Матфей 25 - Наа Молҷағ

Он хыстаңар кип-чоох

¹ Андада, чарытхыларын алып, ипчі алчатхан оолны удурлирға сыххан он хысха тӧӧй полар Тигір хан-чирі.

² Ол хыстарның пизі уғаа хыйға полған, халған пизі, тізең, нимее чарабаан.

³ Нимее чарабааннар, чарытхыларны алып, кӧйдірҷең хайахтарын албин салтырлар.

⁴ Хыйғалар, тізең, чарытхыларны паза ідістеріне толдыра хайах алып алғаннар.

⁵ Че ипчі алчатхан оол орайлатчатханда, прайзы, сабыхсып, узубысхан.

⁶ Орты хараада, тізең, «Мына ипчі алчатхан оол килир, аны удурлирға сығыңар» тіп хысхырған табыс истіл парған.

⁷ Андада прай хыстар, усхун киліп, чарытхыларын иптебіскеннер.

⁸ Нимее чарабаан хыстар, тізең, хыйғаларына тееннер: «Пістің чарытхыларыбыс ӱсчелер, аннаңар хайахтарыңнаң кӧп нимес піске пиріңер».

⁹ «Андада ол хайах піске дее, сірерге дее читпес. Сірер, садығҷыларзар парып, постарыңа садып алыңар» тіп нандырғаннар хыйғалары.

¹⁰ Олар хайах садызып аларға парыбысхан туста ипчі алчатхан оол чиде салған. Прай тимнен салған хыстар аннаң хада тойға кір парыбысханнар, ізік, тізең, чабыл парған.

¹¹ Анаң пайаағы хыстар, айлан киліп, чоохтанғаннар: «Ээзі кізі! Ээзі кізі! Ас пир піске ізікті!»

¹² «Сынны тіпчем сірерге, Мин сірерні пілбинчем» тіп нандырған оларға ипчі алчатхан оол.

¹³ Кип-чоохты тоозып, Иисус теен: – Сірер Кізі Оолғының килер кӱнін дее, тузын даа пілбинчезер, аннаңар сиргек полыңар. –

Таланттаңар кип-чоох

¹⁴ Ідӧк Тигір хан-чирі пасха чирзер парчатхан паза, позының нымысчыларын хығырып, нинҷе пар нимезін кӧрерге чахыпчатхан кізее тӧӧй.

¹⁵ Оларның полғанына ла сӱмезі хоостыра ахча пирген ол: пірсіне пис талант, ікінҷізіне – ікі, ӱзінҷізіне – пір. Позы сах андох парыбысхан.

¹⁶ Пис талант алған нымысчы, парып, ол ахчазын кирекке тузаланып, хоза пис талант идіп алған.

¹⁷ Ідӧк ікі талант алған нымысчы соонаң хоза ікі талант идіп алған.

¹⁸ Пір талант алған нымысчы, тізең, парып, аны чирге кӧӧм салып, іди ол ээзінің кӱмӱзін чазыр салған.

¹⁹ Илееде тус ирткенде, нымысчыларның ээзі, айланып, нымысчыларынаң нандырығ сурған.

²⁰ Пис талант алған нымысчы, киліп, хоза пис талант ағыл пиріп, теен: «Ээзі кізі, син мағаа пис талант пиргезің, мына мин оларға хоза пис талант тоғынып алғам».

²¹ «Чахсы паза ізестіг нымысчым! Син кічіг киректе ізестіг полдың. Мин сині кӧп нименің пазында турғызарбын. Ээзіңнең хада ӧрін» – тіп нандырған ағаа ээзі.

²² Ікі талант алған нымысчы даа, пас киліп, теен: «Ээзі кізі! Син мағаа ікі талант пиргезің. Мин оларға хоза ікі талант тоғынып алғам».

²³ «Чахсы паза ізестіг нымысчым! Син кічіг киректе ізестіг полдың. Мин сині кӧп нименің пазында турғызарбын. Ээзіңнең хада ӧрін», – теен ағаа аның ээзі.

²⁴ Пір талант алған нымысчы, пас киліп, теен: «Ээзі кізі! Мин синің хатығ хылииңны пілчем. Таарыбаан чирде ас кисчезің, чайа тастабаан чирде теерчезің.

