Еврейлерге 9 - Наа Молҷағ

Чирде паза тигірде пазырары

¹ Пастағы Молҷағда Худайға хайди пазырардаңар чоохталған. Аның хоостыра ызых отах турғызылған.

² Анда «ызых орын» полған. Ол орында чарытхылар полған паза Худайға салылған халастығ стол турған.

³ Кӧзеңе кистінде «иң ызых орын» тіп адалчатхан пӧлік полған.

⁴ Анда тадылығ чыстығ отты ӧртеҷең алтын чайындылығ орын полған паза алтын тастылығ сундух турған. Сундухта манналығ алтын ідіс, Ааронның хаҷан-да пӱрленібіскен тайағы паза Молҷағ пазылған чалбах тастар чатханнар.

⁵ Сундухтың ӱстӱнде ханаттығ ікі ангел иділ парған. Оларның аразында Худай позының сабланызында кӧрін парҷаң. Ангеллернің ханаттары Худай чонның чазыхтарын тастаҷаң орынны кӧлеҷеңнер. Че сағам анзын изерістіре чоохтиры кирек чоғыл.

⁶ Ызых отахта прай ниме піди иділік полған. Абыстар кӱннің сай, постарының тоғызын идерге тіп, пастағы улуғ отахха кірҷеңнер.

⁷ Ікінҷі отахха, тізең, пір чылда пір хати иң улуғ абыс ла кірҷең. Ол андар соххан малның ханын кир салҷаң. Ол хан, позын паза оңнабин халып, сайбағ иткен ӱчӱн, чазыхха кір парған кізілерні арығлаҷаң.

⁸ Пу кибірлер пастыра Худай Худы, пастағы ызых отах турғанҷа, иң ызых орынзар чол азылбазын піске кӧзітче.

⁹ Ол ызых отах пістің тустың омазы полча. Пу туста ағылған сыйыхтар паза иділген тайығлар оларны итчеткен кізіні арығ чӱректіг итпинчелер.

¹⁰ Моисей Чахииның чарадығлары чиилчеткен, ізілчеткен нимелердеңер, аймах чууныстардаңар чоохтапчалар. Олар ідӧк кізінің істін алыстырбинчатхан чахығлардаңар чоохтапчалар. Олар Худай прай нимені наа оңдайнаң идібізер тусха теере пиріл парғаннар.

¹¹ Че Христос, киліп, піске сооңар полар чахсы нимелернің иң улуғ абызы полыбысхан. Позының тоғызын итчеткен ол ызых отах кізі холынаң пӱдірілген ызых отахтаң хай-хай артых. Ол пу чирде турбинча нооза.

¹² Христос иң ызых орынға кіргенде, ӧскілернің алай пызоларның ханын хада албаан. Че Позының ханынаң пір хати андар кіріп, пісті хулдаң саңайға позытхан.

¹³ Ӧртеен хазыраның ойбазынаң поралалған ӧскілернең пуғаларның ханы, Чахығ хоостыра Худайның алнында чазыхтығ кізілерге чачырадылып, оларны арығлапчатхан полза,

¹⁴ андада Христостың ханы хай син артых арығлап полар. Ол Позы пір пыро чох полчадып, Худай Худының пастыра Позын тайыға Худайға пирінген. Амды Ол пісті, ӧлімге ағылчатхан киректердең арығлап, тіріг, сын Худайның нымысчылары поларға ӱгрет салар.

¹⁵ Аннаңар піске Наа Молҷағны пирген кізі Христос полча. Ол кізілернің пастағы Молҷағның тузында иткен сайбағлары ӱчӱн ӧл парған. Аның сылтаанда Худай мӧгі чуртас аларға хығыртхан кізілерге молҷаан нимені пирче.

¹⁶ Кізінің хумартхы сӧзі толдырылар ӱчӱн, ол кізі ӧл парарға кирек.

¹⁷ Кізі тірігде, аның хумартхы сӧзі кӱзіне кірбеен полча.

¹⁸ Аннаңар, пастағы Молҷағ алылчатханда, хан киректелген.

¹⁹ Моисей пастап Чахииның чарадығларын чонға чарлаан. Анаң пызоларның паза ӧскілернің ханын алып, суғнаң порабысхан. Аның соонда хызыл ӧңе сырлалған тӱкті паза иссоп ағастың салаазын алып, ханнығ суға ӧллеп, чонға паза Чахығ киндезіне чачыратхан.

²⁰ Анзын идіп ала, ол теен: «Пу хан Худай сірерні толдырзыннар тіп чахаан Молҷағның киречізі полча».

²¹ Пуох ханнаң ызых отахха паза анда тузаланылчатхан ідістерге чачырадыбысхан.

²² Моисей Чахии хоостыра прай даа ниме ханнаң арығлалча. Чазых таа, хан тӧгілзе ле, позыдылча.

Христостың тайии чазыхтаң арығлапча

²³ Тигірдегіні сомнапчатхан нимелер малның ханынаң арығлаларға кирек полғаннар. Че тигірдегізі сын позы аннаң артых тайығ киректепче.

²⁴ Христос, тигірдегізін сомнапчатхан, кізі холы иткен иң ызых отахха кірбеен. Ол, амды пістің ӱчӱн Худайның алнында турызарға тіп, тигірге кірген.

²⁵ Кізілернің абызы позының ханын нимес иң ызых орынзар пір чылда пір хати кирҷең. Че Христосха Позын тайыға хати-хати саларға кирек чоғыл.

²⁶ Іди киректелген полза, Ағаа, чир пӱткеннең ала, кӧп хати ирееленерге килізерҷік. Ағаа, тізең, чазыхты чох идер ӱчӱн, Позын тайыға пиріп, тӱгенҷі кӱннерде пір ле хати килерге киректелген.

²⁷ Полған на кізее, пір хати ӧліп, Худайның чарғызында турарға киліс парча.

²⁸ Христос таа ідӧк, кӧп чонны чазыхтаң арығлабызар ӱчӱн, Позын пір хати тайыға салған. Ікінҷізін ол, чазыхтаң арығлабызарға тіп нимес, че Аны сағыпчатханнарны арачылир ӱчӱн килер.