Gwal tsa guma 18 - Hdi

Zbay la Daŋ ta vli ŋa nzata taŋ

¹ Ma tsa fitik ya, haɗ si mgham da la Israʼila wa. Ka zbə mndəra la Daŋ ta kwakwar ŋa nzata taŋ, kabga ha ta tsa fitik ya ná, ta mutsaf a hahəŋ ta ŋa taŋ haɗika za həga mataba mndəra la Israʼila wa.

² Ka zbaftá la Daŋ mataba taŋ ta uʼa taŋ, ka ghunaftá həŋ ta mnduha hutaf ta dra ŋuɗuf daga ma Tsurgha nda Istaʼul, ŋa dzaʼa da sunapta, ka vitsaptá haɗik. Ka həŋ nda həŋ mantsa: « Lawa vitsaptá tsa haɗik ya! » ka həŋ. Ka ɓhadaghatá tsa mnduha ya ta kwakwar ta ghwá la Ifrayim, ka han həŋ ga Mika.

³ Ma tsa nzakwa taŋ ga Mika ya, ka tsatsaftá həŋ ta lwa duhwala la Levi, ka gavadaghatá həŋ, ka həŋ nda tsi mantsa: « Wa ta klaghakta da hadna na? Nu ta mag ka hadna na? Nu ta ŋaghata hadna na? » ka həŋ.

⁴ Kaʼa nda həŋ mantsa: « Nda ndəgha skwi ta magihata Mika. Ta play ta tsedi ŋa ɗa, ta magana maga yu ta slna ka mnda dra skwi ŋa Lazglafta, » kaʼa.

⁵ Ka həŋ nda tsi mantsa: « Kdəkkdək ɗawaŋ ɗawa da Lazglafta kada snaŋta ŋni kazlay na dzaʼa ŋwaku na mbaɗa ŋni na, » kəʼa, ka həŋ.

⁶ Ka tsa mnda dra skwi ŋa Lazglafta ya mantsa: « Lawa la nda vghata zɗaku! Ta wa səla ghuni Yawe ma mbaɗa ta mbaɗ kuni! » kaʼa.

⁷ Ka laghu tsa mnduha hutaf ya, ka ɓhadaghatá həŋ da Layis. Ta nghadaptá həŋ ta tsa mnduha hada ya ná, ləŋləŋ ta nzakwa həŋ ta nzakwa taŋ nda tva ni manda ŋa la Tsiduŋ. Nda hanatá ghəŋ, nda fatá ghəŋ guli. Haɗ mndu ta gwaɗa kuzlah kuzlaha ma tsa haɗik ya ka ga mgham wa. Diʼiŋ həŋ nda la Tsiduŋ. Haɗ sana mndəra mndu ta dzrə həŋ ta wi nda tsi wa.

⁸ Ka vraktá tsa mnduha hutaf ya slanaghatá zwana ma taŋ ma Tsurgha nda Istaʼul. Ka zwana ma taŋ nda həŋ mantsa: « Kinawu nzakwa ni kay? » ka həŋ.

⁹ Ka həŋ mantsa: « Mbaɗma! Mbaɗma liŋtá tsa mnduha ya, kabga nghadap ngha ŋni ta tsa haɗik ya ná, ɗinakwa skwi a va tsa wa. Ta dga ghəŋ kuni ra? Ma gə kuni ta yaɗi, ksawa tvi ŋa dzaʼa hlaghutá tsa haɗik ya.

¹⁰ Ka lam la kuni, dzaʼa slanagha sla kuni ta mnduha ta nzakw ləŋləŋ. Dagala mtaka tsa haɗik ya, vla vla Lazglafta ma dzva ghuni. Vli ya kul haɗ sana skwi dzaʼa pɗata lu ma inda skwi ta magaŋta lu nda maga tsa haɗik ya, » ka həŋ.

¹¹ Ka sliʼaftá mnduha mkuʼ dərmək (600) ta uʼa la Daŋ nda huzla vula taŋ, ma Tsurgha nda Istaʼul.

¹² Ka laf həŋ fatá ghuɓa taŋ ma Kiriyatʼyegharim ta haɗika la Yuda. Tsaya kəl lu ka hga tsa vli təv dɗakwa fitik ma Kiriyatʼyegharim ya ha gita ka Mahane Daŋ.

¹³ Daga hada, ka lab həŋ nda ma kwakwar ta ghwá la Ifrayim, ka ɓhadaghatá həŋ slafta ta həga Mika.

¹⁴ Ka tsa mnduha hutaf ta lab da vitsaptá haɗika Layis ya nda zwana ma taŋ mantsa: « Nda sna kuni kazlay ma tsa həga ya ná, mamu ifut, nda skwa wuyayha kavghakavgha, nda fwatu ka kfur nwap lu, kəʼa ra? Ndanana, ka snaŋta kuni ta skwi ŋa magay ghuni, » ka həŋ.

¹⁵ Ka mbəɗadaghatá həŋ ta vgha, ka lam həŋ da tsa duhwala la Levi, ma həga ga Mika ya. Ka ganaghatá həŋ ta zgu.

