Nəhemiya 3 - Hdi

Bəgəltá muhul Ursalima

¹ Ka zlrafta Ilyasiv, mali ta ghəŋa gwal dra skwi ŋa Lazglafta nda mnduha ni gwal ta dra skwi ŋa Lazglafta ta maga slna. Ka bəglaftá həŋ kawadaga ta wa tgha Tuwakha. Ka fanamtá həŋ ma dzvu ta Lazglafta, ka pghuŋtá həŋ ta parawalha. Ka payaftá həŋ ta matsak dikw ta dzuguvi nda slra ta hgə lu ka Dərmək ya, ka fanamtá həŋ ma dzvu ta Lazglafta, ka kɗaŋtá həŋ ta fanamtá dikw ta dzuguva Hananiyel da slra ya.

² Ka bəglaftá la Yeriku ta ŋa taŋ ndusa nda həŋ, ka bə Zakur zwaŋa Imri guli ta ŋa ni ndusa nda la Yeriku.

³ Ka bəglaftá la Sənaʼa ta wa tgha Klipi. Ka tsaftá həŋ ta dzaʼuwaha ni, ka pghuŋtá həŋ ta parawalha ni nda sandlaŋha kfur ni ŋa ŋanata, nda ya ŋa ŋərzlay.

⁴ Ka payə Məreymut, zwaŋa Uriya, zwaŋa Hakuts ta ŋa ni ndusa nda həŋ. Ka payə Məsulam, zwaŋa Berehiya, zwaŋa Mesezavʼel guli ta ŋa ni. Ka payə Tsaduk zwaŋa Baghana guli ta ŋa ni.

⁵ Ka payə la Tekuwa guli ta ŋa taŋ ndusa nda həŋ, ama ka kwalaghuta gwal dagala dagala mataba taŋ ta maga slna ta mnanata maliha taŋ ta həŋ.

⁶ Ka payə i Yuyada zwaŋa Paseʼa, nda Məsulam zwaŋa Besudiya ta Halata wa tgha luwa. Ka tsaftá həŋ ta dzaʼuwaha ni, pghuŋha həŋ ta parawalha ni, nda sandlaŋha kfur ni ŋa ŋanata, nda ya ŋa ŋərzlay.

⁷ Ndusa nda həŋ guli ná, ka payə i Melatiya la Givghuŋ, nda Yaduŋ la Merunut, nda sanlaha ma la Givghuŋ, nda Mitspa, gwal ta ksanata slna ta guvna nda ta ɓla ghwa təv dɗakwa fitik, ta ŋa taŋ.

⁸ Ndusa nda həŋ guli, ka payə Ghuziʼel zwaŋa Haraya mnda slara dasu ta ŋa ni. Ndusa nda tsatsi guli ka payə Hananiya mnda maga urdi, ta ŋa ni. Ka vraghutá həŋ nda slna taŋ ma Ursalima laghər həŋ da vla Bughwata matsak.

⁹ Ndusa nda tsaha ya guli ka payə Rfaya zwaŋa Hur, mali ta ghəŋa rita kwakwara Ursalima, ta ŋa ni.

¹⁰ Ndusa nda tsatsi guli, ka payə Yədaya zwaŋa Harumaf, ta ŋa ni ma vli ya mbəŋ ya mbəŋ ya nda həga ni. Ndusa nda tsatsi, ka payə Hatus zwaŋa Hasabniya ta ŋa ni guli.

¹¹ Ta vata tsatsi guli, ka payə Malkiya zwaŋa Harim, nda Hasuv zwaŋa Pahatmuwav ta sana fawaya matsak nda sana dzuguvi nda slra ta hgə lu ka Uvunha.

¹² Ta vata tsatsi guli ka payə Salum zwaŋa Halluhes, mali ta ghəŋa rita kwakwara Ursalima ta ŋa ni kawadaga nda kwagha ni.

¹³ Ka payə i Hanuŋ nda la Zanuwah ta wa tgha didiŋa. Tahula bəglafta taŋ, ka pghuŋtá həŋ ta parawalha ni, nda sandlaŋha kfur ni ŋa ŋanata nda ya ŋa ŋərzlay. Ka bəglaftá həŋ guli ta matsak ka mitər hutaf dərmək, ka ɓhadanaghata ta wa tgha Maghdzək.

