Азых чоох 15 - Наа Молҷағ

Читі айах

¹ Мин тигірде пасхох илбек паза хайхастығ танығ кӧр салғам: халғанҷы читі чобағны тутчатхан читі ангелні. Худайның ӧкпеленізі тоозылчатханнаңар, олар халғанҷы чобағ полғаннар.

² Ідӧк мин чалыннығ отнаң поралас парған сӱлейке талай осхас ниме кӧр салғам. Ол сӱлейке талайның хазында аңны, аның хоостал парған омазын паза аның ады-солазын таныхтапчатхан санны кізілер чиңіп алғаннар. Олар, Худайның хомыстарын тудынып алып, турчалар.

³ Олар Худай нымысчызы Моисейнің паза Хурағанның сарынын сарнапчалар: – Илбек паза хайхастығ Синің иткен киректерің, ӧӧркі Чайаачы, Прай нимедең кӱстіг Худай! Син Ах-арығ кізілеріңнің Ханы! Синің чолларың орта паза сын!

⁴ Хан Худай, Син не чалғыс ах-арығзың, Сині аарлабаан паза Сині саблабаан кізі пар ба ни? Синің чарғыларың азылғаннаңар, Прай чоннар, киліп, Сағаа пазырарлар.

⁵ Аның соонаң мин тигірде храмның ызых отағының азыл парғанын кӧр салғам.

⁶ Читі чобағны ағылчатхан читі ангел храмнаң сых килген. Олар арығ паза аппағас кип-азахтығ паза иңнілерінең кӧксілерінҷе кірести хурчан салған алтын хурлығ полғаннар.

⁷ Анаң тӧрт аңның пірсі читі ангелге читі алтын айах пирглебіскен. Ол айахтарда хаҷан даа тіріг Худайның ӧкпеленізі полған.

⁸ Храмға Худайның сабланызының паза кӱзінің ызы тол чӧрібіскен. Аның істінзер читі ангелнің читі чобаа, тарап, тоозылбаанда, пірдеезі кір полбинчатхан.