Азых чоох 20 - Наа Молҷағ

Пір муң чыл

¹ Мин тигірдең тӱсчеткен ангелні кӧр салғам. Аның холында тӱбі чох чирнің клӱзі паза чоон ілҷірбе полған.

² Ол ангел диавол паза сайтан полчатхан сыр чыланны, пурунғы чыланны, пір муң чылға ілҷірбее палғап салған.

³ Ол сыр чылан пір муң чыл ирткенҷе чоннарны паза алаахтыр полбазын тіп, ангел аны тӱбі чох чирзер кире тастабысхан. Аны андар чаап салып, таңма турғыс салған. Аның соонда аны ӱр нимеске позыдарға кирек полар.

⁴ Мин ӱлгӱ сіреелерін паза чарғылаҷаң ӱлгӱ пирілген кізілернің анда одырчатханнарын кӧр салғам. Олар, Иисустаңар паза Худай сӧзінеңер киречілееннері ӱчӱн, мойныларын ӱзе саптырған кізілернің хуттары полғаннар. Олар аңа паза аның омазына пазырбааннар, хамахтарына алай холларына аның таңмазын турғыстырбааннар. Олар тіріл килгеннер паза Христоснаң хада пір муң чыл ӱлгӱ тутханнар.

⁵ Ӧліглернің пасхалары, тізең, пір муң чыл иртпеенде, тірілбееннер. Мынзы, тізең, пастағы тіріліс.

⁶ Пастағы тірілісте чуртас алып алғаннары часкалығ паза ах-арығ поларлар. Ікінҷі ӧлім оларға пір дее ниме ит полбас. Андағлар Худайның паза Христостың абыстары поларлар паза Аннаң хада пір муң чыл ӱлгӱ тударлар.

Сайтанны чарғылааны

⁷ Пір муң чыл ирт парза, сайтанны пиктегдең позыдыбызарлар. Ол пазох чирнің тӧрт сариндағы чоннарны, Гог паза Магог чоннарын алаахтырарға паза оларны чааға чыырға сығар. Ол талай хазындағы хумның саны синінҷе чоннарны чыып алар.

⁸ Олар, чир чалбаана сығып, Худайның чонының турлаан паза Худайның хынчатхан саарын ибірібіскеннер.

⁹ Че ол туста чалыннығ от, тигірдең, Худайдаң, тӱзіп, оларны хырыбысхан.

¹⁰ Оларны алаахтырған сайтан кӧйчеткен сералығ кӧлзер тастатхан. Андарох аң паза чой ухаанҷы тастаттыртханнар. Анда олар хараа-кӱнӧрте хаҷан даа иреелен турарлар.

Халғанҷы чарғы

¹¹ Анаң мин ах ӧңніг илбек ӱлгӱ сіреезін паза анда одырчатхан Худайны кӧр салғам. Тигірнең чир Аннаң тискеннер. Оларға мында орын чох полған.

¹² Мин ӱлгӱ сіреезінің алнында турчатхан ӧл парған саблығ паза олаңай кізілерні кӧр салғам. Пічіктер азылғаннар. Анаң пасха пічік, чуртас пічии, азылған. Ӧліглер пічіктерде пазыл парған хоостыра постарының иткен киректері ӱчӱн чарғылатханнар.

¹³ Талай позындағы ӧліглерні пирібіскен, ӧлім паза Чир тӱбі постарының ӧліглерін ідӧк пирібіскеннер. Полғаны ла позының иткен киректері хоостыра чарғылатхан.

¹⁴ Анаң ӧлім паза Чир тӱбі кӧйчеткен кӧлзер тастатханнар. Кӧйчеткен кӧл – ол ікінҷі ӧлім.

¹⁵ Кемнің ады-солазы чуртас пічиинде пазылбаан полған, ол кӧйчеткен кӧлзер тастатхан.