Азых чоох 5 - Наа Молҷағ

Пічік паза Хураған

¹ Анаң мин ӱлгӱ сіреезінде одырчатхан Худайның оң холында ікі саринаң пазыл парған паза читі таңманаң чаба пазылған пічікті кӧр салғам.

² Мин кӱстіг ангелні кӧр салғам. Ол хысхырып сурған: – Кем, пу таңмаларны суурып, пу пічікті азыбызарға турыстығ?

³ Че тигірде дее, чир ӱстӱнде дее, чир алтында даа, ол пічікті азып, аның істінзер кӧрібізер кізі табылбаан.

⁴ Ол пічікті азып, анда пазылған нимені хығырарға турыстығ кізі табылбаанына мин тың ылғаам.

⁵ Андада ах сағалларның пірсі мағаа теен: – Ылғаба! Кӧр, Иуданың сӧӧгіне кірчеткен Давидтің тӧлінең сыххан ала парыс чиңіс тутты. Аның, читі таңманы суурып, пу пічікті азар ӱлгӱзі пар.

⁶ Андада мин ӱлгӱ сіреезінің ортызында турчатхан Хурағанны кӧр салғам. Ол тайыға соғылған малға тӧӧй полған. Ол пайаағы тӧрт аңның паза ах сағалларның аразында турған. Хурағанның читі мӱӱзі паза читі харағы пар полған. Ол харахтар Худайның прай чир ӱстӱне ызылған читі худы полған.

⁷ Хураған, пас парып, ӱлгӱ сіреезінде одырчатхан Худайның оң холынаң пічікті алып алған.

⁸ Ол аны алып алғанда, тӧрт аң паза чибіргі тӧрт ах сағал Хурағанның алнында тӱңдере тӱскеннер. Оларның полғанының на холында хомыс паза тадылығ чыстығ оттығ алтын чірче полған. Ол тадылығ чыстығ оттар ах-арығ кізілернің Худайны сабландырчатхан сӧстернең пазырғанын таныхтапчалар.

⁹ Олар, Аны махтап, наа сарын сарнап сыхханнар: – Син тайыға салылғазың, Син пісті Позыңның ханыңнаң полған на сӧӧктең, аймах тіллердең, аймах чоннардаң, аймах тӧллердең сыххан кізілерні Худайға, садып алып, пиргезің Аннаңар Син, пу пічікті алып, аның таңмаларын суурыбызарға турыстығзың!

¹⁰ Син пісті Худайның ханнары паза абыстары ит салғазың, Олар чир ӱстӱнде ӱлгӱ тударлар!

¹¹ Анаң мин ах сағалларның, пайаағы аңнарның паза ӱлгӱ сіреезінің ибіре кӧп ангеллерні кӧргем паза оларның ӱннерін искем. Ангеллернің саны нинҷе-нинҷе муң полған.

¹² Олар ӧтіг ӱннең чоохтанғаннар: – Тайыға соғылған Хураған ӱлгӱні, ис пайны, пілісті, кӱсті, аарласты, сабланысты паза алғасты алып аларға турыстығ!

¹³ Анаң мин тигірдегі, чир ӱстӱндегі, чир алтындағы паза талайдағы прай тіріг нимелернің хысхырысчатханнарын ис салғам: – Ӱлгӱ сіреезінде одырчатхан Худайға паза Хурағанға алғас, аарлас, сабланыс паза ӱлгӱ хаҷан даа ползын!

¹⁴ Анаң тӧрт аң теен: – Аминь! Ах сағаллар, тӱңдере тӱзіп, пазырғаннар.