Gwal tsa guma 20 - Hdi

Vulu ŋa tsanaghatá guma ta la Biŋyamiŋ

¹ Ka sliʼagaptá inda la Israʼila, daga ma Daŋ ga mazlay dikw da Bəʼerseva ga maghura, nda ya ta haɗika la Gilghat. Ka tskavata guyatá ghəŋ ma Mitspa manda mndu turtuk ta kəma Yawe.

² Ka lagha inda maliha mataba inda mndəra la Israʼila da guyatá ghəŋa mnduha Lazglafta. Dəmbuʼ fwaɗ dərmək (400.000) gwal vulu nda səla, nda sna həŋ ta vulu nda kafay.

³ Ka snaŋtá la Biŋyamiŋ kazlay na wa a laf la la Israʼila da Mitspa kəʼa. Ka la Israʼila mantsa: « Mnawa mna! Kinawu ka na ghwaɗaka skwi na magaku? » ka həŋ.

⁴ Ka tsa la Levi, zəʼala tsa marakw dza lu ya zlghaftá wa ni mantsa: « Ka ɓhadaghatá yu da Givgha ma kwakwara la Biŋyamiŋ, iʼi nda markwa sanagha ɗa, ŋa hanay hada.

⁵ Ka sliʼadaghatá maliha ma Givgha dika iʼi, ka wanaftá tsa həga nza yu mida ya girviɗik, ka kuma dzihata. Ka kwihaptá həŋ ta markwa sanagha ɗa, ka mtutá tsi.

⁶ Ka klaftá yu ta mbla tsa markwa sanagha ɗa ya ka kwahapta, ka tsaghafta ta inda kwakwara za həga la Israʼila, kabga maga maga həŋ ta mghama dmaku, nda skwa hula ma Israʼila.

⁷ Wana kaghuni demdem, la Israʼila. Gwaɗanaghawa gwaɗa ta gwaɗa ka tsiŋta kuni ta ghəŋa skwi ŋa magay hadna nda va nana! » kaʼa.

⁸ Ka sliʼavaftá mnduha demdem manda mndu turtuk, ka həŋ mantsa: « Haɗ mndu dər turtuk mataba mu dzaʼa laghwi da tumpula ni wa. Haɗ mndu dər turtuk dzaʼa vraghuta dzagha ni wa.

⁹ Wya skwi ŋa magay mu ndanana ŋa la Givgha. Vzafma vza ta vindima, ka ngha mu ta gwal dzaʼa guyata nda vulu nda həŋ.

¹⁰ Dzaʼa hlaʼa hla mu ma inda mndəra la Israʼila ta mnduha ghwaŋ ma dərmək (100), dərmək ma dəmbuʼ (1.000), dəmbuʼ ma dəmbuʼ ghwaŋ (10.000), ŋa dzaʼa da zba skwa zay ŋa gwal vulu ta dzaʼa planamtá la Gevagh ma kwakwara la Biŋyamiŋ, taɓta tsa skwa hula maga həŋ ma Israʼila ya, » ka həŋ.

¹¹ Mantsa tama, ka tskanaghatá mnduha la Israʼila demdem ta vgha ta ghəŋa tsa luwa ya, ka gwaftá vgha manda mndu turtuk.

¹² Ka ghwanaftá mndəra la Israʼila ta mnduha da mndəra la Biŋyamiŋ demdem, ka həŋ nda tsi mantsa: « Nahgani na ghwaɗaka skwi ta magaku da kaghuni na?

¹³ Vlaŋnawa vla ndana ndana ta tsa mnduha ka falay ma Givgha ya, ka pslata ŋni ta həŋ. Mantsa ya dzaʼa hliŋta mu ta ghwaɗaka skwi mataba la Israʼila, » ka həŋ. Ama va a la Biŋyamiŋ ta fa sləməŋ ka sna tsa gwaɗa zwana ma taŋ la Israʼila ya wa.

¹⁴ Ka sliʼagaptá la Biŋyamiŋ ma luwaha taŋ ka tskavata ma Givgha ŋa vulu nda la Israʼila.

¹⁵ Baɗ tsaya, mbsaka la Biŋyamiŋ ta hbagaptá vgha ma luwaha na: Dəmbuʼ hisambsak mkuʼ mida (26.000) həŋ, gwal ta laviŋtá vulu nda kafay. Mbəɗa a lu ta la Givgha ndəfáŋ dərmək (700), gwal ya ɗagap lu nda ɗaga wa.

¹⁶ Ma inda tsa bakwa gwal vulu ya ná, mamu mnduha ndəfáŋ dərmək ka zlaɓa. Inda hahəŋ laviŋ lava həŋ ta wuɗadaptá pala nda kiwilkiwila taŋ ta swidi turtuk kul dɗata dzva taŋ ta haɗik.

