Gwal tsa guma 7 - Hdi

Gidghuŋ nda mnduha hkən dərmək

¹ Ka tsavaftá Yərubaghal, ta nzakway ka Gidghuŋ, ga sərɗək, nda inda tsa mnduha mista ni ya, ka laghwi da fatá ghuɓa taŋ ndusa nda dzuɓaya Harut. Ka nzakw ghuɓa la Midyaŋ ma didiŋa mista kuɗuŋura Mure nda təv mazlaya taŋ.

² Ka Yawe nda Gidghuŋ mantsa: « Ndəghundəgha na mnduha mista gha na. Ka vla vla yu ta la Midyaŋ ma dzva taŋ katsi, dzaʼa klaghu kla la Israʼila ta glaku má ta rihata, ŋa mnay taŋ kazlay na: “Mbrakwa ŋni ta kataŋnafta,” kəʼa.

³ Ndanana, wya skwi ŋa mnanata gha ta mnduha: “Inda mndu ta ghudzaku da zləŋ, ka vra tsi dzagha ni, ka ndra tsi nda ta ghwá Gilghat!” » kaʼa. Ka vraghutá mnduha dəmbuʼ hisambsak his mida (22.000) dzagha taŋ. Ka pɗatá mnduha dəmbuʼ ghwaŋ (10.000).

⁴ Ka Yawe nda Gidghuŋ guli mantsa: « Ndəghundəgha na mnduha na kay guli! Hlada hla ta həŋ ta wa imi, hada dzaʼa ɗagaghapta yu mataba taŋ ta gwal dzaʼa mista gha. Mndu ya dzaʼa mnaghata yu kazlay na: “Ka la ya mndu ya mista gha,” kəʼa ya ta dzaʼa mista gha. Mndu ya dzaʼa mnaghata yu kazlay na: “La a ya mndu ya mista gha wu” kəʼa ya, ləta a wu, » kaʼa.

⁵ Mantsa tama, ka hladatá Gidghuŋ ta tsa mnduha ya ta wa imi. Ka Yawe nda tsi mantsa: « Inda mndu dzaʼa tsaslaʼuwa imi nda ghanik manda ŋa kri ya, ka dganata ka nda inda gwal dzaʼa tsəlɓata nda tsəlɓa ka sa imi təɓaʼ, » kaʼa.

⁶ Mbsaka gwal ta tsaslaʼuwa imi da wi ná, mnduha hkən dərmək (300) həŋ. Ama inda pɗakwa mnduha ná, tsəlɓa nda tsəlɓa həŋ ka sa imi təɓaʼ.

⁷ Ka Yawe nda Gidghuŋ tama mantsa: « Nda tsa mnduha hkən dərmək si ta tsaslaʼuwa imi ya dzaʼa kataghunafta yu, ŋa vlata ɗa ta la Midyaŋ ma dzva gha. Ka vra inda pɗakwa dər wati ma mndu dzagha ni, » kaʼa.

⁸ Ka vriŋtá Gidghuŋ ta inda mnduha la Israʼila dzagha taŋ, ka ŋaghutá tsa gwal hkən dərmək (300) ya kweŋkweŋ. Ka zlaghaghutá tsa mnduha ya ta skwa zay nda duliha da tsa mnduha ya. Ma didiŋa nda mista taŋ, ghuɓa la Midyaŋ.

Grafta Gidghuŋ dzaʼa zaku ghwa kəʼa

⁹ Ta tsa rviɗik ya, ka Yawe nda Gidghuŋ mantsa: « Sliʼaf sliʼa gha, la la da ghuɓa la Midyaŋ, kabga vla vla yu ta həŋ ma dzva gha.

¹⁰ Ama ka ta zləŋ ka ka laha, la la kawadaga nda duhwala gha Pura.

¹¹ Ka sunapta ka ta skwi dzaʼa həŋ da gwaɗay. Tahula tsa, dzaʼa ufaghaf ufa ta vgha. La la tama da ghuɓu, » kaʼa. Ka laha Gidghuŋ kawadaga nda duhwala ni Pura, ndusa nda kɗavakta vla nzakwa gwal ta ngha ghuɓu.

¹² Pgha pgha la Midyaŋ, nda la Ghamalek, nda inda la təv safa fitik ta vgha ma tsa didiŋa ya tɗik manda hiʼa maya, mbəɗava a ŋalibwaha taŋ wu, manda wutak ta wa drəf həŋ.

¹³ Manda ɓhadaghata Gidghuŋ, ka snaŋtá tsi ta rusay sana mndu ta suna ni ŋa gra ni, kaʼa nda tsi mantsa: « Mamu sana suni ta faɗighata. Sana zlambla burada urz ya nghaŋ yu ta taŋwalaktá vgha da ghuɓa la Midyaŋ. Ka lagha tsi guyanavatá tumpul, ka zləmbutá tsa tumpul ya ka mbəɗavafta ka makɗiŋilŋil, ka hwanzaɓiŋtá tsi ta tsa tumpul ya, » kaʼa.

