Азых чоох 19 - Наа Молҷағ

Аллилуй! – Худайны сабландырыңар!

^1-2 Аның соонда мин тигірде уғаа кӧп чонның хысхырчатханына тӧӧй ӧтіг ӱнні ис салғам: – Хан Худайыбыстың чарғылары орта паза сын полчатханнаңар, Аллилуй! Ағаа арачыланыс, сабланыс, аарлас паза кӱс ползын. Ол чир ӱстӱн чӧреечі хылығынаң ардатхан уғаа чӧреечі ипчіні – саарны – чарғылаан. Худай Позының нымысчыларының ханы ӱчӱн аннаң ӧс алған.

³ Анаң пазох хысхырғаннар: – Аллилуй! Аның ызы хаҷан даа тохтабин кӧдірілче!

⁴ Андада чибіргі тӧрт ах сағал паза тӧрт аң, тӱңдере тӱзіп, ӱлгӱ сіреезінде одырчатхан Худайға пазырғаннар: – Аминь! Аллилуй!

Хурағанның тойы

⁵ Ӱлгӱ сіреезінең табыс истілген: – Худайның прай нымысчылары, прай Аны улуғлапчатханнар, саблығ паза олаңай кізілер, пістің Худайыбысты сабландырыңар!

⁶ Кӧп саннығ чонның табызы осхас, кӧп суғларның суулазы осхас, улуғ кӱгӱрттің табызы осхас ӱннің чоохтанчатханын ис салғам: – Аллилуй! Ӧӧркі Чайаачы, Прай нимедең кӱстіг Худай Хан полыбысты!

⁷ Хурағанның тойы чит килгеннеңер, ӧрінееңер паза кӧглееңер! Аны сабландырааңар! Аның алчатхан хызы чазан салды.

⁸ Ол хысха чарых паза арығ кӧгенек пирілген. (Андағ кӧгенек ах-арығ кізілернің орта киректерін таныхтапча!) –

⁹ Пас сал: Хурағанның тойына хығыртылғаннар часкалығлар! – теен мағаа ангел. – Пу Худайның сын сӧстері! – тіп хосхан соонаң.

¹⁰ Андада мин, аның азағына тӱзіп, ағаа пазырарға иткем, че ол мағаа теен: – Мыны идерге чарабас! Мин дее синӧк осхас паза Иисустың киречілері полчатхан харындастар осхас Худайның нымысчызыбын. Худайға пазыр! Ухаанҷылас худы Иисустаңар киречілес полча.

Ах аттығ чалаң

¹¹ Тигірнің азылчатханын кӧр салғам. Мына ах ат! Ағаа мӱн салған кізінің ады-солазы Сын паза Ізестіг полған. Ол сын чарғылапча паза чаа апарча.

¹² Аның харахтары кӧйчеткен чалын осхас полғаннар паза пазында кӧп короналар полған. Аның пазылған паза аннаң пасха пірдеезі пілбинчеткен ады-солазы пар полған.

¹³ Ол ханға ӧл пол парған кип-азахтығ полған паза Аның ады – «Худай Сӧзі».

¹⁴ Аның соонҷа ах аттығ, ах паза арығ кип-азахтығ тигір чааҷылары парғаннар.

¹⁵ Аның ахсынаң чоннарны хырҷаң чітіг хылыс сыхчатхан. Ол тимір тайахнаң чоннарны хадарча паза Прай нимедең кӱстіг Худайның тарыныс паза ӧкпеленіс арағазын сыға пасчаң сапчахты типсепче.

¹⁶ Аның кибінде паза пудында «Ханнарның Ханы паза пиглернің Пигі» тіп пазыл парған.

¹⁷ Кӱнде турчатхан пір ангелні кӧр салғам. Тигірҷе пӧзік учух чӧрчеткен прай хустарға ӧтіг ӱннең хысхырыбысхан: – Пеер учуғыңар! Худайның улуғ ас-тамахтығ тойына чыылыңар!

¹⁸ Сірер ханнарның, чааҷылар пастыхтарының паза чааҷыларның, аттарның паза чалаңнарның, прай пос чурттығларның паза хулларның, олаңай паза саблығ кізілернің ит-сӧӧктерін хахлирзар!

¹⁹ Анаң, Чалаңнаң паза Аның чааҷыларынаң чаалазарға тіп, аңның, чир ӱстӱндегі ханнарның паза оларның чааҷыларының чыылыс парғаннарын кӧр салғам.

²⁰ Анаң аң паза чой ухаанҷы туттыр салғаннар. Ол чой ухаанҷы, аңның алнында хайхастар идіп, аңның таңмазын турғыстырып алғаннарны паза аның омазына пазырғаннарны алаахтырған полған. Ол ікӧлең кӧйчеткен сералығ кӧлзер тірігеӧк тастатхан.

²¹ Чааҷылары, тізең, ах аттығ Чалаңның ахсынаң сыхчатхан хылысха хырдырғаннар. Прай хустар, оларның ит-сӧӧктерін хахлап, тосханнар.