2Sam 5 - Hdi

Famtá Dawuda ka mghama inda la Israʼila

¹ Ka sliʼadaghatá inda mndəra la Israʼila da slanaghatá Dawuda ma Hevruŋ, ka həŋ mantsa: « Wana ŋni, sluʼuvgha gha ŋni, usa gha ŋni.

² Ghalya, ma fitika nzakwa Sawulu ka mghama ŋni ná, kagha si ta kla kəma ŋa la Israʼila ma vulu, kagha ta vranaktá həŋ. Ka Yawe mnaghata na: “Kagha dzaʼa nghapta ka mnduha ɗa la Israʼila, kagha dzaʼa nzakway ka mala taŋ,” kaʼa » ka həŋ.

³ Mantsa tama, ka sliʼadaghatá inda galata mnduha la Israʼila slanaghatá mgham Dawuda ma Hevruŋ. Hada, ka dzraftá mgham ta wi nda həŋ ta kəma Yawe. Ka fatá həŋ nda ma pghanaghatá rɗi ta Dawuda ŋa nzakwa ni ka mgham ta ghəŋa la Israʼila.

⁴ Hkən mbsak ima Dawuda ta nzatá tsi ka mgham. Fwaɗ mbsak vakwa ni ta ga mgham.

⁵ Ndəfáŋ nda rita vakwa ni ta ga mgham ta ghəŋa la Yuda ma Hevruŋ, hkən mbsak hkən mida vakwa ni ta ga mgham ta ghəŋa inda la Israʼila nda la Yuda tani ma Ursalima.

Zata Dawuda ta Ursalima nda vulu

⁶ Ka sliʼaftá mgham Dawuda nda mnduha ni ka lagha da Ursalima ka liŋtá la Yəbus ta nzakway ta tsa haɗik ya nda vulu. Ka həŋ nda Dawuda mantsa: « Haɗ ka dzaʼa sami da hadna wa. Dər gwal nda ghulpa nda gwal ta dzəgiɗi ná, prək ka ghəzlaftá kagha, » ka həŋ kabga haɗ Dawuda dzaʼa sami da hadna wu, ka həŋ ta ndanay.

⁷ Ama ka zluʼatá Dawuda ta Tsiyuŋ vli ya ŋam lu ma matsaka huzlu, ta hgə lu tahula tsa ka luwa Dawuda ya.

⁸ Baɗ tsaya, ka Dawuda mantsa: « Ka ta kumay mndu ta zatá la Yəbus katsi, dzaʼa lam nda ta ghuruma saba imi lu, ŋa dɗanaghatá tsa gwal nda ghulpa nda gwal ta dzəgiɗi, gwal ta husaŋtá Dawuda ya, » kaʼa. Tsaya ta kəl lu ka mnay kazlay na: Haɗ gwal nda ghulpa nda gwal ta dzəgiɗi dzaʼa lami da həga Lazglafta wu kəʼa ya.

⁹ Ka nzamtá Dawuda ma tsa vli ŋam lu ma matsaka huzlu ya, ka tsanaftá tsi ta hgu ka luwa Dawuda. Ka bəglaftá tsi ta tsa luwa ya ka wanafta, zlrafta ta ghərzla ta hgə lu ka Milu dikw nda ma huɗi.

¹⁰ Ka dzaʼa mbrakwa Dawuda ta kəma ta kəma, kawadaga Yawe, Lazglafta mghama gwal vulu nda tsi.

¹¹ Ka ghunadaghatá Hiram, mghama Tir ta gwal ghunay da Dawuda nda udzuha sedra, nda gwal fiɗi, nda gwal ratsa pala, ka banaftá həŋ ta həga ta Dawuda.

¹² Ka graftá Dawuda tama kazlay na, Yawe ta vlaŋtá ga mgham ta ghəŋa la Israʼila, ka ŋlanaftá ga mghama ni, kabga ɗvuta ni ta mnduha ni la Israʼila, kəʼa.

Zwana Dawuda ta yayata ma Ursalima

¹³ Tahula sliʼafta Dawuda ma Hevruŋ ka laghwi da Ursalima da nzata hada, ka hləglaftá tsi ta miʼa sanagha, nda sanlaha ma miʼi, ka yayəglatá tsi ta zwana zgwana nda kuʼaha.

¹⁴ Wya hga tsa zwani yaya tsi ma Ursalima ya: I Samuwa, nda Suvav, nda Nataŋ, nda Salumuŋ,

¹⁵ nda Yivhar, nda Ilisuwa, nda Nefeg, nda Yafigha,

¹⁶ nda Ilisama, nda Ilyada, nda Ilifelet.

Zata Dawuda ta ghwa ta ghəŋa la Filisti

¹⁷ Ka snaŋtá la Filisti kazlay na: Fa fa lu ta Dawuda nda ma pghanaghatá rɗi ka mgham ta ghəŋa la Israʼila kəʼa. Ka sliʼadaftá həŋ demdem da zba ksaftá Dawuda, ama ka snanamtá lu ta Dawuda, ka laha tsi da vla ɗifa ma matsaka huzlu.

¹⁸ Ka sliʼadatá la Filisti tamta vgha sɓət ma didiŋa la Rafa.

¹⁹ Ka ɗawaŋtá Dawuda da Yawe, kaʼa nda tsi mantsa: « Ka ŋla yu da vulu nda la Filisti ra? Dzaʼa vla vla ka ta həŋ ma dzva ɗa ra? » kaʼa. Ka Yawe nda Dawuda mantsa: « Ŋla, kabga dzaʼa vla vla yu kahwathwata ta la Filisti ma dzva gha, » kaʼa.

²⁰ Ka lagha Dawuda da Baghalʼpəratsim, ka zatá tsi ta ghwa ta ghəŋa taŋ hada, kaʼa mantsa: « Yawe ta tanatá ghumaha ɗa, manda ya ta tuta ŋatá ghwa ya, » kaʼa. Tsaya kəl lu ka tsanaftá hgu ta tsa vli ya ka Baghalʼpəratsim.

²¹ Ka zlanavatá la Filisti ta skwa wuyayha taŋ ma tsa vli ya, ka hlaghatá i Dawuda nda mnduha ni.

²² Ka sliʼigladaghatá la Filisti ka mahis tamtá vgha ma didiŋa la Rafa.

²³ Ka ɗawaŋtá Dawuda da Yawe ta skwi ŋa magay ni. Ka Yawe nda tsi mantsa: « Ma laf ka, tsanagha tsa ta wara wara ta həŋ nda ta hul, ka dɗanaghata ka ta həŋ ma vla fuha ta hgə lu ka balsam ya.

²⁴ Na snay gha ta ghudzaga səla ta kuzibiɗima tsa fuha ya, ka ŋavata ka, kabga Yawe tsaya ta mbaɗa ta kəma gha ŋa zatá ghwa ta ghəŋa la Filisti, » kaʼa.

²⁵ Ka magatá Dawuda manda ya mnanaf Yawe, ka pslatá tsi ta la Filisti daga ma Gevagh ha ka lagha da Gezer.