2Sam 18 - Hdi

Zata ghwa ta ghəŋa ghuɓa Avsalum

¹ Ka tsakanatá Dawuda ta sludziha mista ni, ka pghamtá tsi ta maliha ta ghəŋa mnduha dəmbuʼ dəmbuʼ nda maliha ta ghəŋa dərmək dərmək.

² Ka daganaptá Dawuda ta gwal vulu ka bakuha hkən, ka fatá tsi ta Yuʼav zwaŋa Tseruya ka mali ta ghəŋa baku turtuk. Faha ta Avisay zwaŋama ni ma Yuʼav ka mali ta ghəŋa mahisa baku. Faha ta Itay mnda la Gat ka mali ta ghəŋa mahkəna baku. Ka mgham nda gwal vulu tama mantsa: « Ta dzaʼa yu kawadaga nda kaghuni, » kaʼa.

³ Ama ka sludziha nda tsi mantsa: « Ləta a ka wa! Ka dzaʼa hwayaf hwaya mu, nghapta a lu ka aŋni wa. Dər má dzaʼa rwu rwa rita amu, kulaŋta a lu wu, kabga kagha ná, malaghu mala kagha ta aŋni dəmbuʼ ghwaŋ (10.000). Katək ná, ta draŋ nzata kagha ma luwa ŋa ghuna katu ŋa aŋni, » ka həŋ.

⁴ Ka mgham nda həŋ mantsa: « Dzaʼa magay yu manda ya ta zɗəgaghunata, » kaʼa. Ka sladatá mgham ta vata wa tgha luwa, ta sliʼagaptá bakwa mnduha dərmək dərmək, nda ya ka dəmbuʼ dəmbuʼ.

⁵ Ka mgham mnanaftá ta i Yuʼav, nda Avisay, nda Itay mantsa: « Kdəkwakdək, ɗaswa ka kuni dá balanatá kuni ta tsa duhwal ka Avsalum ya! » kaʼa. Nda sna inda sludziha ta mnanaftá mgham ta tsa gwaɗa ta ghəŋa Avsalum ya ta inda maliha.

⁶ Ka sliʼaghatá gwal vula Dawuda da mtak da guyatá nda vulu nda la Israʼila. Ka vulu lu ta tsa vulu ya ma həga fuha da la Ifrayim.

⁷ Hada, ka zatá sludziha Dawuda ta ghwa ta ghəŋa la Israʼila. Dagala mnduha psla lu katakata, dəmbuʼ hisambsak (20.000) mnduha ta rwuta hada baɗ tsaya.

⁸ Ka tutá tsa vulu ya dər ndiga ndiga ta tsa kwakwar ya. Baɗ tsaya, mal gwal rwana tsa həga fuha ya ka ya rwana lu nda kafay.

Dzata Yuʼav ta Avsalum

⁹ Ta plisa ghwandala ni Avsalum, ta gi gmata tsi gwedza gwedza nda sludziha Dawuda. Ka hwayaftá tsa plis ya ka ndadapta mista sana halalaya fu, ka laghu zligama tsa fu ya həts da swida ghəŋa Avsalum. Ka nzatá tsi kaŋal ta luwa, ta kɗaŋtá tsa plisa ghwandala si nzaf tsi tida ya ta tva ni.

¹⁰ Ka nghaŋta sana mndu, ka mnanatá tsi ta Yuʼav, kaʼa mantsa: « Nda ngha yu ta Avsalum kaŋala ta halalaya fu, » kaʼa.

¹¹ Ka Yuʼav nda tsa mndu ta mnay ŋa ni ya mantsa: « Va nda ngha ka ra! Kabgawu kwal ka dzata hada ɓa? Má dzaʼa vlagha vla yu ta sulay ghwaŋ nda ɓanava turtuk, » kaʼa.

¹² Ka tsa mndu ya nda Yuʼav mantsa: « Dər má ŋa vlihatá sulay dəmbuʼ (1.000) tsi, haɗ yu dzaʼa faftá dzvu ta zwaŋa mgham wa. Nda sna sləməŋa ŋni ta skwi ya mnaghunaf mgham, ta kagha nda Avisay nda ya nda Itay. Kaʼa na: “Kdəkwa kdək, ɗaswa ka kuni dá ksaŋtá kuni ta tsa duhwal ka Avsalum ya!” kəʼa.

¹³ Ka má ta dzata yu manda mndu kul snaŋta, haɗ skwi dzaʼa pyaftá tsatsafta mgham ta tsakalawa ɗa wa. Haɗ skwi dzaʼa kagha magata ŋa kataptá iʼi wu, » kaʼa.

¹⁴ Ka Yuʼav mantsa: « Haɗ yu dzaʼa laghwi gərɗa vgha ɗa ta vata kagha wu, » kaʼa. Ka hlaftá tsi ta gupaha hkən ma dzva ni, ka dzadzanamta da ŋuɗuf ta Avsalum. Ta ndiri tsatsi kaŋala ma takataka halalaya fu,

¹⁵ ka tskanavatá duhwalha ghwaŋ ta hla huzla vula Yuʼav ta vgha ta Avsalum, ka kɗiŋtá həŋ ta dzata.

¹⁶ Ka vyatá Yuʼav ta duli ŋa sladanatá vulu. Ka zlaŋtá sludziha Dawuda ta zbiŋtá la Israʼila.

¹⁷ Ka klaftá həŋ ta mbla Avsalum ka vzaghata da gudzuvruŋ ma takataka həga fu. Ka banaghatá həŋ ta ŋira pala. Ka hwahwayaghutá la Israʼila demdem dər wa dzagha ni.

