Азых чоох 21 - Наа Молҷағ

Наа тигір паза наа чир

¹ Анаң мин наа тигірні паза наа чирні кӧр салғам. Алындағы тигір паза алындағы чир, тізең, чох пол парғаннар, талай даа паза чоғыл.

² Мин, Иоанн, тигірдең Худайдаң тӱсчеткенін, ызых саар, наа Иерусалимні, кӧр салғам.

³ Тигірдең ӧтіг тапсаан ӱнні ис салғам: – Мына Худайның одаа, Худай аны кізілер аразында турғыс салар. Анда Ол кізілернең хада чуртир. Ол кізілернің Худайы полар паза кізілер Аның чоннары поларлар.

⁴ Худай оларның полған на харах чазын чызыбызар. Алындағы прай нимелер ирт парғаннаңар, ӧлім дее, ылғас таа, сыхтас таа паза ағырығлар даа чох пол парарлар.

⁵ Ӱлгӱ сіреезінде одырчатхан Худай чоохтанған: – Мин прай наа нимелерні чайапчам! Анаң мағаа хосхан: – Пас сал! Пу сӧстер сын паза орта.

⁶ Анаң Ол мағаа теен: – Толдырыл парды! Мин Альфа паза Омега, Пасталғаны паза Тоозылғаны полчам! Сухсапчатхан кізее тіріг хара суғдаң тикке суғ пирербін.

⁷ Чиңіс тутхан кізі пу нимелерні алып алар. Мин аның Худайы поларбын, ол Минің оолғым полар.

⁸ Че хортыхтарға, киртініс чохтарға, чабал хылыхтығларға, кізі ӧдірчеткеннерге, оралысхахтарға, сыбырағҷыларға, сын нимес худайларға пазырчатханнарға паза прай чойларға кӧйчеткен сералығ кӧлде орын полар. Мынзы – ікінҷі ӧлім.

Наа Иерусалим

⁹ Халғанҷы читі чобағның читі айағын тутчатхан читі ангелнің пірсі, минзер пас киліп, теен: – Парааң, мин сағаа Хурағанның алчатхан хызын кӧзіт пирербін.

¹⁰ Анаң Худай Худының кӱзі мағаа тол парғанда, ол Хут мині илбек паза пӧзік тағ ӱстӱнзер апар салған. Апар салып, тигірдең, Худайдаң, тӱсчеткен ызых, илбек Иерусалим саарны кӧзіткен.

¹¹ Ол Худайның пызыңнапчатханына чараан, аның чарии, тізең, аарлығ тастар паза кристалл осхас яшма чіли сағылысханнар.

¹² Саарның ибіре он ікі хаалхалығ, улуғ паза пӧзік хана полған. Полған на хаалха хыринда ангел турған, ол хаалхаларда Израиль чонының он ікі тӧлінің аттары пазыл парғаннар.

¹³ Іскеркіде ӱс хаалха, алтынзархыда ӱс хаалха, ӱстӱнзархыда ӱс хаалха паза кидеркіде ӱс хаалха полған.

¹⁴ Саарның ханазы он ікі тӧстіктіг полған, ол тӧстіктерде Хурағанның он ікі илҷізінің аттары пазыл парған.

¹⁵ Миннең чоохтасхан ангелнің пу саарны, аның хаалхаларын паза ханаларын синеҷең алтын тайағы пар полған.

¹⁶ Саар тӧрт пулуңнығ полған, аның узуны паза чалбаа тиң полғаннар. Ангел тайағынаң саарны синебіскен. Аның узуны он ікі муң стадий полған. Саарның узуны, чалбаа паза пӧзии прай тиң полғаннар.

¹⁷ Ангел хананы синеен. Ол хананың чалбаа, кізі синінең саназа, 144 сығанахча чалбах полған. Ангел ол синнең тузаланған.

¹⁸ Хана яшма тіп аарлығ таснаң, позы саар, тізең, сӱлейке осхас арығ алтыннаң пӱдірілген.

¹⁹ Саарның ханазының тӧстігі аймах аарлығ тастарнаң чазалған: пастағы тӧстігі – яшманаң, ікінҷізі – сапфирнең, ӱзінҷізі – халцедоннаң, тӧртінҷізі – изумруднаң,

²⁰ пизінҷізі – агатнаң, алтынҷызы – сердоликнең, читінҷізі – хризолитнең, сигізінҷізі – беррилнең, тоғызынҷызы – топазнаң, онынҷызы – хризопразнаң, он пірінҷізі – гиацинтнең, он ікінҷізі – аметистнең.

²¹ Он ікі хаалха – он ікі нинҷінең: полған на хаалха – алынҷа нинҷінең. Саарның ӧӧн орамы – сӱлейке осхас арығ алтыннаң.

²² Ӧӧркі Чайаачы, Прай нимедең кӱстіг Худай паза Хураған – Саарның храмы полчалар. Пасха храм мин кӧрбеем.

²³ Саарны Худайның сабланызы чарытчатханнаңар, ағаа кӱн дее, ай даа чарии кирек чоғыл. Аның чарытхызы, тізең, Хураған.

²⁴ Чоннар Аның чариинда чуртирлар, чир ӱстӱндегі ханнар, тізең, постарының прай аарлығ нимелерін андар ағыларлар.

²⁵ Кӱнӧрте саарның хаалхалары пір дее чабылбастар, хараа, тізең, анда полбас.

²⁶ Чоннарның прай ис-пайын паза сабланызын андар ағыл пирерлер.

²⁷ Пеер пір дее кірліг ниме паза пір дее уйадыстығ ниме итчеткен чой кізі кірбес. Пеер Хурағандағы чуртас пічиинде пазыл парған на кізілер кірерлер.