¹⁷ Ka mbəɗaftá lu ta mbsaka la Israʼila, kul mbəɗ lu ta la Biŋyamiŋ ná, dəmbuʼ fwaɗ dərmək (400.000) gwal nda sna ta vulu nda kafay, inda taŋ gwal ta sutá ta vulu həŋ.

¹⁸ Ka sliʼaftá la Israʼila ka laghwi da Betel da ɗawaŋta da Lazglafta, ka həŋ mantsa: « Tiŋəl wa mataba ŋni dzaʼa lafi da vulu nda la Biŋyamiŋ na? » ka həŋ. Ka Yawe mantsa: « Tiŋəl mndəra la Yuda dzaʼa lafi, » kaʼa.

¹⁹ Ka tsavaftá la Israʼila ga sərɗək ga mahtsima ni ka laghwi, ka fatá həŋ ta ghuɓa taŋ ndusa nda Givgha.

²⁰ Ka sliʼagaptá la Israʼila ŋa vulu nda la Biŋyamiŋ, ka dzaftá həŋ ta vgha ŋa vulu mbəŋ nda Givgha.

²¹ Ka sliʼagaptá la Biŋyamiŋ ma Givgha baɗ tsa fitik ya. Ka pslatá həŋ ta la Israʼila dəmbuʼ hisambsak his mida (22.000).

²² Ka ŋəglavatá la Israʼila, ka dzəglaftá vgha ŋa vulu ma va tsa vli baɗ taŋtaŋa fitik ya.

²³ Ka laf la Israʼila da taw ta kəma Yawe ha ga hawu, ka ɗawglaŋtá həŋ ta Yawe, ka həŋ mantsa: « Ka vulugəlta ŋni ta na vulu na nda mndəra la Biŋyamiŋ, zwaŋama ŋni ra? » ka həŋ. Ka Yawe mantsa: « Lafwa la da vulay! » kaʼa.

²⁴ Baɗ mahisa fitik, ka ləglap la Israʼila da vulay nda la Biŋyamiŋ.

²⁵ Baɗ tsa mahisa fitik ya, ka sab la Biŋyamiŋ ma Givgha da guyata nda həŋ, ka rwuglanatá həŋ ta mnduha dəmbuʼ ghwaŋpəɗ tghas (18.000) mataba la Israʼila, gwal nda sna ta vulu nda kafay.

²⁶ Ka ŋlaghatá gwal vula la Israʼila demdem da Betel. Ka nzatá həŋ hada ka taw da Yawe. Ka sumu həŋ ta suma baɗ tsa fitik ya ha ga hawu. Ka vlatá həŋ ta skwa pla ghəŋ ŋa dray tsuh tsuh, nda pla ghəŋa zɗaku ta kəma Yawe.

²⁷ Ka ɗawaŋtá la Israʼila da Yawe. Ma tsa fitik ya hada akwata dzratá wa Lazglafta.

²⁸ Pinhas, zwaŋa Ilghazar, zigha Haruna ta maga slna ta kəma Lazglafta ma tsa fitik ya guli. Ka həŋ mantsa: « Ka ləglapa ŋni da vula na vulu na nda mndəra la Biŋyamiŋ, zwaŋama ŋni re, ari ka zlanata ŋni a na? » kaʼa. Ka Yawe mantsa: « Lafwa la da vulay, kabga mahtsim, dzaʼa vla vla yu ta həŋ ma dzva ghuni, » kaʼa.

²⁹ Mantsa tama, ka pghatá la Israʼila ta buɗukwa ma Givgha, ka wanafta.

³⁰ Baɗ mahkəna fitik, ka ləglaf la Israʼila da vulu nda la Biŋyamiŋ. Ka dzaftá həŋ ta vgha ŋa vulu nda Givgha manda ya tazlay.

³¹ Ka sliʼagaptá la Biŋyamiŋ da guyata nda mnduha, ka gataghatá lu ta həŋ diʼiŋ nda luwa. Ka zlraftá həŋ ta pslatá gwal vula la Israʼila manda va ya tazlay. Ka pslatá həŋ ta gwal vula la Israʼila ta maga hkən mbsak ma huɗa mtak ta tviha ta laghwi da Betel nda ya da Givgha.

³² Ka la Biŋyamiŋ mantsa: « Wana mu ta psla həŋ manda ya tazlay! » ka həŋ. Ama ka la Israʼila mnuta na: « Ka hwaya mu ta hwaya ŋa gataghata mu ta həŋ ta tviha ma mtak diʼiŋ nda luwa! » ka həŋ.

³³ Ka zlaŋtá la Israʼila ta tsa dzatá vgha taŋ hada ya, ka laghwi da dzaftá vgha ŋa vulu ma Baghalʼtamar, ta sliʼagaptá tsa gwal ma buɗukwa ya guk daga ma tsa vli hada həŋ ya, təv dɗakwa fitik ma Gevagh.

