Onaemo pu'uno si megagi atado mia.

²⁴ Pepaekompo luwu-luwu, po'ineeomo sompo-sompo mia ka ipo'ia i aro-Do Ue Ala a nteweweu kana tempono ipinoboi.

²⁵ Kanandio-andio mongkona luwuno ana beine. Mongkona ondae nahi kupohawe parenta inso ndi Ondae i Ue. Sine kupauo pohaweno aroaku kana asa mia anu pine'ala-ala hangano pe'aroa anu tinarimano inso ndi Ondae Ue Ala.

²⁶ Pohaweno aroaku, nine mewowoloo tempo masukara kanandio-andio, moikoopo mia ka ikongko kana tuwuno.

²⁷ Nde te'onggokoke a aasa beine? Si po'ungke-ungkeako koteposua! Nde nahi ute'onggoke a aasa beine? Siimo mbo'u po'ungke te'asa mia!

²⁸ Sine tewala mekombiako, komba tehalako. Ka tewala aasa ana beine mekombia, onae komba moweweu hala. Sine mia anu kanandiodo ta umalu ira masusaa ngkoroi ka aku motola komiu inso a masusaa atuu.

²⁹ Pepaekompo luwu-luwu, ndiomo anu aku pauo, onaemo: owowaomo tempo! Onaemo pu'uno a tempo anu da hinao andio mia anu hinao beinedo asalakono ka dompelelu kana nahina beinedo;

³⁰ ka mia anu mpengese kana nahi dompengese; ka mia anu memawongko kana nahi domemawongko; ka mia anu mpo'oli kana nahi dompe'ueo hapa anu inolido;

³¹ owowaano luwuno mia anu mompake parewa ntolino kana poore komba domempakeo. Hangano wawontolino anu tomento'orio kanandio-andio ta tampula.

³² Ineheku, ka imentuwu nahina pinorerengko. Mia anu nahina beineno ka ipo'asao aroano a mpo'ehe-Do i Ue, ba kana'umpe ka Dopemoikoo i Ue.

³³ Mia anu hinao beineno ka ipo'asao aroano a mpo'eheno wawontolino, ba kana'umpe ka ipokonsanaao beineno,

³⁴ ka ba kanandio aroano tetia-tia. Beine anu nahina tamano ka luwuno ana beine dompo'asao aroado a mpo'ehe-Do i Ue, ka imempori koroido ka penaado. Sine baine anu hinao tamano mo'asao aroano a mpo'eheno wawontolino, ba kana'umpe ka ipokonsanaao tamano.

³⁵ Luwuno andio kupauo moikoamiu koa, komba tumomboleio po'eheno aroamiu, sine tendeano ka impoweweu hapa anu mentee ka moiko, ka ipekakaako Ira i Ue nahina morerenggoti.

³⁶ Sine tewala potaeno asa mia, nine nahi tekona wineweuno a nsamborano, tewala samborano atuu komota-mota'unomo ka mentee ntu'u ipewowoloo, nine asalakono ka dopekombia, moikoomo dopekombia, tewala ineheno. Mongkona atuu komba hala.

³⁷ Sine tewala asa mia, anu komba dinadai ka ipoweweu kanandio, ipe'ala-alao ntu'u i laro aroano ka ipabawaio ntu'u po'eheno, iputusiomo nahi ta kumombiao samborano, onae moweweu moiko.

³⁸ Gaagi mia anu kumombiao samborano moweweu moiko, ka mia anu nahi kombiao samborano moweweu lalu moiko.

³⁹ Beineno te'onggo tempono da tuwu tamano. Tewala mateomo tamano, maluaomo ba ipekombiaako isemamo koa anu ineheno, poolo mia atuu asa mia anu mompe'ala-ala.

⁴⁰ Sine montonda pohaweku, me'uraopo, ba ikongko mo'ia a ntinuwuno. Ka pohaweku, nine ongkue mbo'u hinao Penaa-Do Ue Ala.