1 Иоанның 1 - Наа Молҷағ

Иисус Христос – чуртас пирчеткен Сӧс

¹ Чуртас пирчеткен Сӧстеңер сірерге пасчабыс. Ол чир чайалғалахтох пар полған, піс, тізең, Аны искебіс, харахтарыбыснаң кӧргебіс, кӧрглеп, холларыбыснаң теңебіс.

² Чуртас пирчеткен Сӧс іле сыхханда, піс Аны кӧргебіс. Кӧріп, Аннаңар киречілепчебіс. Пабабыснаң хада полған паза піске кӧрінген мӧгі чуртастаңар сірерге искірчебіс.

³ Піснең пір палғалыстығ поларларың ӱчӱн, сірерге позыбыстың кӧрген, искен нимелерібістеңер искірчебіс. Піснең палғалысханы, тізең, Пабанаң паза Аның Оолғы Иисус Христоснаң палғалысханы полча.

⁴ ӧріністерің толдыра ползын тіп, сірерге пу пічікті пасчабыс.

Чарыхта чӧріңер

⁵ Мына Иисус Христостаң искен паза аны сірерге искірчеткен чахсы хабар: «Худай – Чарых. Худайда пір дее харасхы чоғыл».

⁶ Худайнаң палғалызыбыс пар тіп чоохтанчатсабыс, че постарыбыс харасхыда чӧрчетсебіс, андада піс чойланчабыс паза сын ниме итпинчебіс.

⁷ Худай чарыхта чӧрчеткен чіли, піс тее чарыхта чӧрчетсебіс, андада прайзыбыс пір палғалыстығ пол парчабыс, Худай Оолғының Иисус Христостың ӧлімі, тізең, полған на чазыхтаң пісті арығлапча.

⁸ Пісте чазых чоғыл тіпчетсебіс, андада піс позыбысты алаахтырчабыс, паза пісте сын ниме чоғыл.

⁹ Чазыхтарыбыстаңар пыросынзабыс, Худай, Позының сӧзіне турыстығ полып, орта нимее хынып, піске чазыхтарыбысты позыдар паза ноо даа чой нимедең пісті арығлир.

¹⁰ Чазых итпеебіс тіп чоохтанчатсабыс, андада Худайны чойға санапчабыс, чӱреебісте, тізең, Аның сӧзі чох поладыр.