1 Иоанның 4 - Наа Молҷағ

Ӱгретчілерні сыныхтаңар

¹ Хынғаннарым! Чир ӱстӱне кӧп чой ухаанҷылар тарап парған, аннаңар, урунған на кізее киртінмин, сыннаң оларның пастыра Худай Худы чоохтанча ба тіп, сыныхтап турыңар.

² Кізінің Худай Худынаң чоохтанчатханын хайди піліп аларға чарир? Иисус Христостың кізі полып килгенін позына чағын итчеткен кізі Худайдаң полар.

³ Иисус Христостың кізі полып килгенін позына чағын итпинчеткен кізі, тізең, Худайдаң нимес. Анда антихристтің худы. Антихристтің килерінеңер сірер искезер, сағам даа ол чир ӱстӱнде.

⁴ Палаларым! Сірер Худайдаңзар, сірерде полчатхан Худай Худы чир ӱстӱндегі хуттаң улуғ, аннаңар сірер чой ухаанҷыларны утып алғазар.

⁵ Олар чир ӱстӱндегілер, аннаңар чир ӱстӱндегілерӧк чіли чоохтанчалар, чир ӱстӱндегілер, тізең, оларны исчелер.

⁶ Піс Худайдаңмыс. Худайны пілчеткен кізі пісті исче, че кем Худайдаң нимес, ол пісті испинче. Мына піди піс сын Хутты паза тайма хутты піліп алчабыс.

Худайның хынызы

⁷ Хынғаннарым! Піске Худайдаң хыныс пирілген, аннаңар удур-тӧдір хынызааңар. Полған на хынчатхан кізі Худайдаң тӧреен паза Худайны пілче.

⁸ Худай – хыныс, аннаңар кем хын полбинча, ол Худайны пілбинче.

⁹ Худай піске хынчатханын хайди кӧзіткен? Ол Позының чалғыс Оолғын чир-чалбахтағыларзар ысхан, Анынаң пастыра піске чуртас пирер ӱчӱн ысхан.

¹⁰ Худайның хынызы хайдағ? Піс Худайға нимес, че Худай піске пурун хынған, Оолғын, тізең, пістің чазыхтарыбысты арығлаҷаң тайығ ползын тіп, чир-чалбахсар ысхан.

¹¹ Хынғаннарым! Сынап Худай піске іди хынғанда, піс тее удур-тӧдір хынызарға кирекпіс.

¹² Худайны пірдеезі хаҷан даа кӧрбеен, че сынап піс удур-тӧдір хынысчатсабыс, Худай пісте поладыр, пісте Аның хынызы пӧзиине чит парча.

¹³ Худайның пісте, позыбыс, тізең, Худайда полчатханыбысты хайди піліп алчабыс? Позының Худын піске пиргенінең пілчебіс.

¹⁴ Пабазы Оолғын чир ӱстӱндегі кізілерні арачылирға ысхан. Піс аны кӧргебіс, аннаңар киречілепчебіс.

¹⁵ Иисус – Худайның Оолғы тіп, ікінҷілебин чоохтанчатхан кізіде Худай полча, ол даа кізі Худайда полча.

¹⁶ Піс, Худайның піске хынчатханын піл салып, ол хынысха киртін сыххабыс. Худай – хыныс. Хыныста чуртапчатхан кізі Худайда, Худай даа ол кізіде поладыр.

¹⁷ Чарғы кӱнінде хорыхпас ползыннар тіп, хыныс пісте пӧзиине чит парған. Пістің дее чуртазыбыс пу чир ӱстӱнде Иисусти осхас нооза.

¹⁸ Хыныста хорыхчаң ниме чоғыл, пӧзиине чит парған хыныс хорығарын чох итче. Хорығары хатығлатханнаң килче, аннаңар хортых кізіде хыныс пӧзиине чит полбинча.

¹⁹ Пурун Худай піске хынған, аннаңар піс тее Ағаа хынчабыс.

²⁰ «Мин Худайға хынчам» тіпчеткен, че харындазын хырт кӧрчеткен кізі – чой. Харах кӧзіндегі харындазына хынминчатхан кізі кӧрінминчеткен Худайға хайди хынар.

²¹ Худай піске мындағ чахығ пирген: Худайға хынчатхан кізі позының харындазына даа хынзын.