1 Иоанның 5 - Наа Молҷағ

Худай Оолғына киртініс

¹ Иисустың Мессий Арачылағҷы полчатханына киртінчеткен полған на кізі Худайдаң тӧреен. Пабаа хынчатхан полған на кізі, тізең, пабаның тӧріткен палазына даа хынча.

² Худай палаларына хынчатханыбысты хайди піліп алчабыс? Худайға хынып, Аның чахығларын толдырып, пілчебіс.

³ Худайның чахығларын толдырчатханыбыс Ағаа хынчатханыбысты таныхтапча. Аның чахығларын толдырарға, тізең, тың аар нимес.

⁴ Худайдаң тӧреен кізі Худайға тоғырланчатхан чир ӱстӱнің кӱзін чиңіп аладыр. Чир ӱстӱндегі кӱсті чиңен кӱс – пістің киртінізібіс.

⁵ Кем чир ӱстӱндегі кӱсті чиңен? Иисустың Худай Оолғы полчатханына киртінчеткен кізі!

⁶ Иисус Христос суғнаң кіреске тӱскен, ӧлімнең иртіп, тізең, пісті чазыхтарыбыстаң арығлаан. Ол суғдаң на иртпеен, че суғдаң паза ӧлімнең ирткен. Анзынаңар Худайның Худы киречілепче. Хут, тізең, хаҷан даа сын нооза.

⁷ Тигірде ӱс киречі пар: Паба, Сӧс паза Худайның Худы. Олар ӱзӧлең пір осхастар.

⁸ Чир ӱстӱнде ӱс киречі пар: Хут, суғ паза хан. Олар прайзы пір нимені киречілепчелер.

⁹ Піс кізілернің киречілееніне киртінчебіс, че Худайның киречілеені хай-хай улуғ. Худай Позы Оолғынаңар киречілепче нооза.

¹⁰ Худайның Оолғына киртінчеткен кізінің чӱреенде ол киречілес пар. Худайға киртінминчеткен кізі, тізең, Худайны чой тіп санапча. Худайның Оолғынаңар киречілееніне ол киртінминче нооза.

¹¹ Мына Аның киречілезі: Худай піске мӧгі чуртас пирген, ол чуртас, тізең, Аның Оолғынаң килче.

¹² Кемнің чӱреенде Худай Оолғы пар, ол андағ чуртастығ поладыр, че чӱреенде Худай Оолғы чох кізі ол чуртас чох поладыр.

Мӧгі чуртастығ полчатханнарыңны піліңер

¹³ Мин пу нимені сірерге, Худай Оолғына киртінчеткеннерге, мӧгі чуртастығ полчатханнарыңны пілзіннер тіп пас пирдім.

¹⁴ Піс Худайның кӧңніне кірчеткен нимелернің хайзын даа сурзабыс, Ол пісті исче. Аннаңар піс Худайдаң сурынарға туртухпинчабыс.

¹⁵ Хаҷан даа сурынзабыс, Аның прай сурыныстарыбысты исчеткенін пілчебіс; іди Худайдаң сурып алған нимені алып алчатханыбысты пілчебіс.

¹⁶ Кем харындазының чазых итчеткенін, че ол чазых ӧлімге апарбинчатханын кӧрчетсе, аның ӱчӱн Худайдаң алданзын. Худай, тізең, ағаа чуртас пирер. Сынап андағ чазых ӧлімге апарчатса, мин сірерге «Ол кізідеңер сурыныңар» тібинчем.

¹⁷ Полған на саба ниме – чазых, че пар ӧлімге апарбинчатхан чазыхтар.

¹⁸ Худайдаң тӧреен ноо даа кізі чазых итпинчеткенін пілчебіс. Худайдаң тӧреен кізі хайраллалча, сайтан, тізең, ағаа теңминче.

¹⁹ Худайни полчатханыбысты пілчебіс, тиксі-тилекейнің чабал кӱзі алтында полчатханын даа пілчебіс.

²⁰ Худай Оолғының, піссер киліп, сын Худайны піліп алар сағысты піске пиргенін пілчебіс. Піс сын Худайдабыс, Аның Оолғы Иисус Христостабыс. Ол – сын Худай паза мӧгі чуртас.

²¹ Палаларым! Постарыңны тайма худайлардаң хайраллаңар. Аминь.