¹⁶ Ta sladatá tsa la Daŋ mkuʼ dərmək (600) ya nda huzla vula taŋ ta wi tgha.

¹⁷ Ka lam tsa mnduha hutaf si ta labi da vitsanatá tsa haɗik ya kay da huɗa tsa həga ya. Ka hlaftá həŋ ta tsa ifut, nda skwa wuyayha, nda fwatu ka kfur nwap lu ya, ta sladu mnda dra skwi ŋa Lazglafta ta wi tgha, nda tsa mnduha mkuʼ dərmək (600) nda huzla vulu ya.

¹⁸ Lama tsa mnduha ya da həga ga Mika, ka hlaftá həŋ ta ifut, nda skwa wuyayha, nda fwatu ka kfur nwap lu ya, ka mnda dra skwi ŋa Lazglafta nda həŋ mantsa: « Nahga tsa ta mag kuni na? » kaʼa.

¹⁹ Ka həŋ nda tsi mantsa: « Haf ha ta wa gha! Bukwana wa gha! Sawi mista ŋni! Dzaʼa nza nza ka ka da, ka mnda dra skwi ŋa Lazglafta. Dər nzakwa gha ka mnda dra skwi ŋa Lazglafta ŋa həga mndu turtuk re, ari ka ŋa mndəra mndu turtuk ma la Israʼila ta uʼa taŋ a na? » ka həŋ.

²⁰ Ka rfu mnda dra skwi ŋa Lazglafta ta rfu. Ka hlaftá tsi ta ifut, nda skwa wuyayha, nda fwatu ka kfur nwap lu ya, ka laghu tsi mista tsa mnduha ya.

²¹ Ka mbəɗavatá həŋ ka ksaftá tva taŋ, ka pghaftá həŋ ta kəma taŋ ta zwani, nda rini, nda huzla.

²² Diʼiŋaghu diʼiŋa tsa la Daŋ ya nda həga Mika, ta tskavatá la sləvda nda gwal ga Mika tani, ka hwayiŋtá həŋ.

²³ Ka dzatá həŋ ta lili mista la Daŋ. Ka mbəɗavatá la Daŋ, ka həŋ nda Mika mantsa: « Nahgani ya ta ksutá kagha, nya tskava lu? » ka həŋ.

²⁴ Kaʼa mantsa: « Lazglaftaha ɗa tsatsaf yu, nda mnda dra skwi ŋa Lazglafta tani hlagha kuni, ka laghwa ghuni. Nu ta pɗaku da iʼi na? Ta ta ghəŋa tsaya ná, “nahgani ya ta ksuta kagha na ka kuni?” » kaʼa.

²⁵ Ka la Daŋ nda tsi mantsa: « Ma walglaŋ ka ta pslaftá wi! Ka mantsa a tsi wu, dzaʼa valaghagha vala gwal ta ŋlaku ŋuɗufa taŋ mataba ŋni, ŋa tɗanakta gha ta mtaku ta ghəŋa gha, nda la ga ghuni tani, » ka həŋ.

²⁶ Ka kɗaŋtá la Daŋ ta mbaɗa taŋ. Nghadapta Mika ná, mbru mbra hahəŋ ka tsatsi, ka vraghatá tsi damkwal dzagha ni.

Lagha la Daŋ nzata ma Layis

²⁷ Ka hlaghatá la Daŋ ta skwiha si tsatsaf Mika, ka klíŋta həŋ nda mnda dra skwi ŋa Lazglafta si ta maganatá slna. Ka dɗanaghatá həŋ ta la Layis, gwal ta nzakwa taŋ ləŋləŋ nda fatá ghəŋ. Ka zaɗanatá həŋ ta mnduha nda kafay, ka fiŋtá tsa luwa ya nda vu.

²⁸ Haɗ mndu ta kataŋtá həŋ wu, kabga diʼiŋ həŋ nda Tsiduŋ, haɗ sana mndəra mndu ta dzrə həŋ ta wi nda tsi guli wu, ma didiŋa ta laghwi nda təv Betʼrəhuv nzatá nzakwa ni. Ka bəglaftá la Daŋ ta tsa luwa ya, ka nzamta mida.

²⁹ Ka hgə həŋ ta tsa luwa ya nda hga Daŋ dzidza taŋ zwaŋa Israʼila. Ghalya ná, Layis si hga tsa luwa ya.

³⁰ Ka dzugwatá la Daŋ ta tsa fwatu ka kfur nwap lu ya, ŋa maga slna vərɗa hahəŋ. Ka nzakw Yunataŋ, zwaŋa Gersum, zigha Musa, nda zivira ni tani, ka mnda dra skwi ŋa Lazglafta ŋa mndəra la Daŋ, ha ta fitika hlaghata ka vuʼa ta gwal ma tsa haɗik ya.

³¹ Tsa fwata skwa wuyay si magaf Mika ya ná, ka payanatá həŋ ma inda fitika nzakwa həga Lazglafta ma Silu.