²⁵ Аннаңар мин, синнең хорығып, парып, синің ахчаңны чирге чазыр салғам. Мына сағаа сини».

²⁶ Ээзі ағаа нандырған: «Арғаас паза нимее чарабас нымысчы! Мин таарыбаан чирде ас кисчеткенімні, чайа тастабаан чирде теерчеткенімні піліп,

²⁷ син кӱмӱс ахчамны садығҷыларға пирібізерге кирек полғазың. Мин, тізең, киліп, парыс алып аларҷыхпын.

²⁸ Амды пір талантты, аннаң алып, он таланттығ кізее пирібізіңер.

²⁹ Ниме-ноозы пар полған на кізіни хозылып одырар, че ниме-ноозы чох кізі пар даа нимезін пыластырар.

³⁰ Пу нимее чарабаан нымысчыны, тізең, тастындағы харасхызар тастабызыңар: анда сыыт паза тіс хыҷыразы полар» тіп, Иисус піди хосхан: – Хулаа пар кізі иссін! –

Чоннарны чарғылааны

³¹ Хаҷан Кізі Оолғы Позының сабланызында паза Аннаң хада прай ах-арығ ангеллері чиде салзалар, андада Ол Позының сабланыстығ ӱлгӱ сіреезіне одырыбызар.

³² Аның алнына прай чоннар чыылыс килерлер. Андада оларны, мал хадарҷызы хойларны ӧскілердең чарчатхан чіли, Ол ікі чара чар салар.

³³ Хойларны Позының оң саринзар турғыс салар, ӧскілерні, тізең, – сол саринзар.

³⁴ Анаң хан Позынаң оң сариндағыларға чоохтанар: «Минің Пабам алғааннары, киліңер, чир чайалғаннаң сығара сірерге тимнелген хан-чирін алыңар.

³⁵ Мин астапчатханда, сірер мині азыраазар, сухсаанымда – суғ пиргезер, хонҷаң чир чох чӧрчеткенімде – тураңарда хондырғазар,

³⁶ кип-азах чох полғанымда – тонандырғазар, ағырчатханымда – мині кӧргезер, харибде одырчатханымда – Минзер килгезер».

³⁷ Андада арығ чӱректіг кізілер Ағаа нандырарлар: «Хан-пигібіс! Хаҷан піс, Синің астапчатханыңны кӧріп, азыраабыс? Алай, сухсапчатханыңны кӧріп, суғ пиргебіс?

³⁸ Хаҷан піс Сині, хонҷаң чир чох чӧрчеткеніңні кӧріп, турабыста хондырғабыс? Алай, кип-азааң чохта, тонандырғабыс?

³⁹ Хаҷан піс, ағырчатханыңны алай харибде одырчатханыңны кӧріп, Синзер килгебіс?»

⁴⁰ «Сынны сірерге тіпчем, сірер кічіг харындастарымның пірсіне иткен нимелерні мағаа даа иткезер» тіп нандырар оларға хан.

⁴¹ Андада Позының сол саринда турчатханнарға чоохтанар: «Хыйа парыңар миннең, хаарғаннар. Сайтанға паза аның ангеллеріне тимнелген успас отха кіріңер.

⁴² Мин астап чӧрчеткенде, Мағаа чиис пирбеезер. Сухсапчатханда, Мағаа суғ пирбеезер.

⁴³ Хонҷаң орын чох чӧргенде, Мині тураа кирбеезер. Кип-азах чох полғанда, Мині тонандырбаазар. Ағырчатханда паза харибде одырчатханда, сірер Мині кӧрбеезер».

⁴⁴ Андада олар, Ағаа нандырып, тирлер: «Хан-пигібіс! Хаҷан піс, Синің астапчатханыңны алай сухсапчатханыңны, алай хонҷаң чир чох чӧрчеткеніңні, алай кип-азах чох полғаныңны, алай ағырчатханыңны, алай харибде одырчатханыңны кӧріп, Сағаа полыспаабыс?»

⁴⁵ Андада Ол нандырар оларға: «Сынны сірерге тіпчем, Минің пу кічіг харындастарымның піреезіне итпеен чахсы нимені Мағаа даа итпеенге саналар».

⁴⁶ Анаң мыннары тоозылбас хатығ чарғаа ызыларлар, арығ чӱректіг кізілер, тізең, мӧгі чуртассар парарлар.