Азых чоох 7 - Наа Молҷағ

Чоннар Худайның алнында

¹ Анаң мин тӧрт ангелні кӧр салғам. Олар, чирнің тӧрт пулиинда турып, чил чирзер дее, талайзар даа, пір ағасха даа ӱбӱрбезін тіп, чирнің тӧрт чилін тутханнар.

² Тіріг Худайның таңмазын тудын салған пасха пір ангелні кӧр салғам. Ол, іскерде чоғар кӧдіріліп ала, чирге паза талайға ӱрег идерге пирілген ӱлгӱліг тӧрт ангелге тыыда хысхырыбысхан: –

³ Пістің Худайыбыстың нымысчыларының хамахтарына таңмалар турғызыбысханҷа, чирге дее, талайға даа, ағастарға даа ӱрег итпеңер!

⁴ Мин іди таңмалатханнарның санын ис салғам. Оларның саны 144 муң кізі полған, олар Израильнің прай тӧллерінің кізілері полғаннар.

⁵ Іди Иуданың тӧлінең 12 муң кізі, Рувимнің тӧлінең 12 муң кізі, Гадтың тӧлінең 12 муң кізі,

⁶ Асирнің тӧлінең 12 муң кізі, Неффалимнің тӧлінең 12 муң кізі, Манассийнің тӧлінең 12 муң кізі,

⁷ Симеонның тӧлінең 12 муң кізі, Левийнің тӧлінең 12 муң кізі, Иссахарның тӧлінең 12 муң кізі,

⁸ Завулонның тӧлінең 12 муң кізі, Иосифтің тӧлінең 12 муң кізі, Вениаминнің тӧлінең 12 муң кізі таңмалатхан.

⁹ Анаң кӧрзем, ӱлгӱ сіреезінің паза Хурағанның алнында санап тоосча чох кӧп чон турча. Олар полған на чоннаң, полған на тілдең, полған на сӧӧктең, полған на тӧлдең сыххан кізілер полғаннар. Олар ах кӧгенектіг полғаннар, холларында, тізең, пальма ағастың салааларын тудын салтырлар. Олар тыыда хысхырысханнар: –

¹⁰ Арачыланызыбыс ӱлгӱ сіреезінде одырчатхан Худайыбыстаң паза Хурағаннаң килче!

¹¹ Прай ангеллер, ӱлгӱ сіреезінің, ах сағалларның паза тӧрт аңның ибіре турып, ӱлгӱ сіреезінің алнында тӱңдере тӱзіп, Худайға пазырып ала, чоохтан турғаннар: –

¹² Аминь! Алғас паза сабланыс! Піліс паза алғыс! Аарлас, ӱлгӱ паза кӱс пістің Худайыбыста хаҷан даа ползын! Аминь! –

¹³ Кемнер пу ах кӧгенектіг кізілер? Хайдаң олар килгеннер? – тіп сурған ах сағалларның пірсі миннең. –

¹⁴ Син позың пілчезің, – тіп нандырғам. – Олар илбек чобағдаң сыхханнар, – теен ол мағаа андада. – Постарының кӧгенектерін Хурағанның ханында чууп, оларны ағартып алғаннар.

¹⁵ Аннаңар олар, амды Худайның ӱлгӱ сіреезінің алнында турып, Аның храмында хараа-кӱнӧрте пазырчалар. Ӱлгӱ сіреезінде одырчатхан Худай оларнаң хада полар.

^16-17 Ӱлгӱ сіреезінің ортызында турчатхан Хураған, оларны хадарып, тіріг хара суғзар ал чӧрер. Аннаңар олар паза ӧзӧкпестер, сухсабастар, кӱн паза хайдағ даа ізіглер оларны ӧртебестер. Худай, тізең, оларның полған на харах чазын чызыбыс турар.