2Sam 9 - Hdi

Klakta Dawuda ta Məfivuset da taŋ

¹ Ma sana fitik, ka ɗawaŋtá Dawuda, kaʼa mantsa: « Ta mamu pɗakwa mndu tata hafu ga Sawulu, ka maganata yu ta zɗaku dabga Yunataŋ ra? » kaʼa.

² Mamu sana mndu si ta ksa slna ga Sawulu, Tsiva hga ni. Ka hgadaghatá lu da Dawuda. Ka mgham Dawuda nda tsi mantsa: « Kagha Tsiva ra? » kaʼa nda tsi. « Va ɗa ya mghama ɗa! » kaʼa.

³ Ka mgham mantsa: « Ta haɗ sana mndu ga Sawulu ka maganata yu ta zɗakwa Lazglafta ra? » kaʼa. Ka Tsiva nda mgham mantsa: « Ta mamu pɗakwa zwaŋa Yunataŋ nda rwa səlaha ni his his, » kaʼa.

⁴ Ka mgham nda tsi mantsa: « Ga ta nzakwa tsi na? » kaʼa. Ka Tsiva nda mgham mantsa: « Ga Mahir, zwaŋa Ghamiʼel ma Ludəvar, » kaʼa.

⁵ Ka ghunadaptá mgham Dawuda ta mndu da Mahir, zwaŋa Ghamiʼel ma Ludəvar da klakta.

⁶ Ka lagha Məfivuset, zwaŋa Yunataŋ, zwaŋa Sawulu da Dawuda. Ka zləmbatá tsi zlumbruh ta haɗik ta kəma ni. « Məfivuset! » ka Dawuda hgaŋta. « Wana kwalva gha mghama ɗa! » kaʼa.

⁷ Ka Dawuda nda tsi mantsa: « Ma zləŋ ka ta zləŋ. Ta kumay yu ta magaghatá zɗaku dabga da gha Yunataŋ. Dzaʼa vravagha vra yu ta inda haɗika dzidza gha Sawulu. Dzaʼa gɗa gɗa ka ta za skwa zay ta kuwata ɗafa ɗa guli, » kaʼa.

⁸ Ka zləmbatá tsi, kaʼa mantsa: « Wa kwalva gha ŋa mbəɗavata gha təv iʼi mtatá kri ní, mghama ɗa? » kaʼa.

⁹ Ka hgaŋtá mgham ta Tsiva, si kwalva Sawulu ya, kaʼa nda tsi mantsa: « Ta vlaŋ vla yu ta Məfivuset, zigha daŋahəga gha ta inda skwa Sawulu nda ŋa la ga taŋ tani.

¹⁰ Kagha nda zwana gha, nda kwalvaha gha, dzaʼa hvanatá hva, kada mutsafta zigha daŋahəga gha ta fa dzvu da wi. Ama Məfivuset, zigha daŋahəga gha ya, ta kuwata ɗafa ɗa dzaʼa za tsi ta skwa zay inda fitik ma vla za skwa zay ɗa, » kaʼa. Tsaw mamu zwana Tsiva ghwaŋpəɗ hutaf, hisambsak kwalvaha ni guli.

¹¹ Ka Tsiva nda mgham mantsa: « Dzaʼa magay kwalva gha ta inda skwi ya mnanaf mgham ta kwalva ni, » kaʼa. Ka zə Məfivuset ta skwa zay ta kuwata ɗafa mgham manda ya ta zə zwana mgham.

¹² Mamu zwaŋa Məfivuset ka galaɓay, Mihaʼ hga ni. Ka kwalva Məfivuset inda gwal si ta nzakw ga Tsiva.

¹³ Ka nzatá Məfivuset ma Ursalima, kabga ta kuwata ɗafa mgham ta gɗata tsi ta za skwa zay. Nda rwa səlaha ni his his.