¹⁴ Ka payaftá Malkiya zwaŋa Rehav, mali ta ghəŋa kwakwara Bethakkerem ta wa tgha Maghdzək. Bəglafta ni, ka fuŋtá tsi ta parawalha ni nda sandlaŋha kfur ni ŋa ŋanata nda ya ŋa ŋərzlay.

¹⁵ Ka payaftá Salluŋ zwaŋa Kulhuze, mali ta ghəŋa kwakwara Mitspa ta wa tgha Dzuɓay. Bəglafta ni, ka mbsaftá tsi, ka pghuŋtá parawalha ni nda sandlaŋha kfur ni ŋa ŋanata nda ya ŋa ŋərzlay. Ka bəglaftá tsi guli ta matsaka ghwa Selah, ma takataka kawgala mgham nda kalam ta saha ma Luwa Dawuda.

¹⁶ Kətsaʼu nda tsatsi, ka bəglafta Nəhemiya zwaŋa Azbuk, mali ta ghəŋa rita kwakwara Betʼtsur ta ŋa ni, ka zlraftá tsi ta kəma kula la Dawuda, dikw ta ghwa tsap mnduha, dikw ta həga gwal mbirim ma vulu.

¹⁷ Kətsaʼu nda tsatsi, ka bəglafta la Levi ta ŋa taŋ matsak. Tsaya i Rəhum zwaŋa Bani. Ndusa nda tsatsi guli ná, ka payə Hasavya mali ta ghəŋa rita kwakwara Kəghila, ŋa kwakwara ni.

¹⁸ Kətsaʼu nda tsatsi, ka pay zwana ma taŋ ta ŋa taŋ. Tsatsi Bavvay zwaŋa Henadad, mali ta ghəŋa rita kwakwara Kəghila.

¹⁹ Ta vata tsatsi guli ka payə Ghezer zwaŋa Yəhusuwa mali ta ghəŋa Mitspa ta matsak ma sana vli, ta nzakway mbəŋ ya mbəŋ ya nda zlrafta ta tva lafi da həga huzla vulu dikw da zluŋura matsak.

²⁰ Kətsaʼu nda tsatsi guli, ka payə Baruh zwaŋa Zabbay ta sana ŋa ni vli nda tva ni, zlrafta ni ta zluŋura matsak ha ka lagha ta wa tgha ga Ilyasiv, mali ta ghəŋa gwal dra skwi ŋa Lazglafta.

²¹ Kətsaʼu nda tsatsi ka payə Məreymut zwaŋa Uriya, zwaŋa Hakuts ta sana vli ta zlrafta ta wa tgha ga Ilyasiv ha ka lagha ta kɗavakta həga Ilyasiv.

²² Kətsaʼu nda tsatsi ka payə gwal ta dra skwi ŋa Lazglafta ta sagha ma vliha ta wanaftá tsa kwakwar ya, ta ŋa taŋ.

²³ Kətsaʼu nda həŋ, ka payə i Biŋyamiŋ, nda Hasuv ta vli mbəŋ ya mbəŋ ya nda hga taŋ. Kətsaʼu nda hahəŋ guli, ka payə Ghazariya zwaŋa Maʼaseya, zwaŋa Ananiya ta ŋa ni ta vata həga ni.

²⁴ Kətsaʼu tsatsi, ka payə Binnuwi zwaŋa Henadad ta sana vli ta zlrafta ni ga Ghazariya ha ka lagha ta zluŋura matsak.

²⁵ Ka payə Palal zwaŋa Uzay ta ŋa ni mbəŋ ya mbəŋ ya nda tsa zluŋur ya, nda ya nda dzuguvi nda slra slriŋ lu ta ghəŋa həga ga mgham nda slra ya, ndusa nda daɓi tgha gwal ta ngha həga. Kətsaʼu nda tsatsi, ka payə Pədaya zwaŋa Parus ta ŋa ni,

²⁶ kawadaga nda kwalvaha həga Lazglafta, ta nzaku ma ghərzla Ghufel, ta ŋa taŋ, dikw ta tsa dzuguvi nda slra slriŋ lu, nda ya ta wa tgha Imi, nda ta tva dɗakwa fitik ya.

