Азых чоох 17 - Наа Молҷағ

Вавилонға чарғы тӱскені

¹ Холларында айах тудын салған читі ангелнің пірсі, минзер пас киліп, чоохтанған: – Кил пеер, кӧп суғлар аразындағы саарның, «уғаа чӧреечі ипчінің», чарғыладарын кӧзіт пирербін сағаа.

² Чир ӱстӱндегі ханнар ол ипчінең оралысханнар паза аның оралысхах арағазын чир ӱстӱнде чуртапчатхан кізілер чоо іскеннер.

³ Анаң, Худай Худының кӱзі мағаа тол парғанда, ангел мині хуу чазызар апарған. Анда мин хып-хызыл аң ӱстӱнде одырчатхан ипчіні кӧр салғам. Ол аңның ӱстӱнде Худайны сӧклепчеткен аттар толдыра пазыл партырлар, ол аң читі пастығ паза он мӱӱстіг полған.

⁴ Ипчі аарлығ хып-хызыл кип-азахтығ полған паза аарлығ тастарнаң, алтыннаң, нинҷінең чазан салтыр. Аның холында чиркестіг паза чӧреечі тудынғанының кірінең толдырылған алтын чірче полған.

⁵ Ипчінің хамағында чазыт ады-солазы пазыл партыр: «Илбек Вавилон – оралысхах ипчілернің паза чирдегі прай чиркестіг нимелернің инезі».

⁶ Ол ипчі ах-арығ кізілернің паза Иисустың киречілерінің ханын чоо ізініп алған. Мин, ол ипчіні кӧр салып, уғаа таңнаам.

⁷ Ангел мағаа теен: – Нимее син таңнапчазың? Мин сағаа пу ипчінің паза одырчатхан читі пастығ, он мӱӱстіг аңның чазыдын чоохтап пирербін.

⁸ Син кӧрген аң тіріг полған, амды, тізең, ол чоғыл. Тӱрче полза, ол, тӱбі чох чирдең сых киліп, ӧлімге парар. Чир ӱстӱ чайалғандох, пазыл парған чуртас пічиине ады-солалары кірбеен кізілер, аңны кӧр салып, хайхап парарлар. Ол аң тіріг полған, анаң чох пол парған, анаң хатабох сых килер.

⁹ Мынзы пілісті паза хыйға сағысты кирексіпче. Читі пас ол ипчі одырчатхан читі тӧң полча.

¹⁰ Оларох читі хан полча. Оларның пизі чат халған, пірсі ам даа ӱлгӱде одырча, паза пірсі, тізең, ам даа килгелек, килзе дее, ӱрге килбес.

¹¹ Хаҷан-да тіріг полған, амды, тізең, чох пол парған аң читі ханнаң сыххан сигізінҷізі полча. Ол ӧлімге парар.

¹² Син кӧрген он мӱӱс постарының ӱлгӱлерін алғалах он хан полча. Че олар аңнаң хада хан-ӱлгӱзін пір часха аларлар.

¹³ Олар, пір пӧгінніг полып, постарының кӱзін, ӱлгӱзін аңа пирібізерлер.

¹⁴ Олар Хурағаннаң чаалазарлар, че Хураған оларны утып алар. Ол пиглернің Пигі, ханнарның Ханы полча нооза. Аның хығырған паза таллап алған сын чӱректіг кізілері аннаң хадалар.

¹⁵ Анаң ангел мағаа теен: – Син чӧреечі ипчі одырчатхан суғларны кӧргезің. Ол суғлар чир ӱстӱндегі кізілер, чоннар, сӧӧктер паза аймах тіллер полчалар.

¹⁶ Син кӧрген аңның он мӱӱзі чӧреечі ипчіні хырт кӧрер. Аны ӱредер, хуба чалаас артызар, аның ит-сӧӧгін, чіп, отта ӧртир.

¹⁷ Худай Позының кӧңнін, пір ле кӧңнін толдырар сағысты оларның чӱректеріне салған. Худайның сӧзі толғанҷа, олар ханның ӱлгӱзін аңа пирібізерге кирек полғаннар.

¹⁸ Син кӧрген ипчі, тізең, чир ӱстӱндегі ханнарның ханы полчатхан илбек саар.