2Rus 9 - Hdi

Lagha marakw ka mgham nghanaghatá Salumuŋ

¹ Ka snaŋtá sana marakw ka mgham ta haɗika Seva ta gwaɗa ta laghwa hga Salumuŋ da zərwa katakata, ka lagha tsi da dzəghaŋta nda ɗawayha nda bla nda bla. Ka ɓhadaghatá tsi da Ursalima nda ndəghatá gwal ta pghay, nda ŋalibwaha ta hla urdiha ŋa dray nda dra, nda dasu dagala katakata, nda palaha nda bla nda bla dzva ni. Ɓhadaghata ni da Salumuŋ, ka mnanaŋtá tsi ta inda skwiha ma ŋuɗufa ni.

² Ka zlaghanaftá Salumuŋ ta wa inda skwi ɗawaŋ tsi. Haɗ skwi ya nda bla trap tsi ta zlghanaftá wa ni wa.

³ Ka nghanatá tsa marakw ka mgham ma Seva ya ta ɗifila Salumuŋ, nda tsa həga baf tsi ya,

⁴ nda skwa zay ta kuwata ɗafa ni, nda həgaha kwalvaha ni, nda tva paya slna taŋ nda mndərga lgutha taŋ, nda gwal ga lghu nda mndərga lgutha taŋ, nda skwa pla ghəŋ ŋa dray tsuh tsuh ta vlə tsi ma həga Yawe. Ka faftá tsi ta dzvu ta wi ndakrawa.

⁵ Kaʼa nda mgham tama mantsa: « A va kahwathwata tsa skwiha snaŋ yu ta mnay ma haɗika ɗa ta ghəŋa gwaɗaha gha nda ya ta ghəŋa ɗifila gha ya katək!

⁶ Zlghaf a yu sizlay ta tsa gwaɗaha ya ta kul sagha yu wu, ka nghaŋta yu nda ira ɗa. Rusaɗif a lu ta dər rita glakwa ɗifila gha wu! Malaghu mala ta inda skwi ya snaŋ yu ta gwaɗay.

⁷ Zɗakwa həga ŋa inda mnduha gha, nda gwal ta magaghatá slna, ta sna ɗifila gha inda fitik həŋ.

⁸ Rfu da Yawe, Lazglafta gha zɗəgana ka, ka faghaftá tsi ta dughurukwa ni manda mgham ka ŋa Yawe, Lazglafta gha! Dabga ɗvuta Yawe, Lazglafta gha ta la Israʼila, ta kumay guli ta gɗavata taŋ ŋa ɗekɗek, kəl tsi ka faftá kagha ka mgham ta ghəŋa taŋ ŋa tsay gha ta guma nda rakwa ni tɗukwa, » kaʼa.

⁹ Ka vlaŋtá tsa marakw ka mgham ya ta mgham Salumuŋ ta dasu ta malaghutá kiluʼ dəmbuʼ fwaɗ (4.000), nda urdiha dagala katakata, nda palaha nda bla nda bla dzva ni. Ta haɗ urdiha ŋa gray nda tsa urdi vlaŋ tsa marakw ka mgham ya ta mgham Salumuŋ wa.

¹⁰ Tsa kwalvaha Hiram nda kwalvaha Salumuŋ si ta hladaghatá dasu daga ma Ufir ya, ka hladaghaha həŋ guli ta udza saŋtal nda palaha nda bla nda bla dzva ni.

¹¹ Nda tsa udza saŋtal ya, ka magaftá mgham ta tva ŋlu da həga Yawe, nda ŋa həga mgham. Ka magaftá tsi guli ta kəzliŋkəzliŋha nda htimbilha ŋa gwal falaha. Ta walaŋ a lu ta nghaŋtá mndərga tsaha ya ghalya ma haɗika la Yuda wa.

¹² Ka vlaŋtá mgham Salumuŋ ta tsa marakw ka mgham ma Seva ya ta inda skwi kumaŋ tsi, ɗawaŋ tsi, ka malaghutá skwiha ya hlanak tsi ta mgham. Tahula tsa, ka vraghatá tsi ka laghwi ta haɗika ni, nda kwalvaha ni.

Gadghəla Salumuŋ

¹³ Ta magay ndəgakwa dasu ta kiluʼ dəmbuʼ hisambsak hkən mida (23.000) ta lagha da Salumuŋ inda vaku,

¹⁴ zlanaha lu ta ya ta hladagha gwal tsakala, nda inda mghamha la Arap, nda guvnaha haɗik ta hladaghatá dasu nda kfura tsedi ŋa Salumuŋ.

¹⁵ Ka magaftá mgham Salumuŋ ta zalamha dagala dagala his dərmək (200) ka dasu ka dasu pəslap lu nda pəsla. Ka maga ya turtuk ná, kiluʼa dasu ndəfáŋ klaf lu.

