Илҷілернің 7 - Наа Молҷағ

Стефанның Ӧӧркі Чарғының алнында чоохтанғаны

¹ Андада улуғ абыс Стефаннаң сурған: – Андағ ба?

² Че Стефан піди нандырған: – Харындастар паза пабалар, истіңер! Сабланыс Худайы пістің ӧбекебіс Авраамға, хаҷан ол Харран саарзар кӧскелекте, Месопотам чирінде кӧрінген.

³ «Син пос чиріңнең паза пос туғаннарыңнаң сығыбыс, мин кӧзідер чирзер пар», – теен ағаа Ол.

⁴ Андада Авраам, Халдей чирінең парыбызып, Харранда чуртап сыххан. Андартын, тізең, пабазы ӱреен соонда, Худай аны амды сірер чуртапчатхан чирзер ысхан.

⁵ Худай ағаа пу чирде пір азах табанынҷа даа чир пирбеен. Че соонаң прай пу чирні ағаа паза аның тӧллеріне пирер пол салған. Авраамның, тізең, ол туста палалары даа чох полған.

⁶ Худай ағаа піди теен: «Синің тӧллерің, кізі чирінде чуртап, андағы чонға тӧрт чӱс чыл пазындырып, хыйыхтадар.

⁷ Че Мин оларны пазынған чонны чарғылирбын. Аның соонаң синің тӧлің, пеер нандыра киліп, Мағаа пу чирде пазырар».

⁸ Анаң Худай Авраамнаң сӱннет идердеңер молҷас салған. Іди Авраам, Исаак оолғы тӧреенде, сигізінҷі кӱнінде ағаа сӱннет иткен. Исаактаң Иаков тӧреен. Иаковтаң, тізең, он ікі сӧӧк тӧстегҷізі тӧріптір. –

⁹ Иаковтың ооллары, атархап, Иосиф харындастарын Египетсер садыбысханнар, че Худай анынаң хада полған.

¹⁰ Аннаңар Ол, аны чобағлардаң осхырып, Иосифке хыйға сағыстар паза Египет фараонының паарсазын сыйлаан. Фараон, тізең, Иосифті Египетте паза позының ӧргезінде улуғ пастыхха турғыс салған.

¹¹ Ол тустарда прай Египет паза Ханаан чирлерінзер ӧзӧгіс паза илбек хыйал чиде тӱскеннер. Пістің пабаларыбыс чіҷең ниме таппин чӧргеннер.

¹² Иаков, Египетте тамахтың парын истіп салып, позының оолларын, пістің пабаларыбысты, иң пастағызын андар ысхан.

¹³ Олар андар ікінҷізін килгенде, тізең, Иосиф позынаңар харындастарына прай чоохтап пирген. Іди фараон Иосифтің сӧӧгінеңер піліп алған.

¹⁴ Иосиф позының пабазын Иаковты паза прай туғаннарын, читон пис кізіні, позынзар хығыртыбысхан.

¹⁵ Иаков іди Египетсер парыбысхан. Анда ол позы даа, палалары даа ӱреенҷе чуртааннар.

¹⁶ Оларның сӧӧктерін Иудей чиріндегі Сихем саарзар ағылғаннар. Анда оларны Авраам Сихемдегі Емморның оолларынаң кӱмӱс ахчаа садызып алған хуюда чыып салғаннар. –

¹⁷ Худайның Авраамға аасхынып пирген сӧзінің толар тузы чағдап килигенге орта, пістің чон Египетте кӧптең кӧп ле полып одырған.

¹⁸ Иосифті пілбеен хан Египетнең устап сыхханҷа, іди полған.

¹⁹ Ол, кӧйтікнең пістің чоннаң тоғыр парып, ӧбекелерібісті хыйыхтап сыххан, палаларын, тіріг халбазыннар тіп, тастатхан.

²⁰ Ол туста Моисей тӧреен, ол Худайҷа сіліг оолах полған. Ол ӱс ай пабазының туразында ӧскен,

²¹ анаң Моисейні сығара тастабысханнарында, аны фараонның хызы алып алып, позының палазын чіли ӧскіріп алған.

