Азых чоох 16 - Наа Молҷағ

Худайның читі айахтағы ӧкпеленізінің тӧгілгені

¹ Парып, Худайның читі айахтағы ӧкпеленізін чир ӱстӱне тӧгібізіңер! – тіп, читі ангелге храмнаң чоохтанчатхан ӧтіг ӱнні ис салғам.

² Пастағы ангел, парып, айағындағы нимені чир ӱстӱне тӧгібіскен. Тӧгібіскендӧк, аңның таңмазын ал чӧрчеткен паза аның омазына пазырчатхан кізілернің идінде уғаа чабал паза іріңніг палығлар сыххлап килгеннер.

³ Ікінҷі ангел айағындағы нимені талайзар тӧгібіскен. Тӧгібіскендӧк, талайдағы суғ ӧліг кізінің ханы осхас пол парыбысхан. Талайдағы прай тіріг ниме ӧл парған.

⁴ Ӱзінҷі ангел айағындағы нимені ахчатхан суғларзар паза хара суғларзар тӧгібіскен. Тӧгібіскендӧк, суғлар даа хан пол парғаннар.

⁵ Суғларның ангелінің чоохтанғанын ис салғам: – Син полған, полчатхан ах-арығ Хан Худайзың! Кізілерні піди чарғылааның орта.

⁶ Ах-арығ кізілернің паза ухаанҷыларның ханын тӧккеннері ӱчӱн, Син оларға хан ізерге пиргезің. Олар ағаа турыстығлар.

⁷ Тайығ салҷаң орыннаң чоохтанған ӱнні ис салғам: – Йа, ӧӧркі Чайаачы, прай нимедең кӱстіг Худай, Синің чарғыларың орта паза сын!

⁸ Тӧртінҷі ангел айағындағы нимені кӱнзер тӧгібіскен. Кӱнге кізілерні ӧртир ӱлгӱ пирілген.

⁹ Кізілерні сыдасча чох ізіг ӧртеен. Олар, тізең, Худайны сабландырар паза пыросынар орнына, пу чобағларны ысчатхан Худайны харғааннар.

¹⁰ Пизінҷі ангел айағындағы нимені аңның ӱлгӱ сіреезіне тӧгібіскен. Ол аңның чирінде харасхы пол чӧрібіскен. Кізілер, ағырығларына сыдаспин, тіллерін ызырынғаннар.

¹¹ Олар тигірдегі Худайны постарының ирееленістері паза палығлары ӱчӱн харғааннар, че постарының чабал киректерін тастабааннар.

¹² Алтынҷы ангел айағындағы нимені илбек Евфрат суғзар тӧгібіскен. Тӧгібіскендӧк, іскеркідегі ханнарға хуруғ чирҷе чол азылзын тіп, ол суғ соол парған.

¹³ Анаң мин сыр чыланның ахсынаң, аңның ахсынаң паза чой ухаанҷы аңның ахсынаң ходырлығ пағаларға тӧӧй ӱс чабал хуттың сых килгенін кӧр салғам.

¹⁴ Олар – танығлар кӧзітчеткен айналарның хуттары. Хуттар, Прай нимедең кӱстіг Худайның илбек кӱнінде полар чааға чир ӱстӱндегі прай ханнарны чыып аларға тіп, ханнарзар парчалар.

¹⁵ «Мына мин, оғыр чіли, кинетін килербін. Чалаас чӧрбес паза уйатха кірбес ӱчӱн, узубинчатхан паза постарының кип-азахтарын тимде тутчатхан кізілер часкалығлар», – тіпче Иисус.

¹⁶ Ол хуттар прай ханнарны еврей тілінде Армагеддон тіп адалчатхан орынға чыып алғаннар.

¹⁷ Читінҷі ангел айағындағы нимені киизер тӧгібіскен. Тигірдегі храмның ӱлгӱ сіреезінең ӧтіг ӱн истілген: – Толдырыл парды!

¹⁸ Сах андох тигір чалынни тӱскен, кӱгӱрт кӱзӱреен паза табыстар истіле тӱскеннер. Чир уғаа тың тітіреп сыххан. Кізілер чир ӱстӱнде чуртааннаң сығара, чир пір дее іди тітіребеен полған. Уғаа тың тітіреп сыххан! Уғаа илбек тітірес!

¹⁹ Чирнің тітірееніне илбек саар ӱс чара чарыл парыбысхан, прай чоннарның саарлары иңзерілгеннер. Худай илбек Вавилонны даа ундутпаан, тарыныс айағындағы ӧкпеленіс арағазын ағаа ізірткен.

²⁰ Прай олтырыхтар чіт парғаннар, тағлар даа чох пол парғаннар.

²¹ Кізілернің ӱстӱне тигірдең илбек миндір чаап сыххан. Оларның полғаны пір талант азыра полған полар. Миндірдең тӱскен чобағлар ӱчӱн кізілер Худайны харғааннар. Ол чобағлар хара хорғыстығ полғаннар.