Лука 12 - Наа Молҷағ

Чойырхостаңар сизіндіріг

¹ Нинҷе-нинҷе муң чон чыылыс киліп, хыстынызып ала, удур-тӧдір ітклесчеткен туста, Иисус ӱгренҷілеріне пастап чоохтанған: – Фарисейлернің ачытхызынаң китеніңер, анзы – чойырхос полча.

² Чазырған нимелернің пірдеезі азылбин пола чоғыл, пасхалары піл салбас чазыт таа пола чоғыл.

³ Аннаңар харасхыда чоохтаан нимелерің чарыхта истіл пар турар. Тура істінде хулахха сыбыхтап чоохтаан ниме тура хырынаң чарлалар.

⁴ Тіпчем нооза сірерге, Позымның арғыстарыма: ит-сӧӧкті ле ӧдіріп, аннаң пасха пір дее ниме ит полбастардаң хорыхпаңар.

⁵ Че кемнең хорығарға кирек полчатханын мин сірерге чоохтап пирербін. Кемнің сірерні, ӧдіріп, кӧйчеткен кӧлзер тастаҷаң ӱлгӱзі пар, анзынаң хорығыңар. Йа, тіпчем сірерге, анзынаң хорығыңар.

⁶ Пис пораатай ікі ле ахчаа садылча нимес пе зе? Че оларның пірдеезін Худай ундубинча.

⁷ Пастарыңдағы састар даа прай сандалар, аннаңар хорыхпаңар, нинҷе дее кӧп пораатай полза, сірер прайзынаң аарлығзар.

⁸ Тіпчем сірерге, кем чонның алнында Миннең хада полчатханын кӧзітче, Кізі Оолғы даа ол кізінең хада полчатханын Худай ангеллерінің алнында кӧзідер.

⁹ Че кем кізілер кӧзіне Миннең хыйа полыбызар, Мин дее аннаң Худай ангеллерінің алнында хыйа полыбызарбын.

¹⁰ Кем Кізі Оолғына тоғыр чоохтанар, аның пырозы тасталар, че кем Худай Худынаңар хомай чоохтанар, анзының пырозы тасталбас.

¹¹ Сірерні синагогаларзар, пастыхтарзар паза пиглерзер ағыл килзелер, хайди алай ниме нандырарынаңар, алай ниме чоохтанарынаңар сағыссырабаңар.

¹² Олох туста Худай Худы сірерні чоохтанҷаң нимее ӱгрет салар.

Сағызы чох пайдаңар кип-чоох

¹³ Чон аразынаң пір кізі Иисуссар айланған: – Ӱгретчі! Чоохта харындазыма, пабам халғысхан ис-пайнаң миннең ӱлессін. –

¹⁴ Кем Мині сірерге чарғыҷы поларға алай ис-пайны ӱлестірерге турғысхан? – нандырған ағаа Иисус.

¹⁵ Анаң оларның прайзына теен: – Кӧріңер, азымахчы полардаң китеніңер. Кізінің чуртазы ис-пайының кӧбінең полбинча.

¹⁶ Анаң кізілерге пір кип-чоох чоохтап пирген: – Пір пайның хыразында маңат тамах сыхтыр.

¹⁷ «Хайди полҷаң? Пу син тамахты урҷаң орын чоғыл», – сағынтыр ол кізі позы алынҷа.

¹⁸ Анаң тіптір: «Піди ит салим: аңмарларымны сайабызып, мыннаңох улуғ аңмарлар пӱдір саларбын. Андар прай тамаамны паза прай ис-пайымны чыып саларбын.

¹⁹ Анаң позым позыма тирбін: Ис-пайың кӧп, нинҷе-нинҷе чылларға чидер: тынанып, чіп, ізіп, чуртастың татхынын хап».

²⁰ «Нимее чарабаан! Пуох хараазын тыныңны ал чӧрібізерлер, кемге халар чыған ис-пайың?» – теен ағаа Худай.

²¹ Худайға пайыбин, ис-пайны ла позына чыыпчатхан кізінең піди пол парадыр.

Пір дее нимедеңер сағыссырабаңар

²² Анаң Иисус ӱгренҷілеріне теен: – Аннаңар тіпчем сірерге: чіҷең-ісчең нимедеңер, кисчең кип-азахтаңар сағыссырабаңар.

²³ Сірернің чуртазыңар ас-тамахтаң артых нимес пе зе, идіңер, тізең, – кип-азахтаң?

²⁴ Кӧріңер харғаларны: олар тамах таарып-чығбинчалар, ӱртӱннері дее, аңмарлары даа чоғыл, Худай, тізең, оларны азырапча. Сірер, тізең, хустардаң артых нимессер бе зе?

²⁵ Сірернің пірееңер сағыссыри-сағыссыри киліп, позының ӧскен сынын пір харысча даа хос полар ба ни?

²⁶ Мындағ даа кічіг нимені ит полбинчатханда, пасхазына нимее сағыссырапчазар?

²⁷ Кӧріңер, чазы чахайахтары хайди ӧсчелер: олар тоғынминдаачалар, тӱк тее иирбинчелер, че, тіпчем сірерге, Соломон даа – Израиль ханы – иң саблығ тузында, оларның пірсі дее чіли сіліг тонан чӧрбеен.

²⁸ Худай пӱӱн чазыдағы, таңда, тізең, песке тасталар отты даа іди тонандырчатса, сірерні дее тонандырбас па, ас киртіністіглер!

²⁹ Аннаңар, чіҷең-ісчең ниме тілеп, сағыссырабаңар.