¹⁶ Ka magaftá tsi guli ta zwana zalamha hkən dərmək (300) ka dasu pəslap lu nda pəsla. Ka maga ya turtuk ná, kiluʼ hkən klafta lu. Ka pghamtá mgham ma həga ta hgə lu ka Həga fuha Ləvanuŋ.

¹⁷ Ka magaftá mgham ta dughurukwa gá mgham dagala guli nda sliʼiŋa gwiʼaŋ, ka zlərɓaftá tsi ta dasu ghenen tida.

¹⁸ Mkuʼ madzəɓara tva ŋlu ta tsa dughuruk ya, turtuk vla fa səla ka dasu ndiʼaf lu tida. Mamu vla fa dzvuha ta slərpuha vla nzaku, ka tsatsatá lu ta fwatuha rveriha his ta sladu ndusa nda tsa vla fa dzvuha ya.

¹⁹ Mamu tsatsatá fwatuha rveriha ghwaŋpəɗ his ta tsa maɗgweraha ni mkuʼ ya, mkuʼ nda ga zlaɓa, mkuʼ nda ga zeghwi. Haɗ skwi ta kəɗ magafta lu manda tsaya dər ma wati ma luwa ta gə lu ta mgham wa.

²⁰ Inda leghwaha mgham Salumuŋ ná, ka dasu ka dasu nzakwa taŋ. Inda huzla maga slna ma həga ma həga ta hgə lu ka Həga fuha Ləvanuŋ guli ná, ka dasu ghenen həŋ. Haɗ ya ka kfura tsedi wu, kabga ta fitika mgham Salumuŋ, kfura tsedi ná, ka kfur kul haɗ sgita ni ya nzakwa ni.

²¹ Kəl tsi ka nzakway mantsa ná, mamu kwambaluha mgham kawadaga nda kwambaluha Hiram ŋa tsakala. Inda vaku hkən ta vragaghata həŋ nda ndaghatá həŋ nda dasu, nda kfura tsedi, nda sliʼiŋa gwiʼaŋ, nda vdziha, nda zarakha mgham.

²² Ka fikaghuta mgham Salumuŋ ta ghəŋa inda mghamha ta ghəŋa haɗik, ka galipi katakata nda ya nda ɗifil.

²³ Ka zbə mghamha demdem ta guyata nda Salumuŋ, ŋa nzata ka sna tsa ɗifil vlaŋ Lazglafta ya.

²⁴ Inda tsa mnduha ya ta lagha da nghanaghata ka kladanaghatá mbəhuha taŋ: Ka skwiha ka kfura tsedi, nda dasu, nda lgutha, nda huzla vulu, nda urdiha ŋa dray nda dra, nda plisha, nda plisha ghwandala. Mantsa ya kəʼa ta magaku inda vaku.

²⁵ Dəmbuʼ fwaɗ (4.000) glakamha mgham Salumuŋ ŋa pghamtá plisha nda mwata plisha. Dəmbuʼ ghwaŋpəɗ his (12.000) gwal ŋla plisha pagha tsi ma luwaha ta pghə tsi ta mwata plisha ni, nda ya ndusa nda tsi ma Ursalima.

²⁶ Tsatsi ta gá mgham ta ghəŋa inda mghamha sliʼafta ni daga ta wa zala Yufratis, ka lab ta haɗika la Filisti, ha ta mukuma nda Masar.

²⁷ Ka nanaftá mgham ta kfura tsedi guli ma Ursalima manda ndəghata dzir, nda udzuha sedra manda ndəghata ghurafa sla ta ɗayaku ta kuɗuŋurha.

²⁸ Ta hlagapta ma Masar nda sanlaha ma haɗikha lu ta plisha ŋa Salumuŋ.

Mtakwa Salumuŋ

²⁹ Pɗakwa slnaha Salumuŋ, nda zlrafta ni nda kɗavakta ni tani ná, nda vivinda ma ɗelewera rusa ta ghəŋa slnaha anabi Nataŋ, nda ya nda ɗelewera lwa Lazglafta mnaŋ anabi Ahiya mnda la Silu, nda ya maranaŋ lu ta Yeghdu ka slayaŋ manda skwi ma suni ta ghəŋa gá mghama Yaruvgham zwaŋa Nəvat.

³⁰ Fwaɗ mbsak vaku maga Salumuŋ ta gá mgham ma Ursalima ta ghəŋa inda la Israʼila.

³¹ Tahula tsa, ka laghu Salumuŋ da dzidzíha ni, ka paɗamtá lu ma luwa da ni Dawuda. Ka lam zwaŋa ni Rəhavgham da gá mgham ma vla ni.