Gwal tsa guma 6 - Hdi

Zlurgwafta la Midyaŋ ta la Israʼila

¹ Ka magatá la Israʼila ta ghwaɗaka skwi ta wa ira Yawe. Ka vlatá Yawe ta həŋ ma dzva la Midyaŋ ka vaku ndəfáŋ.

² Ka sunustá la Midyaŋ ta ima zgi katakata ta la Israʼila. Ka hwayaghutá la Israʼila dabga la Midyaŋ da ɗifa ta ghwáha, nda ya ma galighaha, nda ya ma dzaŋ ta pyam.

³ Inda sləgafta la Israʼila ta sləgu ya ná, lafa la Midyaŋ, nda la Ghamalek, nda gwal nda təv safa fitik da liŋtá həŋ nda vulu.

⁴ Ka fatá həŋ ta ghuɓa taŋ ta vata la Israʼila, ka ɓadza nimaya ta tsa haɗik ya ha dikw ta vraghuta Ghaza. Zlanaŋ a həŋ ta la Israʼila ta dər nimaya, dər rina fisik, dər slaha, dər kəɗihha wa.

⁵ Ta laf la la Midyaŋ nda bra rina taŋ, nda tumpulha taŋ tani, manda hiʼa maya tskata həŋ. Hahəŋ nda ŋalibwaha taŋ, mbəɗava a həŋ wa. Ta lam la həŋ da tsa haɗik ya da ɓadzay.

⁶ Mantsa tama, ka htuta mbrakwa la Israʼila katakata dabga la Midyaŋ. Ka wahu la Israʼila ta wahu da Yawe.

⁷ Manda wahay la Israʼila ta wahu da Yawe dabga tsa la Midyaŋ ya,

⁸ ka ghunanaktá Yawe ta anabi ta la Israʼila, kaʼa nda həŋ mantsa: « Ka Yawe, Lazglafta la Israʼila na: “Iʼi ta hlagaghunapta ma Masar, ka hlagaptá kaghuni ma haɗika ga vuʼa.

⁹ Katap kata yu ta kaghuni ma dzva la Masar, nda ya da inda gwal ta giri ŋa ghuni. Ka ghəzliŋtá yu ta həŋ ta kəma ghuni, ka vlaghunatá yu ta haɗika taŋ.

¹⁰ Ka yu nda kaghuni na: Iʼi Yawe, Lazglafta ghuni. Yaha kuni da tsəlɓu ŋa lazglaftaha la Amuru nza kuni ma haɗika taŋ ya, ka yu. Ama sniha a kuni wu,” » kaʼa.

Hgaftá Yawe ta Gidghuŋ

¹¹ Ka lagha duhwala Yawe da nzata mista halalaya fu ma Ghufra ta nzakway ka ŋa Yuʼas, sana mndu ta uʼa la Avighezer. Ta ɗga alkama zwaŋa ni Gidghuŋ, ma tsuʼaŋa ɗitsa yakwa inabi, ŋa ɗifanata yaha la Midyaŋ nghaŋta.

¹² Ka zlagaptá duhwala Yawe da tsi, kaʼa nda tsi mantsa: « Bikwira vulu! Kawadaga Yawe nda kagha, » kaʼa.

¹³ Ka Gidghuŋ nda tsi mantsa: « Kdəkkdək, rvera ɗa! Ka kawadaga Yawe nda aŋni, kabgawu ta kəl inda na skwiha na ka slaŋnaghata na? Ga inda tsa mandərmimiha ni si ta rusaŋnata dzidzíha ŋni ya na? Ka həŋ na: “Yawe ta hlagaftá aŋni ma Masar,” ka həŋ kiʼe? Amma ndanana na, zlaŋnava zla Yawe, ka vlatá aŋni ma dzva la Midyaŋ! » kaʼa.

¹⁴ Ka mbəɗavatá Yawe nda təv tsatsi, kaʼa mantsa: « La nda na mbraku da kagha na, ka katagapta ka ta la Israʼila ma dzva la Midyaŋ. Iʼi a ta ghuna kagha wu ra! » kaʼa.

