Азых чоох 8 - Наа Молҷағ

Читінҷі таңманы суурғаны

¹ Хураған читінҷі таңмазын суурыбысханда, тигірде пірее чарым часча сымзырых турыбысхан.

² Худайның алнында турчатхан читі ангелні кӧр салғам. Ангеллерге читі пырғы пиріл партыр.

³ Пасха пір ангел, пас киліп, холында алтын кадильница тудын салып, тайығ салҷаң орынның хыринда тур салған. Ағаа прай ах-арығ кізілернің Худайны сабландырчатхан сӧстерінең хада кӧп тадылығ чыстығ от пирілген. Ағаа ол отты ӱлгӱ сіреезінің алнында турчатхан тайығ салҷаң алтын орынзар сал саларға кирек полған.

⁴ Ах-арығ кізілернің Худайны сабландырчатхан сӧстерінең хада оттың ызы ангелнің холынаң Худайзар кӧдірілген.

⁵ Анаң ангел, кадильницаны алып, аны тайығ салҷаң орындағы ізіг кӧстернең толдырып, чир ӱстӱнзер тастабысхан. Андада чир ӱстӱнде табыстар истіліп, тигір кӱзӱреп, чалыннап, чир тітіри тӱскен.

Пырғылар

⁶ Читі пырғылығ читі ангел пырғы тартарға тимненібіскен.

⁷ Пастағы ангел пырғы тартыбысхан. Чалыннап кӧйчеткен от паза миндір ханнаң арали чирзер чаап сыхханнар. Ағастарның ӱзінҷі чардығы паза кӧк от прай кӧй парған.

⁸ Ікінҷі ангел пырғы тартыбысхан. Улуғ тағ осхас кӧйчеткен ниме талайзар тасталған паза талайның ӱзінҷі чардығы хызыл хан пол парған.

⁹ Піди талайда чуртапчатхан тыннығ нимелернің ӱзінҷі чардығы ӧл парған, пар чох керіптернің ӱзінҷі чардығы, тізең, кӧй парған.

¹⁰ Ӱзінҷі ангел пырғы тартыбысхан. Ағын суғларның ӱзінҷі чардығынзар чалыннап кӧйчеткен чарытхы осхас улуғ чылтыс тигірдең тӱс парған.

¹¹ Ады ол чылтыстың Ачығ полған. Аннаңар суғларның ӱзінҷі чардығы ачығ пол парған. Ол суғлар ачығ полғаннаңар, чир ӱстӱндегі чоннарның аразында кӧп кізі ӧл парған.

¹² Тӧртінҷі ангел пырғы тартыбысхан. Кӱннің ӱзінҷі чардығы, айның ӱзінҷі чардығы, чылтыстарның даа ӱзінҷі чардығы хырылып, чарыхтың ӱзінҷі чардығы пӱлес пол парыбысхан. Іди кӱнӧрткінің паза хараазының ӱзінҷі чардығы чарии чох пол парған.

¹³ Мында мин тигірҷе пӧзік учухчатхан ангелні кӧр салғам паза аның тыыда хысхырчатханын ис салғам: – Тӱрчедең халғанҷы ӱс ангелнің пырғылары тапсир! Олардаң чир ӱстӱнде чуртапчатхан чоннарға хыйал, хыйал, хыйал!