Азых чоох 18 - Наа Молҷағ

Вавилонның иңзерілгені

¹ Аның соонда тигірдең тӱсчеткен пазох пір ангелні кӧр салғам. Ағаа илбек ӱлгӱ пирілген полған, прай чир ӱстӱ аның сабланызы пызыңнаанына чараан.

² Ол тың ӧтіг ӱннең хысхырған: – Иңзерілді! Иңзерілді Вавилон – илбек саар! Ол айналарның чурты, полған на чабал хуттың турлаа, полған на кірліг, чіксістіг хустың уйазы. Ол позының хатығ суғдыр арағазынаң прай чоннарны суғар салған.

³ Чир ӱстӱндегі ханнар аннаң оралысханнар паза аның илбек пайына чир ӱстӱндегі садығҷылар пайааннар.

⁴ Анаң мин тигірзертін пасхох ӱнні ис салғам: – Чоным минің, пу саарның чазых чуртазына араласпас ӱчӱн, аннаң хада чобағларға кірбес ӱчӱн, аннаң сығыбыс.

⁵ Аның чазыхтары тигірге теере ӱӱл парғаннар, Худай, тізең, аның сайбағларын сағыста тутхан.

⁶ Нинҷе ол саар сірерге пирген, анҷох ағаа читір пиріңер! Аның киректері ӱчӱн ікі хати артых читір пиріңер! Ол сірерге тимнеен чірчее ікі хати хатығ араға ағаа ур пиріңер!

⁷ Нинҷе ол позы чырғаан паза сабланған, анҷох чобағ паза ирее ағаа читір пиріңер. Ол позының істінде махтанча: «Хан ипчі полып одырчам, ӧкіс ипчі нимеспін, чобағ кӧрбеспін!»

⁸ Аны чарғылапчатхан Хан Худай кӱстігдеңер, ағаа пір кӱннің аразында ӧлім, сыхтас, ӧзӧгіс чиде тӱзер, позы, тізең, ӧртте кӧйер, – теен ол ӱн.

⁹ Аннаң хада оралызып паза чырғап чуртаан чир ӱстӱндегі ханнар, аның, кӧйіп, ысталчатханын кӧріп, ағаа ылғазып, сыхтазарлар.

¹⁰ Олар, аның ирееленчеткенінең хорығып, оортахта турып, ылғазарлар: «Хыйал, хыйал сағаа, илбек Вавилон, пик паза пай саар! Пір ле час аразына сағаа чарғы чит килді!»

¹¹ Чир ӱстӱндегі садығҷыларның ниме-нооларын пірдеезі паза садызып албинчатханнаңар, олар ол саарға, ылғап, сыхтазарлар.

¹² Оларның алтыннарын, кӱмӱстерін, аарлығ тастарын, нинҷілерін, аймах аарлығ истерін паза торғыларын, аймах тадылығ чыстығ ағастарын, слон сӧӧгінең иткен полған на ниме-нооны, аарлығ ағастаң, чистең, тимірдең паза мрамордаң иткен аймах ниме-нооларын,

¹³ корицаларын, фимиамнарын, мироларын, ладаннарын, арағаларын паза олива хайахтарын, уннарын, пуғдайларын, малларын, хойларын, аттарын, ікі тегілектіг хаңааларын, хулларын паза чаада холға кір парғаннарны пірдеезі паза албинча.

¹⁴ Олар саарға тіпчелер: – Син хынчатхан нимелер паза чоғыллар. Синің прай пайың паза сабланызың синнең хыйа парыбысханнар. Син оларны паза таппассың.

¹⁵ Прай пу нимелерні сатхан паза аның сылтаанда пайаан садығҷылар, саарның ирееленчеткенінең хорығып, ырахта турып, ылғап, сыхтазарлар: –

¹⁶ Хыйал, хыйал, аарлығ кип-азахтығ, алтыннаң, аарлығ тастарнаң паза нинҷілернең чазанған илбек саарға!

¹⁷ Пір ле час аразына мындағ пай ниме чох пол парды. Прай керіптернің устағҷылары, прай керіптерде чӱс чӧрчеткеннер, прай талайҷылар паза талайда садығ итчеткеннер ырахтаң кӧр турғаннар.

¹⁸ Аның кӧйчеткен ызын кӧріп, олар хысхырысханнар: – Пу илбек саарға тӧӧй саар паза пар ба ни?

¹⁹ Олар пастарына кӱл тоолатханнар паза, ылғап-сыхтап, хысхырғаннар: – Хыйал, хыйал сағаа, илбек саар, прай керіптіг кізілер синің аарлығ ниме-нооларыңа пайааннар! Пір ле час аразына син ээн халдың!

²⁰ Пу саарның ӧлгеніне ӧрініңер тигірдегілер, Худайның илҷілері, ухаанҷылар! Ол саар сірерге хомай иткен ӱчӱн, Худай ағаа чарғызын читірді!

²¹ Пір кӱстіг ангел, улуғ теербен тазы синҷе тасты хаап, талайзар тастап, теен: – Мындағох кӱснең тасталар илбек Вавилон саар паза аны пірдеезі кӧр таппас.

²² Хомыста ойнапчатханнар, сарнапчатханнар, хобырах паза пырғы тартчатханнар синде паза хаҷан даа истілбестер. Ус чон паза оларның иткен нимелері хаҷан даа синде полбастар, теербен тартханнары даа истілбес.

²³ Синің садығҷыларың чир ӱстӱнің пиглері полғаннар. Прай чоннар синің хайхастығ нимелеріңе чӧндірткеннер, аннаңар синде, илбек саар, чарытхыларның чарыпчатханы паза кӧрінмес, хоных хончатхан чииттернің ӱннері паза истілбес.

²⁴ Ӧдірткен ухаанҷыларның, ах-арығларның паза прай чир ӱстӱндегілернің тӧгілген ханы пу саарда табылған.