Азых чоох 14 - Наа Молҷағ

Сион тағдағы сарын

¹ Мында мин Хурағанның Сион тағда турчатханын кӧр салғам. Аннаң хада 144 муң кізі полған. Оларның хамахтарында Хурағанның паза аның Пабазының аттары пазыл парған полғаннар.

² Мин кӧп суғлар ахчатхан паза кӱгӱрт кӱзӱрепчеткен осхас ӱнні тигірдең ис салғам. Ідӧк ол ӱн хомыстар хахчатхан кізілернің ӱннеріне тӧӧй полған.

³ Олар ӱлгӱ сіреезінің, тӧрт аңның паза ах сағалларның алнында наа сарынны сарнапчатханнар. Пу сарынны прай чоннардаң толығ тӧлеп алылған 144 муң кізідең пасха пірдеезі сарнап полбаан.

⁴ Олар постарының чуртастарында, ипчілернең чӧрбин, арығ чуртааннар. Олар, Хураған хайдар парза, андар Аның соонҷа чӧргеннер, Худайның паза Хурағанның тун палалары полып, чирдең толығ тӧлеп алылғаннар.

⁵ Худайның кӧзіне оларның чоохтарында пір дее чой ниме чох полған, паза олар ах сағыстығ полғаннар.

Ӱс ангел

⁶ Анаң мин, прай чир ӱстӱндегі кізілерге, полған на сӧӧкке, полған на тӧлге, полған на тілге, полған на чонға, хаҷан даа сын Чахсы Хабарны искірерге тіп, тигірҷе пӧзік учухчатхан пасхох ангелні кӧр салғам.

⁷ Ол ӧтіг ӱннең хысхырған: – Худайның чарғы итчең тузы чит килгеннеңер, Худайны аарлаңар паза сабландырыңар! Тигірні, чирні, талайны паза хара суғларны чайап салған Худайға пазырыңар!

⁸ Аның соонҷа ікінҷі ангел учуххан. Ол хысхырған: – Иңзерілген! Иңзерілген илбек Вавилон саар! Ол позының хазыр, чӧреечі, хызыл арағазынаң прай чоннарны суғар салған.

⁹ Оларның соонҷа ӱзінҷі ангел учуххан. Ол тың хысхырған: – Кем талайдаң сыххан аңа паза хоосталған омазына пазырча, паза кем позының холына алай хамағына аның таңмазын турғыстырып алча,

¹⁰ ол тарығыс, хазыр, хызыл арағаны ізер. Ол араға Худайның ӧкпеленіс чірчезіне урылған полған. Аны іскен кізі ах-арығ ангеллернің паза Хурағанның кӧзіне кӧйчеткен серада иреелееннер.

¹¹ Аңа паза аның хоосталған омазына пазырған, ідӧк аның адының таңмазын турғыстырып алған кізілер хараа-кӱнӧрте амыр чуртас пілбестер, паза оларны иреелепчеткен оттың ыстары нинҷе-нинҷе чӱс чылға кӧдіріл турар.

¹² Ах-арығлар, Худайның чахығларын толдырчатханнар паза Иисустың ізестіг кізілері сыдазарға киректер.

¹³ Анаң тигірдең чоохтанған ӱнні ис салғам: – «Амғы тустаң сығара, Хан Худайға киртініп, ӧлім алчатханнар часкалығлар» тіп, пас сал. – Йа, – тіпче Худай Худы, – олар постарының аар тоғыстарынаң тынанарлар, оларның киректеріне паалағ полар.

Чирдегі асты кискені

¹⁴ Мин алнымда ах пулутты кӧр салғам. Ол пулутта Кізі Оолғына тӧӧй Кем-де одырған. Аның пазында алтын венок полған, холында, тізең, чітіг орғах тутхан.

¹⁵ Анаң тигірдегі храмнаң пазох пір ангел, сых киліп, пулутта Одырчатханға хысхырған: – Чирдегі тамах пыс парып, тамах кизер тус чит килгеннеңер, орғағыңны алып, тамах кизерін паста!

¹⁶ Аны истіп, пулутта Одырчатханы, чир ӱстӱнҷе орғағынаң саап, тамахты кизібіскен.

¹⁷ Анаң тигірдегі храмнаң пасхох ангел сых килген. Аның холында чітіг пычах полған.

¹⁸ Анаң чалыннығ оттың ээзі полчатхан ангел тайығ салҷаң орыннаң сых килген. Ол ангел чітіг пычахтығ ангелге хысхырған: – Чирдегі виноградтарның чистектері пыс парғаннаңар, чітіг пычағың алып, оларны кизібіс.

¹⁹ Ангел, пычағынаң чир ӱстӱнҷе саап, виноградты кизібіскен. Аны кизе саап, виноград сӱзӱнін сығара пасчаң улуғ сапчахсар тастабысхан. Ол Худайның ӧкпеленізінің сапчағы полған.

²⁰ Виноград саар тастындағы сапчахта сыға пазылған. Сыға пазылған хан, сапчахтаң азыра ағып, 1600 стадийҷе чайылған паза тирее аттың чӱгеніне читіре кӧдірілген.