Nəhemiya 11 - Hdi

Gwal ta nzata ma Ursalima

¹ Ka nzatá maliha ta ghəŋa mnduha ma Ursalima. Ka vzaftá hamata mnduha ta vindima ŋa zbagaghatá ya turtuk maghwaŋ ŋa nzata ma Ursalima, luwa ya nda fa ŋa Lazglafta, ta nzatá tsa pɗakwa taŋ təmbay ya ma sanlaha ma luwa.

² Ka tfanaghatá mnduha ta wi ta inda mnduha ta fatá ghəŋa taŋ ŋa nzata ma Ursalima.

³ Ta nzatá maliha ta haɗika Yahuda ma Ursalima ya, ta nzatá sanlaha ma la Israʼila, nda gwal ta dra skwi ŋa Lazglafta, nda la Levi, nda kwalvaha həga Lazglafta, nda la kwalvaha Salumuŋ ma haɗika taŋ, inda taŋ ma vla taŋ ma luwa taŋ.

⁴ Ma Ursalima ná, ka nzatá sanlaha ma la Yahuda, nda la Biŋyamiŋ. Mataba tsa la Yahuda ya na tsaya: I Ataya zwaŋa Uzziya, zwaŋa Zakari, zwaŋa Amarya, zwaŋa Səfatya, zwaŋa Mahalalʼel mataba la Perets,

⁵ nda Maʼaseya zwaŋa Baruh, zwaŋa Kulhuze, zwaŋa Hazaya, zwaŋa Adaya, zwaŋa Yuyariv, zwaŋa Zakari, zwaŋa mnda la Silu.

⁶ Gwagwata la Perets ta nzata ma Ursalima na: Bikwira duhwalha fwaɗ dərmək nda mkuʼ mbsak tghas mida həŋ.

⁷ Wya gwal mataba la Biŋyamiŋ: I Salu zwaŋa Məsulam, zwaŋa Yuʼed, zwaŋa Pədaya, zwaŋa Kulaya, zwaŋa Maʼaseya, zwaŋa Itiʼel, zwaŋa Yesaya.

⁸ Tahula tsatsi, i Gabbay nda Salay, təmbay dərmək nda hisambsak tghas mida həŋ.

⁹ Ka nzaku Yuʼel zwaŋa Zihri ka ghəŋ ta ghəŋa tsa ghuɓu ya, ta nzaku na Yahuda zwaŋa Hasnuʼa ka mahisa mghama tsa luwa ya.

¹⁰ Mataba gwal dra skwi ŋa Lazglafta ná, mamu Yədaya zwaŋa Yuyariv, nda Yahiŋ,

¹¹ nda Səraya zwaŋa Hilkiya, zwaŋa Məsulam, zwaŋa Tsaduk, zwaŋa Mərayut, zwaŋa Ahituv mali ta ghəŋa həga Lazglafta,

¹² nda mnduha taŋ tghas dərmək nda hisambsak his mida ta ksa slna ma həga Lazglafta, nda Adaya zwaŋa Yəruham, zwaŋa Plaliya, zwaŋa Amtsi, zwaŋa Zakari, zwaŋa Pashur, zwaŋa Malkiya,

¹³ nda mnduha ni zəʼal həgaha his dərmək nda fwaɗ mbsak his mida ma mndəra taŋ, nda Amassay, zwaŋa Azarʼel, zwaŋa Ahzay, zwaŋa Mesilemut, zwaŋa Imer.

¹⁴ Mamu bikwira vulu dərmək nda hisambsak tghas mida mataba mnduha taŋ. Mali ta ghəŋa tsa ghuɓu ya ná, tsaya Zavdiʼel zwaŋa Hagedulim.

¹⁵ Mataba la Levi ná, mamu Səmaghya zwaŋa Hasuv, zwaŋa Ghazrikam, zwaŋa Hasavya, zwaŋa Bunni,

¹⁶ nda Sabətay, nda Yuzavat ta nzakway ka maliha his mataba la Levi ta wa slna həga Lazglafta nda mabli.

