Gwal tsa guma 19 - Hdi

Kwihaptá markwa sanagha mnda la Levi

¹ Ma tsa fitik si kul haɗ mgham mataba la Israʼila ya, mamu sana mnda la Levi, ta nzakw ma sana vli kətsaʼuwa ma kwakwar ta ghwá la Ifrayim. Ka klaftá tsi ka markwa sanagha, makwa la Betʼlehem ta haɗika la Yuda.

² Ka magatá tsa markwa sanagha ni ya ta sliʼiŋsliʼiŋ, ka sliʼaftá tsi ka zlanata, ka laghwi da la da ni ma Betʼlehem ta haɗika la Yuda. Ka nzatá tsi hada ka tili fwaɗ.

³ Ka sliʼaftá zəʼala taŋ nda duhwala ni, nda kəɗih his, ka zbiŋta ŋa gwaɗganata ŋa lɓanatá ŋuɗufa, ŋa vranakta dzagha. Ka kladamtá tsa marakw ya da həga ga da ni. Nghaŋtá da ni ma tsa marakw ya, ka tsuʼaftá tsi nda rfu.

⁴ Ka ŋanatá dzidza ni, da ni ma tsa marakw ya ga taŋ, ka fitik hkən. Ka zə həŋ ta skwa zay, ka sə həŋ ta skwa say, ka hanay hada.

⁵ Baɗ mafwaɗa fitik, ka sliʼaftá həŋ wrək tgha. Ka pay mnda la Levi ta vgha ŋa sliʼi, ama ka da ni ma tsa marakw ya nda tsi mantsa: « Kəzla karaku, tsa a tsa kiʼa ta skwa zay ŋa ŋaghatá ŋuɗuf, kada sliʼa kuni! » kaʼa.

⁶ Ka nzatá həŋ, ka zutá skwa zay, suha həŋ ta skwa say kawadaga. Tahula tsa, ka da ni ma tsa marakw ya nda tsa zəʼal ya mantsa: « Kdəkkdək hanəgla hana hadna, ka rfa ŋuɗufa gha ta rfu! » kaʼa.

⁷ Si nda paya vgha tsa zəʼal ya ŋa sliʼi, ama tsa mbrəhay dzidza ni ya, ka snatá tsi, ka hanəglatá tsi hada.

⁸ Baɗ mahutafa fitik, ka sliʼaftá tsi wrək tgha ŋa sliʼi. Ka da ni ma tsa makwa ya mantsa: « Kdəkkdək zuza ta skwa zay karaku ŋa vlaghatá mbraku, ka hləmavaghuta hawu kada sliʼa ka, » kaʼa. Ka zutá həŋ ta skwa zay kawadaga.

⁹ Nda paya vgha tsa zəʼal ya ŋa sliʼi nda markwa sanagha ni, nda duhwala ni, ama ka dzidza ni, da ni ma tsa marakw ya, nda tsi mantsa: « Wana laghu la fitik, hawu vli, hanawa hana hadna! Kdəkkdək, wər dzaʼa da həga ma ni fitik, hanawa hana hadna, ka rfa ŋuɗufa gha ta rfu! Wrək tgha ga sərɗək mahtsim ya, ksay ghuni ta tvi tsa, ka dzaʼa dzagha gha, » kaʼa.

¹⁰ Ama vəgla a tsa mndu ya ta hanay hada wa. Ka sliʼaftá tsi ka laghwi. Ka ɓhadaghatá tsi ndusa ta kəma Yəbus, tsaya Ursalima, nda tsa kəɗih his ya, nda skwa nzakuha ta həŋ, nda tsa markwa sanagha ni ya.

¹¹ Hawu vli ɗekɗek ta ndusadaghatá həŋ da Yəbus. Ka tsa duhwal ya nda daŋahəga ni mantsa: « Mbaɗma, mbəɗama vgha nda ma na luwa la Yəbus na, ka hana mu hada! » kaʼa.

¹² Ama ka daŋahəga ni nda tsi mantsa: « Ma lam mu da luwa la mayəm, ma vli kul haɗ mnda la Israʼila. Kəɗama mbaɗa ha da Givgha.

¹³ Mbaɗma, ka lagha mu ndusa nda Givgha, ka Rama a tsi, ka hana mu ma sani ma tsa vliha ya, » kaʼa.

¹⁴ Ka kəɗ həŋ ta mbaɗa. Nda dɗuta fitik, nda ɓhadaghata taŋ ndusa nda Givgha, luwa mndəra la Biŋyamiŋ.

¹⁵ Ka mbəɗavatá həŋ ŋa dzaʼa da hanay ma Givgha. Ka lam tsa mnda la Levi ya, ka nzata ta sana daɓi vli ma luwa. Haɗ mndu ta tsuʼaftá həŋ ŋa hanay ga taŋ wa.

¹⁶ Ta va tsa hawu ya, mamu sana halata mndu ta vrakta si ta maga slna ni ma vwah. Tsa mndu ya ná, mnda la si ta kwakwar ta ghwá la Ifrayim ya, tsaw mayəm ya ma Givgha. Mnduha ma tsa vli ya ná, la Biŋyamiŋ həŋ.

