2Sam 15 - Hdi

Zbay Avsalum ta ga mgham

¹ Tahula tsa, ka mutsaftá Avsalum ta htsiŋa ŋa ni ma mwata plis, nda plisha, nda mnduha hutaf mbsak ta hwaya ta kəma ni.

² Ta tsavaf tsava Avsalum wrək sərɗək ka nzata ta wa tvi ta lagha ta wa tgha luwa. Inda laba mndu nda gwaɗa ni ta dzaʼa da mgham ŋa dganata ya, hgaghuta Avsalum. Kaʼa tazlay nda tsi mantsa: « Sagha ma luwa ga ka na? » kaʼa. Ka ka tsa mndu ya zlghanaftá wi mantsa: « Sani ma mndəra la Israʼila kwalva gha yu, » ka kaʼa ya,

³ ka Avsalum nda tsi tazlay mantsa: « Ta tva ni gwaɗa gha, tɗukwa guli, kweŋkweŋ ná, haɗ mndu ŋa snaghata ga mgham wu, » kaʼa.

⁴ Ka Avsalum tazlay na: « Ka má ta famtá lu ta iʼi ŋa tsa guma ta na haɗik na na, má da iʼi dzaʼa sagha inda mndu nda gwaɗa ni ŋa dganata ɗa, má dzaʼa tsana tsa yu tɗukwa ta guma ta həŋ, » kaʼa.

⁵ Ma lagha ta lagha mndu zləmbata zlumbruh ta kəma ni ná, ta fadap fa ta dzva ni ka ŋanata, ka brusay.

⁶ Manda tsaya ta maga Avsalum ŋa inda la Israʼila ta lagha da mgham da paha dganatá guma taŋ. Mantsa ya, ka sutá tsi ta ghəŋa la Israʼila.

⁷ Tahula vaku fwaɗ mbsak, ka Avsalum nda mgham mantsa: « Vliha vla ta tvi ka dzaʼa yu da Hevruŋ da hɗamtá wuɗu ya waɗana yu ta Yawe.

⁸ Iʼi kwalva gha ná, mamu waɗu waɗa yu ma fitika nzakwa ɗa ma Gesur ta haɗika Aram. Ka yu na: “Ka vradaɗigha vra Yawe da Ursalima katsi, dzaʼa plana pla yu ta ghəŋ,” ka yu, » kaʼa.

⁹ Ka mgham nda tsi mantsa: « La nda vghata zɗaku! » kaʼa. Mantsa tama, ka sliʼaftá Avsalum ka laghwi da Hevruŋ.

¹⁰ Ma tsa vli ya, ka ghwanaftá Avsalum ta gwal ghunay ni kɗekkɗek da inda mndəra la Israʼila nda mnay ŋa taŋ kazlay na: « Ka nda sna kuni ta vyata lu ta duli ya ná, ka mna kuni: “Nda fa Avsalum ka mgham ma Hevruŋ,” ka kuni dazlay, » kaʼa.

¹¹ Ma fitika sliʼafta Avsalum ma Ursalima ka laghwi da Hevruŋ ná, mnduha his dərmək (200) ta laghwi mista ni. Ta hagaghatá tsi ta həŋ ná, laghwi mantsa ya hahəŋ haɗ sana skwi snaŋ həŋ wa.

¹² Ma fitika vlata Avsalum ta pla ghəŋha, ka ghunaftá tsi ma luwa Gilu ta mndu ŋa hganaktá Ahitufel mnda la Gilu, mnda vla hiɗaku ŋa Dawuda. Ka sgaku mbrakwa tsa gatá sidi ya, ka sgaku ndəghatá mndu ta dzaʼa mista Avsalum.

Hwayapta Dawuda ma Ursalima

¹³ Ka lagha sana mndu da mnanatá Dawuda, kaʼa mantsa: « Laghu la ŋuɗufa la Israʼila mista Avsalum, » kaʼa.

¹⁴ Ka Dawuda tama nda inda kwalvaha ni, ta nzakw kawadaga nda tsi ma Ursalima mantsa: « Sliʼafwa sliʼa ka hwaya mu! Ka mantsa a tsi wu, haɗ sana tva mu ya ŋa ndapta mu ma dzva Avsalum wa. Mbaɗwa misimmisim! Ka mantsa a tsi wu, dzaʼa gi sagha sa da slamaghata ŋa gi klamaktá zləmnda, dzaʼa psla psla ta mnduha ma luwa nda kafay, » kaʼa.

¹⁵ Ka kwalvaha mgham nda tsi mantsa: « Dər ŋa magay kawu kawu tsi, nda fa vgha kwalvaha gha, dzaʼa magay aŋni ta inda skwi dzaʼa kurata rveri, mghama ŋni, » ka həŋ.

¹⁶ Ka sab mgham tama nda inda gwal ga taŋ mista ni, ta ghəŋa miʼa sanagha ni ghwaŋ yeya zlana tsi ŋa ngha həga ga mgham.

¹⁷ Ka laghu mgham nda inda mnduha ni mista ni, ka sladavatá həŋ ta kwanaha həga.

¹⁸ Ka sliʼadaptá inda kwalvaha ni, nda inda la Kəret, nda inda la Pəlet, nda inda la Gat ta kəma mgham, ta lab tsa sludziha mkuʼ dərmək (600) ta sliʼafta mista ni daga ma Gat ya nda ta kəma mgham.

¹⁹ Ka mgham nda Itay mnda la Gat mantsa: « Kabgawu dzaʼa kəl kagha ka dzaʼa mista ŋni na? Vra ka dzaʼa ka nzata kawadaga nda lfiɗa mgham, kabga mayəm kagha. Ghəzlaghak nda ghəzla lu ta haɗika gha.

