2Sam 4 - Hdi

Dzata i Rehav nda Baghana ta Isbuset

¹ Manda snaŋta Isbuset zwaŋa Sawulu ta mtatá Avner ma Hevruŋ, ka nzatá tsi rabadakw, ka hlutá zləŋ ta inda la Israʼila.

² Si his maliha ta ghəŋa bakwa gwal vula tsa zwaŋa Sawulu ya. Baghana hga sani, Rehav hga sani, zwana Rimuŋ mnda la Bəʼerut mataba la Biŋyamiŋ həŋ. Tsa Bəʼerut ya ná, mbəɗam mataba kwakwara la Biŋyamiŋ lu.

³ Si hwahwayagha da Gitayim la Bəʼerut, ka nzatá həŋ ka mayəm hada ma vli ta nzakw zivira taŋ ha gitana ya.

⁴ Tsaw mamu zwaŋa Yunataŋ, zwaŋa Sawulu nda rwa səlaha ni his his. Hutaf ima ni ta sagha lwi ma Yizrəghel ta ghəŋa skwi ta slanaghata i Sawulu nda Yunataŋ. Ka klaftá sana marakw ta glay ka hwaya nda tsi. Ma tsa ŋavata ni ka hwaya ya, ka dɗagaghutá tsi, ka nzatá tsi gumbulɗuk. Məfivuset hga ni.

⁵ Ka sliʼaftá i Rehav nda Baghana, zwana Rimuŋ, mnda la Bəʼerut nda ghəɗandaŋata fitik, ka ɓhadaghatá həŋ da Isbuset. Ta tutá hana ni Isbuset gifitik.

⁶ Ka lam həŋ ha da huɗa həga manda gwal ta dzaʼa klagaptá alkama, ka sliglatá həŋ ma huɗi. Tahula tsa ka hwayaghutá i Rehav nda zwaŋama ni Baghana.

⁷ Ma tsa lama taŋ da həga ya, ka slanaghata həŋ ta Isbuset dza hani ta ghəzləŋa ni ma dzuguvi. Ka sliglatá həŋ ka dzata, ka tsaghutá ghəŋa ni ka laghwi nda tsi ya, ka han həŋ ta mbaɗa ma Gharava.

⁸ Ka klədanaghatá həŋ ta ghəŋa Isbuset ta Dawuda ma Hevruŋ. Ka həŋ nda mgham mantsa: « Wana ghəŋa Isbuset, zwaŋa Sawulu ghuma gha si ta kuma klaptá hafu ma kagha ya kay. Yawe ta planamta gita ta rveri, mghama ŋni, ŋa Sawulu nda zivirha ni tani, » ka həŋ.

⁹ Ama ka Dawuda zlghanaftá wi ta i Rehav nda zwaŋama ni Baghana zwana Rimuŋ, mnda la Bəʼerut mantsa: « Ta waɗa waɗa yu nda hga tsa Yawe nda hafu mida ta katagaɗipta ma inda ghuya ɗaŋwa ya,

¹⁰ tsa mndu ta sagha da mnay ŋa ɗa: “Nda mta Sawulu” kəʼa, ta ndanay kazlay ŋərma gwaɗa ya mnana yu kəʼa ya ná, ka ksaftá yu ka dzata ma Tsiklag ka vlaŋtá nisəla gwaɗa ni.

¹¹ Kighkigh dzaʼa nzakwa tsi nda ghwaɗaka mnduha ta dzatá tɗukwa mndu ma həga ni ta ghəzləŋa ni, ɗawta a yu ta usa ni da kaghuni ka zaɗaghunata ta ghəŋa haɗik wu ra? » kaʼa.

¹² « Pslawa psla ta həŋ, » ka Dawuda mnanaftá duhwalha ni, ka pslatá həŋ ta i Rehav nda Baghana. Ka ɗatsaghutá həŋ ta dzvuha taŋ, nda səlaha taŋ, ka hahagatá həŋ ta wa ghwa tsap lu ma Hevruŋ. Tahula tsa, ka klaftá həŋ ta ghəŋa Isbuset ka laghwi da lamta ma kula Avner ma Hevruŋ.