¹⁸ Ta má nzakwa Avsalum ta nda hafu, ka dzugwatá tsi ta pala ŋa havay ma didiŋa Mgham, kaʼa ma ghəŋa ni na: « Haɗ zwaŋa ɗa ŋa tsaftá hga ɗa wu, » kaʼa. Ka tsanaftá tsi ta hgu ta tsa pala ya nda vərɗa hga ni. Ha gita, « Palaka hava Avsalum, » ka lu ta hgay.

Snanaghata mtata Avsalum ta Dawuda

¹⁹ Ka Ahimaghats zwaŋa Tsaduk nda Yuʼav mantsa: « Zliha zla ka hwaya yu da mnanatá mgham ta na gwaɗa zɗaku, ta tsanaghata Yawe ta guma ta ghumaha ni, ka katapta ma dzva taŋ na, » kaʼa.

²⁰ Ka Yuʼav nda tsi mantsa: « Nzata a ka ka mnda ghunay ŋa mna gwaɗa zɗaku gita wa. Baɗ sana fitik dzaʼa nzakwa ka, gita a wu, kabga nda mta zwaŋa mgham, » kaʼa.

²¹ Ka Yuʼav nda sana mnda la Kus mantsa: « La da mnanatá mgham ta skwi ya nghaŋ ka, » kaʼa. Ka zləmbata tsa mnda la Kus ya zlumbruh ta kəma Yuʼav, ka sliʼaftá tsi ka laghwi misimmisim nda hwaya.

²² Ka Ahimaghats zwaŋa Tsaduk ka ŋəɗa ŋəɗa nda Yuʼav guli mantsa: « Ka dər nahgani dzaʼa magaku, zliha zla ka hwayiŋta yu ta tsa mnda la Kus ya, wya dzvu, » kaʼa. Ka Yuʼav mantsa: « Kabgawu ta kuma ka ta hwayiŋta ní, sagəŋ? Gwaɗa ŋa mutsafta gha ta nisəla wu ya na? » kaʼa.

²³ « Dər nahgani dzaʼa magaku, ka hwayiŋ hwaya yu, » ka Ahimaghats kay guli. Ka Yuʼav nda tsi tama mantsa: « Hwayiŋ hwaya tsa! » kaʼa. Ka hwayaftá Ahimaghats ka ksaftá tvi nda ma daɓa Yardeŋ, ka klatá wa tsa mnda la Kus ya.

²⁴ Ta nzaku Dawuda ma takataka wa tgha nda ma bli, nda ya nda ma huɗa luwa. Ta wawaku mnda nghapta ta wa lilwa ta dədəmatá vli ta matsak ta ghəŋa tsa tgha ya. Ka klaŋtá tsi ta ghəŋ, ka nghaŋtá tsi ta mndu ta hwaya turtukwa ni.

²⁵ Ka gugɗatá mnda nghapta ta wa lilwa ŋa snanamta mgham. Ka Mgham mantsa: « Ka turtukwa ni tsi ná, gwaɗa zɗaku tsa ta klakta tsi, » kaʼa. Ka va ndusadaghatá tsa mndu ya,

²⁶ ka nghaŋtá tsa mnda nghapta ta wa lilwa ya ta sana mndu ta hwaya guli. Ka gugɗaktá tsi ka mnda ngha wa tgha, kaʼa mantsa: « Wa a sana mndu ta hwaya turtukwa ni, » kaʼa. Ka mgham mantsa: « Gwaɗa zɗaku ta klakta tsaya guli, » kaʼa.

²⁷ Ka mnda nghapta ta wa lilwa mantsa: « Ta nghə yu ta tvana hwaya tsa taŋtaŋa mndu ya ná, manda ŋa Ahimaghats zwaŋa Tsaduk nzakwa ni, » kaʼa. Ka mgham mantsa: « Vərɗa mndu ya, gwaɗa zɗaku ta klakta tsi, » kaʼa.

²⁸ Ka gugɗatá Ahimaghats, kaʼa nda mgham mantsa: « Ɗughwana nzakwa vli! » kaʼa. Ka zləmbatá tsi zlumbruh ta haɗik ta kəma mgham, kaʼa nda tsi mantsa: « Rfu ŋa Yawe, Lazglafta gha! Vla vla ta zata ghwa ta ghəŋa gwal si ta uwalaŋta dza kuma nda mgham, rvera ɗa! » kaʼa.

²⁹ Ka mgham mantsa: « Kinawu tsa duhwal ka Avsalum ya, ta ɗughwana suʼu? » kaʼa. Ka Ahimaghats mantsa: « Nda ngha yu ta kakatsawarakwa mnduha katakata ma fitika ghunafta Yuʼav ta kwalva mgham turtuk, nda iʼi kwalva gha ya, ama sna a iʼi ta skwi ta magaku wu, » kaʼa.

³⁰ Ka mgham mantsa: « Gavaghu gava gha ta slərpu ka sladata ka hada, » kaʼa. Ka gavaghutá Ahimaghats ka sladaghuta.

³¹ Ka gi ɓhadaghatá mnda la Kus, kaʼa mantsa: « Ka sna mghama ɗa ta gwaɗa zɗaku! Gita, tsa tsa Yawe ta guma nda ma kataghapta ni ma dzva inda gwal ta dzaŋtá kuma nda kagha, » kaʼa.

³² Ka mgham nda tsa mnda la Kus ya mantsa: « Kinawu tsa duhwal ka Avsalum ya, ta ɗughwana suʼu? » kaʼa. Ka tsa mnda la Kus ya mantsa: « Ka nza skwi ta slanaghatá tsa duhwal ya, ka ŋa ghumaha rveri, mghama ɗa, nda inda gwal ta dzaŋtá kuma nda kagha ŋa magaghatá ghwaɗaka skwi ya, » kaʼa.