¹⁷ Nda Mataniya zwaŋa Mihaʼ, zwaŋa Zavdi, zwaŋa Asaf, tsatsi ta tsa lwa Laha zləzləvu ma fitika maga duʼa. Nda Bakbukiya, ta kataŋtá Mataniya tekw mataba mnduha ni. Nda Avda zwaŋa Samuwa, zwaŋa Galal, zwaŋa Yədutuŋ.

¹⁸ Gwagwata la Levi ma luwa ya nda fa ŋa Lazglafta ná, his dərmək nda tghas mbsak fwaɗ mida həŋ.

¹⁹ Mamu gwal ta ngha wa tgha, i Ghakuv nda Talmuŋ, hahəŋ nda mnduha taŋ ta nghapta ka wa tghaha, dərmək nda ndəfáŋ mbsak his mida gwagwata həŋ.

²⁰ Sanlaha ma la Israʼila, nda gwal ta dra skwi ŋa Lazglafta, nda la Levi ya ná, ta nzaku ma sana luwaha ta haɗika Yahuda hahəŋ, inda taŋ ma luwa taŋ.

²¹ Kwalvaha həga Lazglafta ya ná, ta nzaku ma sana ghərzla Ghufel həŋ. I Tsiha nda Gispa maliha ta ghəŋa taŋ.

²² Ghəŋ ta ghəŋa la Levi ma Ursalima ná, tsaya Uzzi zwaŋa Bani, zwaŋa Hasavya, zwaŋa Mataniya, zwaŋa Mihaʼ, mataba mndəra la Asaf gwal ta fa laha ta maga slna ma həga Lazglafta.

²³ Mamu zlahu ya fana mgham ta tsa gwal fa laha ya, nda skwi ya dzraf lu ŋa magay taŋ inda vaghu.

²⁴ Petahya, zwaŋa Mesezavʼel, mataba mndəra la Zerah, zwaŋa Yahuda ya ná, tsatsi fatá mnda la Israʼila ŋa nzakway tavatá mgham, ta ghəŋa inda skwi ta nghanatá həŋ.

La Yahuda kul haɗ ma Ursalima

²⁵ Sanlaha ta uʼa la Yahuda ya guli ná, wutsa wutsa hahəŋ ta vgha ma zwana luwaha nda vwahha taŋ tani, manda Kiriyatʼarba, nda sana vliha ta vata ni, nda ya ma Divuŋ nda luwaha ta wanafta guli, nda ya ma Yekavtseʼel nda sana vliha ndusa ndusa,

²⁶ nda ya ma Yəhusuwa, nda Mulada, nda Betʼpelet,

²⁷ nda ya ma Hatsarsuʼal, nda Bəʼerseva, nda vliha ta wafta,

²⁸ nda ya ma Tsiklag, nda Mehuna, nda vliha ta wafta,

²⁹ nda ya ma Ayeŋrimuŋ, nda Tsurgha, nda Yarmut,

³⁰ nda ya ma Zanuwah, nda Ghadulam nda zwana luwaha taŋ, nda Lahis nda vwahha taŋ, nda Ghazeka nda zwana luwaha ta wanafta. Ka dzagwatá həŋ ta tumpula taŋ ma Bəʼerseva dikw da didiŋa Hinum.

³¹ Ka nzatá mndəra la Biŋyamiŋ daga ma Gevagh, nda Mikmas, nda Ghaya, nda Betel, nda zwana luwaha ta wanaftá həŋ,

³² nda ya ma Ghanatut, nda Nuv, nda Ananiya,

³³ nda ya ma Hatsur, nda Rama, nda Gitayim,

³⁴ nda ya ma Hadid, nda Tsəvuʼayim, nda Nevallat,

³⁵ nda ya ma Lut, nda Unu, nda didiŋa gwal tsatsaftá skwiha.

³⁶ Mataba la Levi ma Yahuda ná, sliʼaf sliʼa sana ghuɓuha ka laghwi ta haɗika la Biŋyamiŋ.