Gwal tsa guma 17 - Hdi

Skwa wuyaya Mika

¹ Mamu sana mndu ta kwakwar ta ghwá la Ifrayim ta hgu lu ka Mika,

² kaʼa nda ma ni mantsa: « Tsa sulay dəmbuʼ nda dərmək (1.100) klugudughus lu, ka ksiʼi ka ta tsa ghali ya ta snay sləməŋa vərɗa iʼi ya kay ná, da iʼi tsa tsedi ya, iʼi ta klafta! » kaʼa. Ka ma ni mantsa: « Ka tfanagha tfa Yawe ta wi ta zwaŋa ɗa! » kaʼa.

³ Ka vranavatá tsi tama ta tsa sulay dəmbuʼ nda dərmək (1.100) ya ta ma ni. Ka ma ni mantsa: « Fana fa yu ta Yawe ta na tsedi na nda ŋuɗuf turtuk, ka vlaŋta nda dzva ɗa ta zwaŋa ɗa, ŋa tsatsafta ni ta skwa wuyay nda sana fwatu ka kfur nwap lu. Mantsa ya ta vravaghata yu, » kaʼa.

⁴ Ka vranavatá tsi tama ta tsa tsedi ya ta ma ni. Ka klaftá ma ni ta sulay his dərmək, ka vlaŋtá mnda nwaptá kfur. Ka tsatsaftá tsaya ta skwa wuyay nda sana fwatu ka kfur nwap lu, ka pghata ma həga ga Mika.

⁵ Ka baftá Mika ta həga ŋa tsəlɓu ŋa lazglaftaha, magafha ta ifut, nda skwa wuyayha. Ka fatá tsi ta sana zwaŋa ni ka mnda dra skwi ŋa lazglafta, ŋa maganatá slna.

⁶ Ta tsa zamana ya ná, haɗ si mgham da la Israʼila wa. Dər wa ta maga skwi ta zɗəganata.

⁷ Mamu sana duhwala la Betʼlehem ma Yuda, la Yuda ta uʼa taŋ. La Levi ya ta nzakw hada ka mayəm.

⁸ Ka sliʼaftá tsa mndu ya ma luwa Betʼlehem ma Yuda, da zba vli ta zɗəganata ŋa nzakwa ni. Ma tsa mbaɗa ni ya, ka lagha tsi slafta ta həga Mika ta kwakwar ta ghwá la Ifrayim.

⁹ Ka Mika nda tsi mantsa: « Si ga ka na? » kaʼa. Kaʼa nda tsi mantsa: « Mnda la Levi ma Betʼlehem da la Yuda yu. Ta dzaʼa da zba vli ta zɗagihata ŋa nzakwa ɗa yu, » kaʼa.

¹⁰ Ka Mika nda tsi mantsa: « Nza nza ga ini, ka nzakwa ka ka da nda ya ka mnda dra skwi ŋa Lazglafta. Dzaʼa vlagha vla yu ta sulay ghwaŋ ma vaku, nda lgutha, nda skwa zay, » kaʼa. Ka lam tsa mnda la Levi ya nzata ga Mika.

¹¹ Ka tsuʼaftá tsa mnda la Levi ya ta nzata ga taŋ, ka klaftá Mika manda sani ma zwaŋa ni.

¹² Ka famtá tsi ta tsa mnda la Levi ya ma slna ni, ka nzakw tsa duhwal ya da tsi ka manda dra skwi ŋa Lazglafta, ka nzatá tsi ga taŋ.

¹³ Ka Mika tama mantsa: « Ndanana, nda sna yu kazlay na dzaʼa magiha maga Yawe ta zɗaku kəʼa, kabga wana na mnda la Levi na ga ini, ka mnda dra skwi ŋa Lazglafta, » kaʼa.