Rut 3 - Hdi

I Rut nda Bughaz ta blikwi

¹ Ma sana fitik, ka midza ni Naghumi nda Rut mantsa: « Makwa ɗa, nda ra ka psaghafta ɗa ta vli ŋa mbiʼapta gha ta vgha, ŋa nzata gha ɗina.

² Ndanana, huɗuhuɗa a mu a tsa Bughaz si kawadaga ka nda kurɗuha ni ya ra? Sna ɓa, wa a tsi ta blikwi ta viha urz ta na rviɗik na.

³ Mbazaghu mbaza gha ta mbaza, ka pghavata ka ta urdi, ka suɗavata ka ta lguta gha ya ɗina, ka laha ka ta blikwi. Ama yaha ka da maravata da tsi ha ka kɗiŋta ni ta zutá skwa zay nda skwa say.

⁴ Ma sliʼa ni da vəl hani ya, ka ɗatsafta ka ta vla hana ni. Ta hula tsa, ŋa tsatsafta gha ta vla fatá səla ni ka hanata ka. Dzaʼa mna gha mna ta skwi ŋa magay gha, » kaʼa.

⁵ Ka Rut nda tsi mantsa: « Dzaʼa magay yu ta inda skwi mniha ka, » kaʼa.

⁶ Ka laha tsi tama ta blikwi, ka magatá tsi manda va ya mnanaf midza ni.

⁷ Ka zuta Bughaz ta skwa zay, suha ta skwa say ni, ka rfu tsi ta rfu. Ka hanatá tsi ta slərpa ŋəzatá zimi. Ka kɗikadaghatá tsi, ka tsatsaftá vla səlaha ni ka hananavata.

⁸ Ma takala tama, ka guɗitsafta Bughaz, ka mbəɗavatá tsi, kəʼa kəʼa ná, wya marakw ta hani ta vata səla ni.

⁹ Kaʼa mantsa: « Wa kagha na? » kaʼa. Kaʼa mantsa: « Iʼi Rut, kurɗa gha ya, bukwanagha wa lguta gha ta kurɗa gha, kabga kagha mndu raŋ varay, » kaʼa.

¹⁰ Ka Bughaz mantsa: « Ka tfaghagha tfa Yawe ta wi makwa ɗa! Nana skwi maga ka na ná, maraŋ mara ta zɗaku ma kagha ka malaghutá ya taŋtaŋ, kabga ndinis a ka ta duhwalha dər má ka pɗu həŋ, dər má ka gadghəl a həŋ.

¹¹ Ndanana tama makwa ɗa, ma zləŋ ka ta zləŋ. Inda skwi ta mnə ka, dzaʼa maga gha maga yu, kabga inda mnduha da aŋni ná, nda sna həŋ ɗina kazlay marakw nda sgit tida ka kəʼa.

¹² Ndanana, kahwathwata na, nda nza yu ka mndu raŋ varay, ama mamu sana huɗuhuɗa mndu raŋ varay ka iʼi.

¹³ Hana tama hadna. Ga sərɗək ya, ka tsatsi dzaʼa varaghatá, varaghata ni. Ala ka vaʼa tsi ta varaghaghata wu, varaghaghata ɗa, ka yu ta taghaftá yu ta imi ta sləməŋ nda hga Yawe nda hafu mida! Hana hana ha ka tsaɗanata gha ta vli, » kaʼa.

¹⁴ Ka hananavatá tsi tama ta vata səla ni ha ga sərɗək. Ama ka sliʼaftá tsi ta kul laviŋtá lu ta tsəmaftá mndu. Ka Bughaz mantsa: « Yaha lu da snaŋta kazlay “sagha sa tsa marakw ya ta blikwi kəʼa!” » kaʼa.

¹⁵ Kaʼa mantsa: « Zlata zlata ta gela gha ka ŋanata ka ɗina, » kaʼa. Ka ŋanatá tsi. Ka kuranaftá Bughaz ta agwada urz mkuʼ ka fanaghatá tsi. Ka vraghuta Bughaz da luwa.

¹⁶ Ka vradaghatá Rut slanaghatá midza ni. Ka midza ni nda tsi mantsa: « Waká a magaku ní makwa ɗa? » kaʼa. Ka rusanaftá tsi ta inda skwi magana tsa mndu ya.

¹⁷ Kaʼa mantsa: « Tsatsi ta kliɗif ta na agwada urz mkuʼ na kazlay, “Waká ka dzaʼa lagha da midza gha nda dzvu bətbət na” kəʼa, » kaʼa.

¹⁸ Ka Naghumi mantsa: « Nza nza hadna makwa ɗa, ha ka snanata gha kinawu kəʼa dzaʼa kɗavakta. Haɗ ghəŋa ni dzaʼa hanata, ka ta kɗiŋ a tsi ta tsa gwaɗa ya gita gita wu, » kaʼa.