³⁴ Ka ɓhadaghatá mnduha dəmbuʼ ghwaŋ (10.000) ɗagap lu mataba gwata la Israʼila ta kəma Givgha. Ka ɗavaftá tsa vulu ya katakata hada. Sna a la Biŋyamiŋ kazlay na ta hahəŋ dzaʼa mtafta vu kəʼa wa.

³⁵ Ka zatá Yawe ta ghwa ta ghəŋa la Biŋyamiŋ ta kəma la Israʼila, ka pslatá la Israʼila baɗ tsa fitik ya ta la Biŋyamiŋ dəmbuʼ hisambsak hutaf mida nda dərmək (25.100), inda taŋ gwal nda sna ta vulu nda kafay.

³⁶ Nghay la Biŋyamiŋ ná, zaza la Israʼila ta ghwa ta ghəŋa taŋ. Ka palama zlanaŋta la Israʼila ya ta daɓi ta la Biŋyamiŋ, kabga faf fa həŋ ta ghəŋ ta buɗukwa pghana həŋ ta həŋ ma Givgha.

³⁷ Ka valanaghatá tsa gwal ma buɗukwa ya misimmisim ta gwal ma Givgha, ka sliʼadamtá həŋ da luwa, ka pslatá mnduha demdem ma tsa luwa ya nda kafay.

³⁸ Tsaw ŋizla ya si dzraf la Israʼila mataba taŋ nda tsa gwal ta pghatá buɗukwa ya ná, tsaya tuviŋta taŋ ta ɗiŋ kuɗumbul ma luwa.

³⁹ Na má nghay la Israʼila ta ɗukwakwa tsa ɗiŋ ya, má ŋa mbəɗavata taŋ liŋtá la Biŋyamiŋ nda vulu. Ama ma kɗaku tsa ŋizla ɗukwakwa ɗiŋ ya sliʼafta ya, ghadu ghada la Biŋyamiŋ ta pslatá la Israʼila hkən mbsak. Ka dzə həŋ ta lawlaw, ka həŋ mantsa: « Wana mu ta za ghwa ta ghəŋa taŋ manda va ya tazlay! » ka həŋ.

⁴⁰ Ama ka zlraftá tsa ɗukwakwa ɗiŋ ya ta sliʼafta kuɗumbul ma luwa. Kəʼa ka la Biŋyamiŋ nghapta nda hul ná, wya vli ma luwa demdem ta zlghaku ka vu, ɗiŋ yeya ma ghuvaŋataluwa.

⁴¹ Ka mbəɗavatá la Israʼila liŋtá həŋ, ka hlutá zləŋ ta la Biŋyamiŋ, kabga nghay taŋ ta dɗanaghata zləmnda ta həŋ.

⁴² Ka mbəɗatá həŋ ta hul ta kəma la Israʼila, ka ksa tvi ka hwaya nda ma mtak, ama ta zliŋ a lu ta həŋ nda vulu wa. Ka rwu tsa la Israʼila ta sab ma luwa ya ta həŋ ka zaɗanatá həŋ kabga ratsam ratsa lu ta həŋ.

⁴³ Ka ratsamtá həŋ ta la Biŋyamiŋ, ka hwayiŋtá həŋ, zlana a həŋ ta dzaɓa həŋ wu, ha da sana vli ta kəma Givgha nda təv safa fitik.

⁴⁴ Mantsa ya ka lu rwanatá la Biŋyamiŋ dəmbuʼ ghwaŋpəɗ tghas (18.000). Inda taŋ gwal bikwira vulu həŋ.

⁴⁵ Mataba tsa gwal ta mbəɗatá hul, ka hwaya nda ma mtak, nda təv kutumba Rimuŋ ya ná, dəmbuʼ hutaf (5.000) gwal psla lu ta tviha. Ka hwayiŋtá lu ta sanlaha ha da Gidghum, ka pslatá lu ta dəmbuʼ his (2.000) guli.

⁴⁶ Baɗ tsa fitik ya, gwagwata la Biŋyamiŋ psla lu ná, dəmbuʼ hisambsak hutaf mida (25.000) həŋ, gwal nda hba vgha taŋ nda kafay, gwal bikwira vulu həŋ demdem.

⁴⁷ Ama mbəɗatá mnduha mkuʼ dərmək (600) ta hul, ka hwayaghuta nda ma mtak nda təv kutumba Rimuŋ. Fwaɗ tila taŋ ta nzakw hada.

⁴⁸ Ka vraktá la Israʼila nda təv pɗakwa la Biŋyamiŋ, ka pslatá həŋ nda kafay ta mnduha ma luwa kulam nda rini, kulam nda inda skwi ya guyuŋ həŋ. Ta ghəŋa tsa, ka fafiŋtá həŋ nda vu ta inda luwaha slanagha həŋ.