2Sam 10 - Hdi

Kwal kul tsuʼaftá mnduha Dawuda

¹ Tsəɓakw fitik tahula tsa, ka mtutá mghama la Ghamuŋ, ka lam zwaŋa ni Hanuŋ da gá mgham ma vla ni.

² Ka Dawuda mantsa: « Dzaʼa magana maga yu ta zɗaku ta Hanuŋ, zwaŋa Nahas, manda ya magiha da ni ta zɗaku ya, » kaʼa. Ka ghunadaptá Dawuda tama ta mnduha ni da zgwaŋtá Hanuŋ ma mtatá da ni. Ka ɓhadaghata kwalvaha Dawuda ta haɗika la Ghamuŋ.

³ Ka maliha la Ghamuŋ nda daŋahəga taŋ Hanuŋ mantsa: « Ta ndan ka ná, ŋa vla sgit ŋa da gha ghunagaghata Dawuda ta mnduha da zgwa kagha ra? Nza a ŋa snaŋtá luwa, ka vitsapta ŋa hwanzaɓanapta a ghunaghakta tsi ta kwalvaha ni wu ra? » ka həŋ.

⁴ Mantsa tama, ka hlaftá Hanuŋ ta tsa kwalvaha Dawuda ya, ka hatsanaghutá slərpuha ghumayha taŋ, ka ghwaghwanaghutá lgutha taŋ ha ta wa mndər ta wa mndər ka vriŋtá həŋ.

⁵ Ka snanamtá lu ta Dawuda, ka ghunaftá tsi ta mndu da gmaku nda həŋ, kabga hlu hla hula katakata ta hahəŋ. Ka tsəghaftá mgham ta lwi ŋa taŋ, kaʼa mantsa: « Nzawa nza ma Yeriku karaku ha ka ɗayglagata ghumayha ghuni. Tahula tsa ŋa vragaghata ghuni, » kaʼa.

Vulay Dawuda ta vulu nda la Ghamuŋ nda ya nda la Aram

⁶ Ta nghə la Ghamuŋ ná, tsawaɗanaf tsawaɗa həŋ ta ŋuɗuf ta Dawuda nda tsa skwi maga həŋ ya. Ka hlaftá həŋ ta sludziha dəmbuʼ hisambsak (20.000) da la Aram Betʼrəhuv, nda la Aram Tsuva, dəmbuʼ turtuk (1.000) da mghama Maghaha, dəmbuʼ ghwaŋpəɗ his (12.000) da la Tuv ŋa play nda pla.

⁷ Snaŋtá Dawuda ta tsaya, ka ghunaftá tsi ta Yuʼav nda inda bakwa bikwira vulu.

⁸ Ka sliʼagaptá la Ghamuŋ ka dzaftá vgha ŋa vulu ta wa tgha luwa taŋ. Ama la Aram ma Tsuva, nda ya ma Rehuv, nda mnduha la Tuv, nda la Maghaha ya ná, ma mtak hahəŋ nda ghəŋa taŋ.

⁹ Ka nghə Yuʼav ná, dzaʼa vulay ta vulu nda təv kəma, nda ya nda təv hul. Ka ɗagəglaptá tsi ta mbirimha mataba bikwirha vula la Israʼila, ka dzaftá tsi ta həŋ mbəŋ nda la Aram.

¹⁰ Ka fanamtá tsi ma dzvu ta zwaŋama ni Avisay ta pɗakwa sludziha, ŋa payavata mbəŋ nda la Ghamuŋ.

¹¹ Ka Yuʼav nda tsi mantsa: « Ka mbriɗigha mbra la Aram ya, ka sagha ka da kata iʼi. Ala ka la Ghamuŋ ta mbraghaghatá kagha ya guli, dzaʼa katay iʼi ta kagha.

¹² Mbra ta vgha, maranaŋ u mara ta tatá us ta ira u ŋa mnduha u, nda ya ŋa luwaha Lazglafta u, ka maga Yawe ta skwi ya ta zɗəganata! » kaʼa.

¹³ Ka gavadaghatá Yuʼav nda bakwa ni ŋa liŋta nda vulu ta la Aram. Ka hwayaftá tsaha ya ta kəma ni.

¹⁴ Snaŋta la Ghamuŋ kazlay hwayaf hwaya la Aram kəʼa, ka hwayaftá hahəŋ guli ta kəma Avisay ka laghwi da luwa. Ka zlaŋtá Yuʼav ta vulu nda la Ghamuŋ, ka vraghatá da Ursalima.

¹⁵ Nghay la Aram ta zata la Israʼila ta ghwa ta ghəŋa taŋ ná, ka tskavatá həŋ tuts ma vlaka turtuk.

¹⁶ Ka ghunaftá Hadadghezer ta gwal ghunay da hagaktá la Aram ta nzakw nda ta sana ɓla zala Yufratis ya. Ka ɓhadaghatá həŋ da Helam. Suvak mala bakwa gwal vula mgham Hadadghezer ta kla kəma.

¹⁷ Ka mnanatá lu ta Dawuda, ka tskanatá tsi ta sludziha la Israʼila demdem, ka sliʼaftá həŋ ka tsughwaɗaptá Yardeŋ, ka ɓhadaghatá həŋ da Helam. Ka dzaftá la Aram ta vgha ŋa vulu, ka liŋtá həŋ ta Dawuda nda vulu,

¹⁸ ama ka hwayaftá sludziha la Aram ta kəma la Israʼila. Ka pslatá Dawuda ta sludziha la Aram gwal ta ŋla mwata plis ndəfáŋ dərmək (700), nda gwal ta ŋla plis dəmbuʼ fwaɗ mbsak (40.000). Ka zlghuŋtá tsi guli ta Suvak, mala gwal vula taŋ, ka mtutá tsi hada hada.

¹⁹ Nghay inda mghamha ta skwa htsiŋ da Hadadghezer ta zata la Israʼila ta ghwa ta ghəŋa taŋ ya, ka dzraftá həŋ ta nzakw nda zɗaku nda la Israʼila, ka sku həŋ ta htsiŋ da həŋ. Tahula tsa, hlu hla zləŋ ta la Aram ka ləglagha katá la Ghamuŋ.