Римдегілерге 11 - Наа Молҷағ

Израильге Худайның паарсазы

¹ Ол оңдайнаң мин сурчам: нӧӧс Худай Позының чонын хыйа идібіскен? Чох, андағ нимес. Мин дее Израиль чонынаңмын, Авраамның тӧлінеңмін, Вениаминнің уйазынаңмын.

² Худай Позының азынада пілген чонын хыйа сӱрбеен. Алай Худай Пічиинде Илия ухаанҷыдаңар ниме пазыл парғанын пілбинчезер бе? Илия Израиль чонын Худайға піди хоптаан:

³ «Хан Худай! Ухаанҷыларыңны ӧдір салғаннар, тайығ салҷаң орыннарыңны сайбап салғаннар. Чалғыс мин не халдым, минің тынымны аларға мині тілепчелер».

⁴ Худайның нандырии ағаа ниме чоохтапча? «Мин Позыма Ваалның алнында тізекке тӱспеен читі муң кізіні халғызып алғам».

⁵ Сағамғы туста даа Худайның паарсазы хоостыра таллалған чоны арт халған.

⁶ Худайның паарсазы хоостыра таллалған ползалар, іди таллааны киректер хоостыра таллааны полбас. Киректер хоостыра таллаза, анзы паарсас полбас.

⁷ Андағда нимедір зе? Израиль тілепчеткен нимезіне чит полбаан. Таллалғаннары ла анзына чидіп алғаннар. Пасхаларының, тізең, чӱректері хатхлап парғаннар.

⁸ Піди пазылых: Худай оларны уйғаа пастыр салған, пу кӱнге теере харахтарын кӧрбес, хулахтарын испес ит салған.

⁹ Давид тее тіпче: оларны тосхырчатхан ниме постарына тузах ползын, хахпан ползын, оларны харылдырзын, иткеннерінеңӧк нандырзын.

¹⁰ Харахтарына кӧрбес иде харасхы тӱс парзын, арғалары хаҷан даа пӱгӱр чӧрзіннер.

¹¹ Ол оңдайнаң мин сурчам: олар саңай аңдарыл парыбызарға тіп, харыл парды полҷаңнар ба? Чох, андағ нимес. Че олар аңдарыл парғаннарында, арачыланыс пасха чонға килген. Анзы Израильні кӱннеттіртер ӱчӱн иділген.

¹² Оларның аңдарылғаны тилекейні пайыт салған, уттырғаны пасха чоннарны пайыт салған. Андағ полза, прай Израиль Худайға айланза, улам артых полар.

Пасха чоннарның арачыланызы

¹³ Сірерге, Худайы чох кізілерге, тізең, чоохтапчам: мин, пасха чоннарзар ызылған илҷі, позымның тоғызымны саблапчам.

¹⁴ Арса, пір сӧӧк кізілерімнің чӱректерін кӱннеттіртіп, піреезін іди арачылап алҷаңмын ма?

¹⁵ Худайның олардаң хыйа айланыбысханы Аның пасха чонға чарастырығ пиргені полған нооза. Худай иудейлерні Позынзар хатап алза, тізең, ниме полар? Анзы ӧліглерні тірілдіргені паза чуртас пиргені полар.

¹⁶ Халастың пастағы кизегі Худайға чарыдылчатса, прай даа халас ах-арығ пол парча. Ағастың чилегезі ах-арығ полза, салаалары даа ызых полчатпастар ба.

¹⁷ Олива ағастың пірее салаалары сынғлап парып, оларның орнына синің, чазы оливазының салаазы ӧскіріл парза, пір тамырлығ пол парчазар. Ол чахсы ағастаң кӱс тартынчазың.

¹⁸ Салааларының алнында махтанма. Махтанҷаң нимең пар ба? Син тамырларны тутпинчазың. Олар сині тутчалар.

¹⁹ Син, арса, тирзің: «Мині ӧскір салар ӱчӱн, пу салаалар сындырыл парғаннар».

²⁰ Чахсы. Олар киртіністері чох полғаннаңар сындырылғаннар. Син, тізең, киртінчеткеніңнің ӱчӱн ӧсчезің. Син кӧкеесімненме, хорығып одыр.

²¹ Худай ағастың позының салааларын айабаанда, сині дее айабазох.

²² Худайның паарсах таа, хатығ даа хылынчатханын сизініп одыр: Позынаң хыйа полыбысханнарға хатығ хылынча, Худайның паарсазында чӧрерге кӱстенчетсең, паарсах полар. Андағ полбаза, син дее кизіл парарзың.

²³ Тігілер дее, киртініс чох чуртабазалар, хатап чапсыра ӧскіріл парарлар. Худайның хатап чапсыра ӧскір салар кӱзі пар нооза.

²⁴ Син, чазы олива ағазынаң кизіл парып, чир салылған оңдайына тоғыр полып, чахсы олива ағазына чапсыра ӧскіріл парғазың. Чахсы ағастың кизілген салаалары, тізең, постарының ағастарына улам артых чапсыра ӧс парчатпастар ба.

Худайның прай кізілерге паарсапчатханы

²⁵ Сірерге, харындастар, пір чазытты ас пирерге сағынчам. Постарыңнаңар улуғ сағынмаңар. Израиль чонының хай піреелері ӧчес оңдайларына пастыр салғаннар. Анзы саңайға нимес, че пасха чонның толдыра саны Худайға килер тусха ла теере.

²⁶ Іди прай Израиль арачыланып алар. Піди пазылых: «Сионнаң Осхырығҷы киліп, Иаковтың Худайны улуғлабинчатханын хыйа тастир».

²⁷ «Пу Минің оларнаң Молҷаам полар. Мин оларны чазыхтарынаң позыдыбызарбын».

²⁸ Чахсы Хабар сірерзер килер ӱчӱн, олар Чахсы Хабарға ыырҷылар чіли хайчалар. Итсе, иудейлер Худайның таллаан чоны полчалар, паза ӧбекелерінің ӱчӱн Худай оларға хынча.

²⁹ Худай сыйыхтарын нандыра албинча паза таллаанынаң тӧдірленминче.

³⁰ Сірер дее тузында Худайның чооғын испеен полғазар. Амды, тізең, оларның чоох испееннерінің ӱчӱн, Худай сірерні айап пирген.

³¹ Худай сірерні айир ӱчӱн, олар амды чоох испес пол парғаннар. Арса, оларға даа Худай ӧлҷей пирер.

³² Худай айиры ӱчӱн, прайзын чоох испес ит салған.

Худайны саблааны

³³ Худайның хыйғазы паза пілізі хайдағ илбектір! Аның пӧгіннерін пілҷее чоғыл, Аның чолын чолласчаа чоғыл.

³⁴ Худайның сағызын кем піліп алған? Кем Ағаа чӧп пирген?

³⁵ Алай піреезі Худайға, алымны айландырзын тіп, алымға пірее ниме пирген ме?

³⁶ Прай ниме Аннаң полча, прай ниме Аннаң пастыра паза Ағаа полча. Ағаа хаҷанға даа сабланыс ползын. Аминь.