Иоанн 15 - Наа Молҷағ

Иисус – сын виноградтың тӧзі паза салаалары

¹ Мин сын виноградтың тӧзі полчам, Пабам, тізең, виноград ӧскірчеткені полча.

² Ол Миндегі чистек пирбинчеткен полған на салааны кизібісче, чистек ӧсчеткен полған на салааны, тізең, улам кӧп чистек пирзін тіп, арығлапча.

³ Минің ӱгредииме киртінчеткеннерің ӱчӱн, сірер амды арығзар.

⁴ Мыннаң мындар даа киртініңер Мағаа, Мин дее сірерде полим. Тӧс чох салаа чистек пирбес, сірер дее ідӧк, Мин чох, чистек пирбессер.

⁵ Мин Тӧзібін, сірер, тізең, салаалары полчазар. Кем Минде полча паза кемде Мин полчам, ол чистек пирче. Мин чох сірер пір дее ниме ит полбассар.

⁶ Мағаа киртінминчеткен кізі, чистек пирбинчеткен салаа чіли, тасталар паза хурир. Андағ салааларны, чыып алып, отха тастабысчалар, олар, тізең, кӧй парчалар.

⁷ Сірер Мағаа киртінзеңер, Минің сӧзімні толдыр турзаңар, андада ниме дее сурыңар – Пабам аны сірерге пирер.

⁸ Сірер, кӧп чистек пиріп, Минің ӱгренҷілерім пол парзаңар, Пабамны сабландырарзар.

Иисустың хынған ӱгренҷілері полып, удур-тӧдір хынызыңар

⁹ Мин сірерге, Пабам Мағаа хынған чіли, хынчам. Минің хынғаннарым полыңар.

¹⁰ Мин, Пабамның чахығларын толдырып, Аның хынызында полчам, сірер дее ідӧк, чахығларымны толдырзаңар, Минің хынғаннарым поларзар.

¹¹ Минің ӧрінізім сірерни ползын, мыны сірерге ӧріністерің толдыра ползын тіп чоохтадым.

¹² Мына Минің чахиим: Мин сірерге хынған чіли, удур-тӧдір хынызыңар.

¹³ Арғыстарының ӱчӱн позының тынын пирерге тимде полғаннаң артых хыныс чоғыл.

¹⁴ Сірер, Мин чахаан нимелерні толдыр турзаңар, Минің арғыстарым поларзар.

¹⁵ Мин сірерні нымысчыларым тіп паза адабинчам. Нымысчы кізі ээзінің иткен нимелерін пілбес. Мин, сірерні арғыстарым тіп адап, Пабамнаң искен прай нимелерні сірерге чоохтап пирдім.

¹⁶ Сірер Мині таллап албаазар, Мин сірерні таллап алғам. Сірерні, чонзар парып, мӧгі туза итсіннер тіп турғысхам. Прай пу нимелерні идіп, Минің ӱгренҷілерім ползаңар, Пабамнаң ниме дее сурзаңар, Ол сірерге аны пирер.

¹⁷ Удур-тӧдір хынызыңар тіп, чахыпчам сірерге.

Худайға киртінминчеткен кізілер Иисустың ӱгренҷілерін хырт кӧрчелер

¹⁸ Чир-чалбахтағы кізілер сірерні хырт кӧрчетселер, піліңер, сірердең пурун олар Мині хырт кӧргеннер.

¹⁹ Сірер чир-чалбахтағы кізілер полған ползаңар, андада чир-чалбах сірерге хынарҷых. Че сірер чир-чалбахтаң нимессер, Мин сірерні чир-чалбахтаң таллап алғаннаңар, чир-чалбахтағы кізілер сірерні хырт кӧрчелер.

²⁰ Сірерге чоохтаан сӧзімні ундутпаңар: «Нымысчы позының ээзінең улуғ полбинча». Мині ӧдірерге иткеннерінде, сірерні дее ӧдірерге идерлер. Минің сӧзімні толдырғанда, сірернің сӧзіңерні дее толдырарлар.

²¹ Мині Кем ысханын пілбинчеткеннерінеңер, сірер Минің ӱгренҷілерім полчатханнарың ӱчӱн, олар сірерге чабал идерлер.

²² Мин, оларзар киліп, чоохтаспаан ползам, олар, Мині постарына чағын итпееннері ӱчӱн, пыролығ полбасчыхтар. Че Мин, оларзар киліп, чоохтасхам, аннаңар амды олар постарының чазыхтары ӱчӱн ахтан полбастар.

²³ Мині хырт кӧрчеткен кізі Пабамны даа хырт кӧрче.

²⁴ Мин оларның аразында пір дее кізі ит полбас нимелерні итпеен ползам, олар пыролығ полбасчыхтар. Амды, тізең, олар, Минің иткен нимелерімні кӧріп, Мині дее, Пабамны даа хырт кӧрчелер.

²⁵ Оларның Чахиинда «Мині тиктең не хырт кӧрчелер» тіп пазылған сӧстерінің тол парары ӱчӱн, іди пол парарға кирек.

²⁶ Пабамнаң сірерзер Турысчыны ызарбын. Пабамнаң сыххан паза сынны чоохтапчатхан Хут – Турысчы – килзе, Ол Миннеңер киречілир.

²⁷ Сірер дее, Миннең хада пастағызынаңох сығара полғаннарың ӱчӱн, Миннеңер киречілирзер.