¹⁷ Kəʼa ká tsa halata mndu ya klaŋtá ghəŋ ná, ka nghaŋtá tsi ta la matbay ta nzaku ta daɓa vli ma luwa, kaʼa nda həŋ mantsa: « Dzaʼa diga kuni na? Si ga kuni na? » kaʼa.

¹⁸ Ka tsa mnda la Levi ya nda tsi mantsa: « Sliʼaf ma Betʼlehem ta haɗika la Yuda ŋni, dzaʼa da sana vli kətsaʼuwa ma kwakwar ta ghwá la Ifrayim ŋni. Zwaŋa tsa vli ya yu. Si laghwi da Betʼlehem yu ta haɗika la Yuda. Ta vrə dzagha yu, ama haɗ mndu ta tsuʼaftá iʼi hadna wa.

¹⁹ Wya mamu ŋni nda mbamba, nda kuzuŋ ŋa zay kəɗihha ŋni. Mamu ŋni nda buradi nda ima inabi ŋa ɗa, nda kurɗa gha, nda ya ŋa na duhwal ta pgha kwalvaha gha na. Haɗ sana skwi pɗa ŋni wu, » kaʼa.

²⁰ Ka tsa halata mndu ya nda tsi mantsa: « Ka nza zɗaku kawadaga nda kagha! Ta klay yu ta ndəgakwa inda skwi kumaŋ ka. Ma han ka ta daɓa vli, » kaʼa.

²¹ Ka hladamtá tsi ta həŋ da həga ga taŋ, ka vlaŋtá tsi ta kuzuŋ ta kəɗihha. Ka mbaziŋtá həŋ ta səlaha taŋ, ka zutá həŋ ta skwa zay, ka sutá həŋ ta skwa say.

²² Ta dga mahtala həŋ tama, ka sliʼadaghatá sana mnduha si ma luwa, la falay, ka wanaftá tsa həga ya, ka gugtsa wa tgha, ka həŋ nda tsa halata mndu, daŋahəga ya mantsa: « Kligiŋ kla ta tsa mndu ta lam da ghuni ya, ka hanata ŋni nda tsi! » ka həŋ.

²³ Ka sab tsa daŋahəga ya da həŋ, kaʼa nda həŋ mantsa: « Mantsa a zwana ma wu, ma mag kuni ta ghwaɗaka skwi, kdəkwakdək. Ya wana sam sa na mndu na da ini ya, ma mag kuni ta skwa hula!

²⁴ Snawa! Wana makwa ɗa ka daghali, nda markwa sanagha na mndu na. Ka hləgaghunap hla yu ta həŋ dzibil. Ka hana kuni nda həŋ, ka maga kuni nda həŋ ta skwi ta zɗəgaghunata. Ama ma magana kuni ta skwa hula ta na mndu na! » kaʼa.

²⁵ Va a tsa mnduha ya ta fatá sləməŋ ka snay wa. Mantsa tama, ka klaftá tsa mnda la Levi ya ta tsa markwa sanagha ni ya, ka kləganaptá həŋ dzibil. Ka hahanatá həŋ nda tsi, ka kwikwihaptá həŋ ka hanay petsuweɗ vli ha ga sərɗək. Tsaɗakwa vli, ka zlidiŋtá həŋ.

²⁶ Watata tsaɗakwa vli, ka lagha tsa marakw ya zləmbata ta wa tgha həga ga tsa mndu ga taŋ zəʼala taŋ ya, ka nzata hada ha ka tsaɗata vli.

²⁷ Ga sərɗək tama, ka sliʼaftá zəʼala taŋ, ka gunatá tgha tsa həga ya, ka sabi ŋa kɗa mbaɗa ni. Ka slaftá tsi ta marakw, markwa sanagha ni zərnaʼa ta wa tgha, nda pghatá dzvuha ni ta viravira wa tgha.

²⁸ Kaʼa nda tsi mantsa: « Sliʼaf sliʼa, laghu u la, » kaʼa nda tsi. Sew gwaɗaf a wa. Ka tsukwaftá tsi ta kəɗiha ni ka laghu dzagha ni.

²⁹ Ɓhadaghata ni dzagha, ka klaftá tsi ta maŋa, ka kwahaptá tsi ta tsa markwa sanagha ni ya, ka fay ka fay ghwaŋpəɗ his, ka tsaghafta ta inda kwakwara la Israʼila.

³⁰ Wya ka inda mndu ta nghanata: « Kadzeŋkadzeŋ, haɗ skwi ta kəɗ maguta manda nana wu, ta ngha a lu daga ka yawu safa la Israʼila ma Masar ha ka sagha ta gita wu! Ɗina ka ndananaghata mu ta ndanu! Ka gwaɗanaghata mu ta gwaɗa, ka tsiŋta mu ta ghəŋa skwi ŋa magay! » ka həŋ.