1 Иоанның 3 - Наа Молҷағ

Худай палалары

¹ Кӧріңер зе! Худай Пабабыс піске хайди хынча! Пісті Худай палалары тіп адапча. Піс сыннаң даа Аның палаларыбыс. Чир-чалбахха хынчатхан кізілер, Худайны пілбееннеңер, пісті дее пілбинчелер.

² Хынғаннарым! Сағам даа піс Худай палаларыбыс, че хайдағ пол парарбыс, ам даа пілдістіг нимес. Пілдістіг пол парза, Иисус Христостың хайдағ полчатханын кӧріп, Олох осхас пол парарыбысты пілчебіс.

³ Пу нимее ізенчеткен полған на кізі позы даа Иисус Христос осхас ах-арығ полып одырча.

⁴ Чазых итчеткен кізі Худайның чахиин сайбапча. Чазых Худайның чахиин сайбааны полча.

⁵ Сірер пілчезер, Иисус Христос пістің чазыхтарыбысты позыдарға килген. Аның Позында пір дее чазых чоғыл.

⁶ Иисус Христосха киртінчеткен кізі чазых иде чоғыл. Чазых итчеткен кізі, тізең, Аны кӧрбеен дее, піліп албаан даа.

⁷ Палаларым! Сірерні пірдеезі хаңыртпазын. Иисус Христос чіли орта итчеткен кізі позы даа орта кізі.

⁸ Иң пурунғыдаң пеер сайтан чазых итче, аннаңар чазых итчеткен дее кізі сайтанның кізізі полча. Худай Оолғы сайтанның киректерін чох идерге килген.

⁹ Худайдаң тӧреен полған на кізі, чӱреенде Худайлығ полып, чазых иде чоғыл. Худайдаң тӧрееннеңер ол чазых ит полбинча.

¹⁰ Худайның палаларын паза сайтанның палаларын хайди пасхалидырлар? Орта итпинчеткен паза харындазына хынминчатхан кізі Худайдаң тӧрібеен.

Удур-тӧдір хынызааңар

¹¹ Сірер Иисус Христосха киртініп пастаан туста искен чахсы хабар мындағ: піс удур-тӧдір хынызарға кирекпіс.

¹² Піске Каин чіли полбасха кирек. Ол, сайтанның кізізі полып, позының харындазын ӧдір салған. Ноға ол аны ӧдір салған? Каиннің иткен киректері чабал полғаннар, харындазының, тізең, орта полғаннар.

¹³ Харындастар, сынап сірерні чир-чалбахтағы кізілер хырт кӧрчетселер, хайхабаңар.

¹⁴ Піс ӧліг нимеспіс, тірігбіс. Анзын піс харындастарыбысха хынчатханыбыстаң пілчебіс. Харындазына хынминчатхан кізі ӧлім холында полча.

¹⁵ Позының харындазын хырт кӧрчеткен кізі ӧдірігҷі полча. Андағ кізі мӧгі чуртастығ полбинчатханын сірер пілчезер.

¹⁶ Иисус Христос Позының тынын пістің арачыланып аларыбыс ӱчӱн пирібіскенде, хыныстың хайдағ полчатханын піліп алғабыс. Піс тее іди тыныбысты харындастарыбыс ӱчӱн пирерге кирекпіс.

¹⁷ Пай чуртапчатхан кізінің, харындазының хызылчатханын кӧре, чӱрее ағырбинчатса, ол кізіде Худайға хыныс полар ба?

¹⁸ Палаларым! Тілнең не, сӧснең не нимес, че киректерібіске тӧстенчеткен сын хыныснаң хынызааңар.

¹⁹ Піс, іди удур-тӧдір хыныссабыс, Сынға киртінчеткенібісті пілчебіс паза Худайның алнында чалтанмин турарбыс.

²⁰ Худай пісті позыбыстаң артых пілче, Ол прай ниме пілче. Аннаңар чӱреебіс чазых иткенібістеңер сизіндірзе дее, амыр поларбыс.

²¹ Хынғаннарым! Сынап чӱреебіс пісті пыролабинчатса, піс Худайдаң туртухпинчабыс.

²² Худайның чахығларын толдырчатханыбыс паза Аның кӧңніне кірчеткен нимелерні итчеткенібіс ӱчӱн, Худайдаң ниме дее сурзабыс, аны алчабыс.

²³ Худайның чахии мындағ: Аның Оолғына, Иисус Христосха, киртінері паза, хайди Иисус Христос піске чахаан, іди удур-тӧдір хынызары.

²⁴ Худайның чахығларын толдырчатхан кізі Худайда, Худай, тізең, ол кізіде поладыр. Худайның пісте полчатханын хайди пілчебіс? Худайның піске пирген Худай Худын алып алып, пілчебіс.