²² Моисейні Египеттің иң хыйға нимелеріне ӱгрет салғаннар. Аннаңар ол сӧснең дее, тоғыста даа чапчаң полған.

²³ Моисейге хырых час тол парғанда, ол позының чонына, Израиль оолларына, тоғазып аларға пӧгін сыххан.

²⁴ Анаң Моисей, ол чоннаң пір кізінің хыйыхтатчатханын кӧр салып, аның алнына турып, аннаң ӱчӱн ӧс алып, египеттегілернің пірсін чох ит салған.

²⁵ Худай аның холынаң оларға арачыланыс пирчеткенін харындастары сизінерлер тіп сағынған Моисей, че олар аны піл полбааннар.

²⁶ Пазағы кӱн, оларның хай піреезінің тудысчатханын кӧр салып, Моисей, пас киліп, оларны чарастырарға харазып, теен: «Сірер харындастарзар, ноға удур-тӧдір хыйыхтасчазар?»

²⁷ Че хыйыхтапчатхан кізі, Моисейні хыйа ідібізіп, теен: «Кем сині пістің пастығыбысха паза чарғыҷаа турғысхан?

²⁸ Алай син мині дее, киҷеегі Египет кізізін чіли, ӧдірібізерге итчезің ме?»

²⁹ Мындағ сӧстерні истіп, Моисей, андартын тис чӧрібізіп, Мадиам чирінде, пасха чирліг кізі полып, чуртап сыххан. Анда аның ікі оол тӧреен. –

³⁰ Хырых чыл ирткенде, Моисейге Синай тағның хыриндағы хуу чирлерде, кӧйчеткен іскіт ағазының чалынында Хан Худайның ангелі кӧріне тӱскен.

³¹ Моисей, аны кӧріп, кӧрінҷекке чапсаан, чахсы иде кӧріп аларға чағын пас парғанда, ағаа Хан Худайның ӱні истіле тӱскен:

³² «Мин синің ӧбекелеріңнің Худайыбын, Авраамның Худайыбын, Исаактың Худайыбын паза Иаковтың Худайыбын». Моисей, хорыхханына прай сірлезіп, кӧрерге дее тідінмеен.

³³ Анаң Хан Худай ағаа теен: «Ӧдіктеріңні суурыбыс, син турчатхан орын ызых орын полча.

³⁴ Египетте Минің чонымның хыйыхтатчатханын кӧрчем, аның сыыдын исчем, чонымны осхырарға индім, че, пар, Мин сині Египетсер ысчам».

³⁵ Пу Моисейні, хайзын олар, «Кем сині пістің пастығыбысха паза чарғыҷаа турғысхан?» тіп постарынаң оортах иткеннер. Худай аны кӧйчеткен ыдарбан ағазының чалынында кӧрінген Ангелі пастыра, пастых паза арачылағҷы идіп, ысхан.

³⁶ Пу Моисей, Египет чирінде, Хызыл талай хыринда, аның соонаң хуу чазыда хырых чылҷа хайхастар паза танығлар идіп, чонын Египеттең сығарып алған.

³⁷ Пуох Моисей Израиль кізілеріне теен: «Ухаанҷыны Худай, миніӧк чіли, сірернің харындастарыңның аразынаң таллап, сірерзер ызар. Аны истіңер».

³⁸ Ана ол Моисей, кемнең Синай тағда ангел чоохтасхан паза хуу чазыда чыылған пістің ӧбекелерібіснең хада полған, Худайның чуртас пирчеткен сӧстерін алған, анаң піске оларны читірген.

³⁹ Пістің ӧбекелерібіс аның чооғын истерге хынмааннар, аны хыйа идіп, Египетсер нандыра парарға хынғаннар.

⁴⁰ Олар Ааронға тееннер: «Піске позыбысты апарҷаң худайларны ит пир. Пісті Египет чирінең сығарған Моисейнің хайди пол парғанын піл полбинчабыс».