¹⁴ Ka tsa gra ni ya nda tsi mantsa: « Kafaya Gidghuŋ, zwaŋa Yuʼas, mnda la Israʼila tsaya. Vla vla Lazglafta ma dzva ni ta la Midyaŋ nda inda gwal ma ghuɓu mu tani! » kaʼa.

¹⁵ Na snaŋta Gidghuŋ ta rusa tsa suni ya, nda tsa klatá ghəŋa ni ya, ka zləmbatá tsi ta haɗik ka rfanaghatá Lazglafta. Ka vragaghutá tsi da ghuɓa la Israʼila, kaʼa mantsa: « Sliʼafwa sliʼa, kabga vla vla Yawe ma dzva ghuni ta ghuɓa la Midyaŋ, » kaʼa.

Zatá la Midyaŋ

¹⁶ Ka daganaptá Gidghuŋ ta tsa mnduha hkən dərmək (300) ya ka baku hkən. Ka valaŋtá tsi ta inda taŋ ta duli nda hulamha kul haɗ skwi mida, nda pinata vu ma tsa hulamha ya.

¹⁷ Kaʼa nda həŋ mantsa: « Ka ngha kuni ta iʼi, ka maga kuni manda va ŋa ɗa! Na lagha ɗa ta wa ghuɓu ya, ka maga kuni ta skwi dzaʼa yu da magay.

¹⁸ Vyata iʼi nda inda gwal kawadaga nda iʼi ta duli ya, ka vya kaghuni demdem ta wanaftá ghuɓu ya guli ta duli. Wya ka kuni dzaʼazlay: “Ŋa Yawe, nda ya ŋa Gidghuŋ!” » ka kuni dzaʼazlay, kaʼa.

¹⁹ Taghwaŋ a vli ka lam da takala wu, ka ɓhadaghatá i Gidghuŋ nda bakwa mnduha dərmək (100) ta wa ghuɓu. Mbəɗapta lu yeya ta gwal nghapta ta wa lilwa. Ka vyi həŋ ta duli, ka paslanaptá həŋ ta tsa hulamha ma dzva taŋ ya.

²⁰ Ka vyi tsa bakuha hkən ya guli ta duliha, ka paslanaptá hulamha. Ka ŋaŋanatá həŋ nda dzva zlaɓa ta pinatá vu, ma dzva zeghwi na duliha ŋa vyay, ka hlə həŋ ta wi, ka həŋ mantsa: « Kafay ŋa Yawe nda ya ŋa Gidghuŋ! » ka həŋ.

²¹ Ka slasladatá inda tsa hahəŋ ta wanaftá ghuɓu ya dər wa ma vla ni. Ka tatá inda mndu ma ghuɓu demdem ta vgha ka hwaya, ka wahu.

²² Ta vyi tsa mnduha hkən dərmək (300) ya ta dula taŋ, ta hwazlaɓanaftá Yawe ta gwal vula la Midyaŋ ka mbəɗavatá həŋ psla vgha taŋ nda kafay sanlaha nda sanlaha. Ka hwayaptá mnduha demdem ma ghuɓu ha da Betʼsita nda təv Tsərera, nda ya krəts ta mukuma Avelʼməhula ndusa nda Tabat.

²³ Mantsa tama, ka hagaftá lu ta la Israʼila mndəra la Naftali, nda ŋa la Aser, nda inda ŋa la Mənase, ka hwayiŋtá həŋ ta la Midyaŋ.

²⁴ Ka ghwanaftá Gidghuŋ guli ta gwal ghunay ta inda ghwáha Ifrayim ŋa mnay kazlay na: « Sawa sa da guyata nda la Midyaŋ, ka klata kuni ta wa taŋ ta wa imi laghwa vli ha da Betʼbara, nda laghwa vli ta wa zala Yardeŋ ya, » ka həŋ. Ka tskavatá inda mnduha la Ifrayim, ka ŋaghutá həŋ ta wa zala Yardeŋ dikw da Betʼbara.

²⁵ Ka kasaghatá həŋ ta maliha la Midyaŋ his, i Ghurev nda Zəʼev. Ka dzatá həŋ ta Ghurev ta kutumba Ghurev, Zəʼev ya, ma vla ɗitsa ima inaba Zəʼev. Ka hwayiŋtá həŋ ta la Midyaŋ, ka ɗatsaktá həŋ ta ghəŋa i Ghurev nda Zəʼev da Gidghuŋ ta sana ɓla Yardeŋ.