¹⁵ Ka Gidghuŋ nda tsi mantsa: « Kdəkkdək, rvera ɗa, kinawu ka yu dzaʼa katagaptá la Israʼila na? Gwal nda hta la ini ta uʼa taŋ mataba mndəra la Mənase, zwaŋ gudzekw iʼi guli, mataba gwal ma həga ga da ɗa! » kaʼa.

¹⁶ Ka Yawe nda tsi mantsa: « Dzaʼa nza nza yu kawadaga nda kagha, dzaʼa psla psla ka ta la Midyaŋ demdem, manda dzatá mndu turtuk, » kaʼa.

¹⁷ Ka Gidghuŋ nda tsi mantsa: « Ka kahwathwata mutsaf mutsa yu ta zɗakatahuɗa gha katsi, mariha mara ta ŋizla ta maraŋta kazlay, kagha Yawe ya ta gwaɗa nda iʼi kəʼa.

¹⁸ Ta ndəɓa dzvu yu da kagha, ma diʼiŋaghu ka hadna ha ta vrakta ɗa slaghaghata, ka klagaghata yu ta mbəha ɗa fata ta kəma gha, » kaʼa. Ka Yawe mantsa: « Ta nza nza yu ha ka vrakta gha, » kaʼa.

¹⁹ Ka laghu Gidghuŋ dzagha ni, ka hnatá tsi ta slaɓalakwa gu ka data. Tsəɗaʼaha ta hpu ka kiluʼ hisambsak, ka datá buradi kul haɗ is mida. Ka famtá tsi ta tsa sluʼi ya ma tughba, tamha ta kiwa ma beŋwbeŋw. Ka hlədanaghatá tsi dista tsa halalaya fu ya, ka vlaŋta.

²⁰ Ka tsa duhwala Lazglafta ya nda tsi mantsa: « Klaf kla ta na sluʼi na, nda na buradiha kul haɗ is mida na, ka pghafta ka ta na kutumba na, ka pghanaghata ka ta na kiwa na, » kaʼa. Ka magatá Gidghuŋ mantsa ya.

²¹ Ka tsəghadaptá tsa duhwala Yawe ya nda wa dafa ma dzva ni, ka ksaŋtá tsa sluʼi nda buradiha kul haɗ is mida ya, ka sab vu ma kutumba ka driŋtá tsa sluʼi, nda tsa buradiha kul haɗ is mida ya. Ka gi zwaɗutá tsa duhwala Yawe ya rək ta wa ira ni.

²² Na tsa grafta Gidghuŋ kazlay na, duhwala Yawe ya, kəʼa ya, kaʼa mantsa: « Wabaw iʼi, rvera ɗa Yawe, nda ngha yu ta duhwala Yawe kuma nda kuma! » kaʼa.

²³ Ama ka Yawe nda tsi mantsa: « Ma zləŋ ka ta zləŋ, mtuta a ka wu, kawadaga zɗaku nda kagha! » kaʼa.

²⁴ Ma tsa vli ya, ka dzihwanaftá Gidghuŋ ta gwir ta Yawe, ka hgə tsi ka « Yawe zɗaku. » Ta takeʼa tsa gwir ya ha gita, ma Ghufra mataba la Avighezer.

Zlíŋta Gidghuŋ ta gwira Baghal

²⁵ Ta tsa rviɗik ya, ka Yawe nda Gidghuŋ mantsa: « Klaf kla ta mamakwa lghəŋa da gha, nda sana lghəŋ ndəfáŋ viŋa ni ŋa mahisa ni. Ka tasiŋta ka ta gwira Baghala da gha, zləmbiŋ ka ta udza Asera ta vata ni ya.

²⁶ Tahula tsa, ka bafta ka ta bɗəma tsa kuɗuŋur ya ta gwir ta raku ŋa Yawe, Lazglafta gha. Ka klafta ka ta tsa mahisa lghəŋ ya, ka vlata ka ŋa pla ghəŋ ŋa dray tsuh tsuh ta tsa udza Asera zləmbiŋ ka ya, » kaʼa.

²⁷ Ka hlaftá Gidghuŋ ta mnduha ghwaŋ mataba kwalvaha ni, ka magatá skwi ya mna Yawe. Má ŋa magay ni gifitik ya, ka magatá tsi girviɗik kabga vəl zləŋay ni ta la ga da ni, nda mnduha ma luwa.