²⁷ Kətsaʼu nda tsi, ka payə gwal ma Tekuwa ta vli ta nzakway mbəŋ ya mbəŋ ya nda dzuguvi dagala nda slra slriŋ lu dikw ta matsak ma Ghufel.

²⁸ Nda ta ghəŋa wa tgha Plisha, ka payə gwal ta dra skwi ŋa Lazglafta ta ŋa taŋ, dər wa ta kəma həga ni.

²⁹ Kətsaʼu nda hahəŋ, ka payə Tsaduk zwaŋa Imer ta ŋa ni mbəŋ ya mbəŋ ya nda həga ni. Kətsaʼu nda tsatsi, ka payə Səmaghya zwaŋa Sekaniya ta ŋa ni, mnda ngha wa tgha nda ta tva dɗakwa fitik ya.

³⁰ Kətsaʼu tsatsi, ka payə i Hananiya zwaŋa Selemya, nda Hanuŋ mamkuʼ a zwaŋa Tsalaf ta sana vli. Kətsaʼu nda hahəŋ, ka payə Məsulam zwaŋa Berehiya ta ŋa ni mbəŋ ya mbəŋ ya nda həga taŋ.

³¹ Kətsaʼu nda tsatsi, ka payə Malkiya mnda slara dasu ta ŋa ni, dikw ta həga kwalvaha həga Lazglafta, nda gwal ta tsakala, mbəŋ ya mbəŋ ya nda wa tgha Vitsa Vli, ha ka lagha ta dzuguvi nda zlra ma zluŋura matsak.

³² Ka payə sanlaha ma gwal ta slara dasu ya, nda gwal ta tsakala ta ŋa taŋ, zlrafta ma tsa zluŋur ya, dikw ta wa tgha Tuwakha.

Ta kumay la ghuma ta sladanatá slna

³³ Manda snaŋta Sambalat kazlay ta bəgəlba aŋni ta tsa matsak ya kəʼa, ka ɓasaftá tsi ta ŋuɗuf, ka gafta sidi katakata, ka ghuɓas tsi ta la Yahuda.

³⁴ Kaʼa ta kəma gwal ta maga slna nda tsi, nda ta ya ta kəma sludziha Samari mantsa: « Nahgani ta mag na la Yahuda kul haɗ ghəzliwa taŋ na katək na? Dzaʼa zlana zla mu ta həŋ ka kɗaŋta həŋ ra? Dzaʼa vlay həŋ ta skwa pla ghəŋ ra? Dzaʼa kɗiŋ kɗa həŋ baɗ turtuk ra? Dzaʼa vrəglanaf vra həŋ ta tsa palaha dzaɓanap lu ka niŋta ka kufik, ka driŋta ya ra? » kaʼa.

³⁵ Mista ni Tuviya, la Ghamuŋ. Kaʼa mantsa: « Ka ba həŋ tataŋ ɓa! Ka ŋladaf ŋla gərhaŋ ta tsa matsaka taŋ ka pala ya ná, dzaʼa zluzla, » kaʼa.

³⁶ Ka mag yu ta duʼa, ka yu mantsa: « Lazglafta ŋni, sna ka ghumaha ŋni ta hta aŋni ɓa! Vranaf skwa taŋ ta ghəŋa taŋ, ka zləɗagha zləɗa sana haɗik ta həŋ ka dzaʼa həŋ ga vuʼa.

³⁷ Ma bukwana ka ta krughuva taŋ, ma hərɗiŋ ka ta dmakwa taŋ ta kəma gha, kabga razaŋnaraza həŋ ma kuma gwal ta ba matsak, » ka yu.

³⁸ Ka bə ŋni ta matsak. Ka badaftá ŋni ta rita ni nda watani dendesl. Nda ŋuɗuf turtuk klafta inda mndu ta maga tsa slna ya.