⁴¹ Анаң олар, худай орнына пызоҷах идіп алып, ағаа тайығ салғаннар. Постары иткен ниме алнында ӧрінгеннер.

⁴² Че Худай олардаң хыйа полыбысхан. Ухаанҷылар пічиинде пазылғанни оларны тигірдегі сиріглерге нымысчы поларға артыс салған: «Израиль чоны! Мағаа ба сірер хуу чазыда хырых чыл ибіре маллар соғып, тайығ салғазар?

⁴³ Молох худайның одаан паза Ремфан худайның чылтызын алғазар сірер. Пу омаларны сірер пазырар ӱчӱн идіп алғазар. Аннаңар Мин сірерні Вавилоннаң даа ырах ызыға ызыбызарбын».

⁴⁴ Худайның парын киречілепчеткен отах хуу чазыда пістің ӧбекелерібістің полтыр. Олар аны Худай Моисейге чоохтаанни паза Моисейнің позы кӧргенни иткеннер.

⁴⁵ Пістің ӧбекелерібіс ол отахты алып алғаннар. Анаң Иисус Навиннің устааны хоостыра аны пабаларыбыс килер алнындох Худайға мыннаң сӱрдірген чоннарның чирінзер ағылғаннар. Іди отах Давид ханның тузына теере турған.

⁴⁶ Худайдаң паарсас алған Давид Иаковтың Худайына чуртаҷаң чир пирерге сурынған.

⁴⁷ Че Худайға тураны Соломон пӱдір пирген.

⁴⁸ Че Ӧӧркі Чайаачы кізі иткен тураларда чуртабинча. Ухаанҷы аннаңар піди тіпче:

⁴⁹ «Тигір Минің ӱлгӱ сіреем полча, чир Минің азағым тынандырчатхан орын. Хайдағ тура Мағаа пӱдірчезер, тіпче Хан Худай, алай хайдағ орын Мағаа тынанарға пирчезер?

⁵⁰ Пу нимені прай Минің холым иткен нимес пе зе?»

⁵¹ Ӧчестер! Хатығ чӱректіг паза Худай сӧзіне туных кізілер! Сірер дее, ӧбекелеріңӧк чіли, Худай Худына тоғыр поладырзар.

⁵² Ухаанҷыларның хайзын сірернің ӧбекелерің сӱрбееннер? Олар пеер Арығ Чӱректіг Кізінің килерінеңер искірген ухаанҷыларны ӧдір салғаннар, сірер дее Аны, садып, ӧдірген кізілер пол пардыңар амды.

⁵³ Сірер ангеллер пирген Моисей Чахиин алып алғазар, че аны толдырбаазар.

Стефанны тастарнаң ӧдіргені

⁵⁴ Пу сӧстерні истіп, Ӧӧркі Чарғыдағылар тарынғаннар паза тістерін хыҷыратханнар.

⁵⁵ Стефан, тізең, Худай Худынаң тол чӧрібізіп, тигірзер кӧрібіскен, анда ол Худайның сабланызын паза Худайның оң саринда турчатхан Иисусты кӧр салып,

⁵⁶ теен: – Мына мин азыл парған тигірні паза Худайның оң саринда турчатхан Кізі Оолғын кӧрчем.

⁵⁷ Че Ӧӧркі Чарғыдағылар, хулахтарын чаап, хысхырыза тӱскеннер, анаң прайзы Стефанға тыыныбысхан.

⁵⁸ Аны саар тастынзар сығарып алып, тастарнаң чаалап сыхханнар. Киречілер постарының кип-азахтарын Савл тіп оолның азахтарынзар салғлап салғаннар.

⁵⁹ Анаң, «Иисус Хан-пигім! Минің тынымны алып ал» тіп чоохтанып ала, пазырчатхан Стефанны тастарнаң чаалааннар.

⁶⁰ Стефан, тізең, тізекке тӱзіп, ӧтіг ӱннең хысхырыбысхан: – Хан-пигім! Нандырыға тартпа оларны пу чазых ӱчӱн! Іди тіп, ол тоозыл чӧрібіскен.