³⁰ Худайы чохтар анзын тілепчелер; Пабаңар, тізең, анзын кирексіпчеткеннеріңні пілче.

³¹ Аның орнына Худай хан-ӱлгӱзін тілеңер, пасхазын, тізең, Худай сірерге пирер.

Тигірдегі ис-пайдаңар

³² Хорыхпаңар, сірер кічіг хой ӧӧрі! Худай Пабаңар Худай хан-чирін сірерге пиреріне чӧпсінче.

³³ Сірер, ис-пайыңарны садып, чох кізілерге полызыңар. Постарыңа уурабас хапчығас тимнеп, хорабас ис-пайны тигірде чығыңар. Андар оғыр даа чит полбас, кӧӧ дее аны ардат полбас нооза.

³⁴ Ис-пайыңар хайда, чӱрееңер дее анда полар.

Узубаңар

³⁵ Хурларыңны хурчан салып, чарытхыларыңны тамызып, хаҷан даа тимде полыңар.

³⁶ Тойға парыбысхан пигні сағыпчатхан нымысчыларға тӧӧй полыңар: анзы, киліп, тохлатсох, олар ізікті сах андох ас пирерлер.

³⁷ Часкалығлар нымысчылар, хаҷан, ээзі нандыра айланып, оларның узубинчатханнарын кӧрзе. Сынны чоохтапчам сірерге, ол пай кізі, хурын хурчанып, нымысчыларын стол кистіне одыртып, оларның алнында хайынар.

³⁸ Часкалығлар ол нымысчылар, кемні ээзі, орты хараада даа, таң алнында даа киліп, тимде полғаннарын табар.

³⁹ Сірер пілчезер, сынап тура ээзі оғырның хаҷан килерін пілҷең полза, ол узубасчых, оғырға даа тураа кірерге пирбесчік.

⁴⁰ Кізі Оолғы сірер пір дее сағыбаан туста чиде салар, аннаңар хаҷан даа тимде полыңар.

Ізестіг паза ізестіг нимес нымысчы

⁴¹ Андада Пётр Иисусха теен: – Хан-пигім! Син пу кип-чоохты піске ле алай прайзына чоохтапчазың ма?

⁴² Хан-пиг, тізең, нандырған: – Кемдір ізестіг паза хыйға тура устағҷызы? Ээзінің пасха чалҷыларның пазында турғызылған паза оларға чіҷең нимені тузында пирҷең тура устағҷызы.

⁴³ Ээзі, киліп, нымысчының іди хайынчатханын кӧрзе, хайдағ часкалығ ол нымысчы!

⁴⁴ Сынны чоохтапчам сірерге, ээзі андағ нымысчыны прай тура-хазаазын кӧрерге турғыс салар.

⁴⁵ Че пірее нымысчы, «Ээзім пу чағында килбес» тіп сағынып, чалҷыларны сох сығар, позы, тізең, ізіп-чіп, араға чоо ізінер.

⁴⁶ Андада мындағ нымысчы сағыбаан кӱнде, сағыбаан туста ээзі чиде тӱзер, аны, ыра-чара тартып, киртінізі чохтарни осхас ӱлӱстіг идер.

⁴⁷ Ээзінің чахиин піле-тура, килеріне тимде полбаан паза аның чахиин толдырбаан нымысчы ээзіне чоо сохтырар.

⁴⁸ Че ээзінің чахиин пілбин, чарабас ниме ит салған нымысчы тың нимес сохтырар. Кемге кӧп пирілген, аннаң кӧбӧк сурағ полар; кемге кӧп киртіс-ізес полған, аннаң кӧбӧк сурарлар.

Тураны ікі чарары паза килер чарғы

⁴⁹ Мин чир ӱстӱне ӧрт суғыбызарға килгем, сағамох ол кӧй сыхчаң полза тіп, чидікпин сағыпчам!

⁵⁰ Мин кіресте кіреске тӱзерге кирекпін, че хайди изі чохтанчам мин, ол ниме пол парғалахха!

⁵¹ Мині чир ӱстӱне амыр хоных пирерге килген тіп сағынчазар ба? Тіпчем сірерге, чох, чарылыс ағылчам.

⁵² Мыннаң андар пис кізіліг турада чарылыс сығарлар, ӱзі ікізінең тоғыр, ікізі, тізең, ӱзінең тоғыр поларлар:

⁵³ пабазы оолғынаң тоғыр полар, оолғы, тізең, – пабазынаң. Іҷезі хызынаң тоғыр полар, хызы, тізең, – іҷезінең. Хазинезі килнінең тоғыр полар, килні, тізең, – хазинезінең.

⁵⁴ Анаң Иисус кізілерге теен: – Сірер, кидертін сыхчатхан пулутты кӧр салып, «наңмыр полар» тидірзер – ідӧк поладыр.

⁵⁵ Че хаҷан ӱстӱнзархы чил саап сыхса, сірер «ізіг полар» тидірзер – ідӧк поладыр.

⁵⁶ Чойырхостар! Сірер чирнің паза тигірнің алызарын піл полчазар. Амғы тустың хайдағ полчатханын хайди піл полбинчазар?

⁵⁷ Ноға сірер постарыңа ниме орта полчатханын пӧгінминчезер?

⁵⁸ Ыырласхан кізінең хада пастыхсар парчатсаң, аннаң чолдох чарас саларға кӱстен. Іди полбаза, ол сині чарғаа пирібізер, чарғыҷы, тізең, сині хадағҷаа пирібізер, хадағҷы, тізең, харибге сух салар.

⁵⁹ Тіпчем сағаа, халғанҷы оох ахчаңны даа пир салбаанда, андартын сых полбассың.