²⁸ Sliʼavata mnduha ma luwa wrək tgha ga sərɗək, kəʼa ka həŋ ná, nda zla gwira Baghal, tsiŋ tsa lu guli ta tsa udza Asera ta vata ni ya, draf dra lu ta tsa mahisa lghəŋ ya tsuh tsuh ta lfiɗa gwir baf lu.

²⁹ Ka həŋ mataba taŋ mantsa: « Wa ta magatá na? » ka həŋ. Ka ɗaɗawuvustá həŋ ta vli, ka psay. Ka lu nda həŋ mantsa: « Gidghuŋ, zwaŋa Yuʼas ya ta magata! » ka lu.

³⁰ Ka mnduha ma luwa nda Yuʼas tama mantsa: « Klagap kla ta zwaŋa gha ka dzata lu, kabga zliŋ zla ta gwira Baghal, ka tsiŋtá udza Asera si ta vata ni ya guli, » ka həŋ.

³¹ Ka Yuʼas nda inda tsa mnduha ta ta lagha dika ni ya mantsa: « Kaghuni dzaʼa lmanatá Baghal ra? Kaghuni dzaʼa kataŋta ra? Inda mndu dzaʼa lmanatá lmu ta Baghal ná, dzata ma kɗaku sərɗək! Ka si lazglafta Baghal katsi, ka lma lma vərɗa tsatsi, kabga gwira ni zlíŋ lu, » kaʼa.

³² Baɗ tsa fitik ya, ka tsanaftá lu ta hgu ta Gidghuŋ ka Yərubaghal manda mnay kazlay na: « Ka lma lma vərɗa Baghal, » kəʼa, kabga tsatsi ta zlíŋtá gwira ni.

Ɗaway Gidghuŋ ta ŋizla da Lazglafta

³³ Ka tskavatá la Midyaŋ, nda la Ghamalek, nda la nda təv safa fitik demdem, ka tsughwaɗaptá həŋ ta Yardeŋ ka fatá ghuɓa taŋ ma didiŋa Yizrəghel.

³⁴ Ka lanaghatá Sulkuma Yawe ta ghəŋa Gidghuŋ. Ka vyatá tsi ta duli, ka hagadaghatá lu ta la Avighezer ta uʼa taŋ ŋa dzaʼa mista ni.

³⁵ Ka ghunaftá tsi ta gwal ghunay da hga inda mndəra la Mənase, ka laghu həŋ mista ni. Ghunafha guli ta gwal ghunay da mndəra la Aser, nda la Zəvuluŋ, nda la Naftali, ka laghu həŋ mista ni.

³⁶ Ka Gidghuŋ nda Lazglafta mantsa: « Ka ta kumay ka ta klaftá iʼi ŋa magaghatá slna ŋa kataptá la Israʼila manda ya mna ka katsi,

³⁷ wana yu dzaʼa zlatá ta huta tuwak nda swidi nda swidi ma blikwi. Ka laf la wuninik zəgədəɓ ta tsa huta ya, ta nzakw inda daɓa blikwi heleleʼ katsi, dzaʼa nda sna yu kazlay na dzaʼa katap kata ka ta la Israʼila nda ma dzva ɗa kəʼa, manda ya mna ka, » kaʼa.

³⁸ Ka magatá tsa skwi ya mantsa ya. Ga mahtsima ni, ka tsavaftá Gidghuŋ ga sərɗək, ka ɗits tsi ta tsa huta tuwak ya, ka ndəghanaftá tsi ta leghwa nda tsa wuninik ya.

³⁹ Ka Gidghuŋ nda Lazglafta mantsa: « Yaha ŋuɗufa gha da gufafta ta ghəŋa ɗa, ka gwaɗgləgagha gwaɗa yu turtuktuk. Kdəkkdək vliha vla ta tvi ka magəglaŋta yu ta sana dzəghu nda va na huta tuwak na kweŋkweŋ. Ka nza na huta na kweŋkweŋ heleleʼ, ta nzatá inda daɓa blikwi ka wuninik, » kaʼa.

⁴⁰ Ka magatá Lazglafta mantsa ya ta tsa rviɗik ya. Ka nzatá tsa huta ya heleleʼ, ta nzatá inda daɓa tsa blikwi ya ka wuninik.