²⁰ Ɗahawu u na sagha ka ná, ka gi klay ɗa ta kagha gita gita ka dzaʼa ra vli, sna a dər vərɗa iʼi ta vli ta dzaʼa slata yu wu ra! Vra da luwa ka hlíŋta ka ta zwana ma gha mista gha. Ka nza zɗaku nda zɗakatahuɗi nda kagha! » kaʼa.

²¹ Ka Itay nda mgham mantsa: « Ta waɗa waɗa yu nda hga Yawe nda hafu mida, nda ya nda hafa rveri, mghama ɗa, ma vli hada mgham, rvera ɗa, dər ŋa mtutá tsi, dər ŋa nzata nda hafu a tsi ya, hada guli dzaʼa nzata kwalva gha! » kaʼa.

²² Ka Dawuda nda Itay tama mantsa: « Aray lab la ta kəma! » kaʼa. Ka sliʼadaptá i Itay mnda la Gat, nda inda mnduha ni, nda inda gwal mista ni kawadaga nda tsi.

²³ Ka wahu inda mnduha ta tsa haɗik ya ta wahu dagala dagala nda ima taw ta sliʼi həŋ. Ka laf mgham nda ma lika Kidruŋ kawadaga nda inda mnduha, ka ksa tvi ta dzaʼa nda ma mtak.

²⁴ Hada i Tsaduk nda Aviyatar gwal dra skwi ŋa Lazglafta guli, kawadaga nda inda la Levi gwal ta kla akwata dzratá wa Lazglafta. Ka fatá həŋ ta tsa akwata dzratá wa Lazglafta ya ta haɗik, ha ka kɗivista mnduha ta saghwi ma luwa.

²⁵ Ka mgham nda Tsaduk mantsa: « Vriŋ vra ta akwata dzratá wa Lazglafta da luwa! Ka zɗəɗiŋ zɗa Yawe ta huɗi, dzaʼa vraɗik vra da hadna, ŋa nghəglaŋta ɗa ta akwata dzratá wi, nda vla nzakwa ni.

²⁶ Ama ka kaʼa mantsa: “Zɗigiha a ka wu,” kaʼa ya, nda fa vgha ɗa, ka magihata tsi ta skwi ta zɗəganata, » kaʼa.

²⁷ Ka mgham nda Tsaduk mnda dra skwi ŋa Lazglafta guli mantsa: « Nda sna ka re? Vra nda vghata zɗaku da luwa kawadaga nda i zwaŋa gha Ahimaghats nda Yunataŋ, zwaŋa Aviyatar, vrawa nda zwana ghuni his his.

²⁸ Snawa, dzaʼa kəzlay yu ma daɓiha ma mtak, ha ka snaŋta ɗa ta lwa gwaɗa dzaʼa sagha da kaghuni, » kaʼa.

²⁹ Mantsa tama, ka vríŋtá i Tsaduk nda Aviyatar ta akwata dzratá wa Lazglafta da Ursalima, ka nzatá həŋ hada.

Vriŋta Dawuda ta Husay da sunaptá Avsalum

³⁰ Ka ŋlə Dawuda ta ghwá Zaytuŋ. Ka laf tsi nda hərɓa taw, nda bukwatá ghəŋ, ɓaɓah a ma səla ni wa. Ka bubukwanatá inda tsa gwal ta dzaʼa mista ni ya guli ta ghəŋ, ka ŋlə həŋ ka dzaʼa nda hərɓa taw.

³¹ Ka lagha lu da mnay ŋa Dawuda kazlay na: « Waʼa Ahitufel kawadaga nda Avsalum, waʼa mataba tsa gwal ta ga sidi ya, » kaʼa. Ka Dawuda mantsa: « Ari Yawe, wya dzvu, niŋ na ka makusiɓit ta hiɗaku ta vlata Ahitufel! » kaʼa.

³² Ta ŋladaftá Dawuda ta bɗəma ghwá, ma vli ta snuta lu ta vla glaku ta kəma Lazglafta, ta kəzlay kəzlay Husay la Arki hada, nda kwahatá lgut, nda klubuŋwatá ghəŋ ka haɗik.

³³ Ka Dawuda nda tsi mantsa: « Ka ta dzaʼa mista ɗa ka katsi ná, dzaʼa tsiɗagha tsa ka ta ndəgaku.

³⁴ Ama ka vraghu vra ka da luwa, ka mnanata ka ta Avsalum kazlay na: “Dzaʼa nzakway yu ka kwalva gha, mghama ɗa. Si kwalva da gha yu ghalya, ama ndanana, nda nza yu ka kwalva gha kəʼa,” dzaʼa niŋ na ka ka makusiɓit ta hiɗakwa Ahitufel.

³⁵ Hada ta vata kagha a i Tsaduk nda Aviyatar gwal dra skwi ŋa Lazglafta dzaʼazlay wu ra? Inda skwi dzaʼa snaŋta ka ma həga ga mgham na, ka snanamta ka ta həŋ.

³⁶ Wya kawadaga həŋ nda zwana taŋ his, i Ahimaghats zwaŋa Tsaduk, nda Yunataŋ zwaŋa Aviyatar. Nda təv hahəŋ dzaʼa sniɗimta ka ta inda skwi dzaʼa kuni snaŋta, » kaʼa.

³⁷ Ka vraghatá Husay gra Dawuda tama da luwa Ursalima, təp nda tsa fitika lama Avsalum ya.