2Rus 35 - Hdi

Payafta Yusiya ta skala Pak

¹ Baɗ ghwaŋpəɗ fwaɗa fitik ma tila mataŋtaŋ ma vaku, ka fatá Yusiya ta skala Pak ma Ursalima ŋa vlaŋtá sgit ta Yawe. Ka hnatá lu ta Pak.

² Ka varəglanamtá tsi ta gwal dra skwi ŋa Lazglafta ma slnaha taŋ, ka vlaŋtá tsi ta mbraku ta həŋ ŋa maga slna ɗina ma həga Yawe.

³ Kaʼa nda la Levi, pghaghu lu ta həŋ ŋa Yawe ta tagha skwi ŋa inda la Israʼila ya mantsa: « Fawa fa ta akwata dzratá wi nda ghuɓa ma həga Lazglafta baf Salumuŋ, zwaŋa Dawuda, mghama la Israʼila ya. Haɗ kuni dzaʼa kləgəlta ta badzaga wa. Magawa maga tama ta slna ŋa Yawe, Lazglafta ghuni, nda mnduha ni, la Israʼila.

⁴ Dagapwa vgha ka həga ka həga, taɓta slna ghuni, manda ya vindaf Dawuda, mghama la Israʼila, nda zwaŋa ni Salumuŋ.

⁵ Ka slada slada bakwa la Levi ka həga ka həga ma vli nda ghuɓa ŋa maganatá slna ta zwana ma ghuni hamata la Israʼila taɓta dagatá həŋ ta uʼa taŋ ta uʼa taŋ.

⁶ Hanawa hana ta slaɓalakwa tuwakha ŋa Pak, fawa fa ta ghəŋa ghuni nda ghuɓa, payafwa paya ŋa zwana ma ghuni, ka maga kuni taɓta gwaɗa Yawe ta mnata nda ma wa Musa ya, » kaʼa.

⁷ Ka hlaftá Yusiya ŋa mnduha ta slaɓalakwa tuwak nda gu, dəmbuʼ hkən mbsak (30.000) nda lghəŋha dəmbuʼ hkən (3.000), demdem ŋa Pak, ŋa inda gwal hada. Ma skwa mgham hlapta lu ta tsaha ya.

⁸ Ka hlaptá mnduha ni dagaladagala guli ta mbəhu nda ɗvay ŋuɗufa taŋ ŋa kataŋtá mnduha, nda gwal dra skwi ŋa Lazglafta, nda la Levi. Ka vlatá i Hilkiya, nda Zakari, nda Yəhiʼel, maliha ta ghəŋa həga Lazglafta ŋa Pak ta slaɓalakwa tuwak dəmbuʼ his nda mkuʼ dərmək (2.600), nda sla hkən dərmək (300) ŋa gwal dra skwi ŋa Lazglafta.

⁹ Ka vlatá Kananyahu, nda zwana ma ni i Səmaghyahu, nda Netaŋʼel, nda Hasavya, nda Yəghiʼel, nda Yuzavat, maliha ta ghəŋa la Levi ŋa la Levi ŋa Pak, ta rina fisik dəmbuʼ hutaf (5.000), nda slaha hutaf dərmək (500).

¹⁰ Ka payaftá lu ta inda skwi, ka sladatá gwal ta dra skwi ŋa Lazglafta, nda la Levi ma vla slna taŋ taɓta dagatá həŋ, manda skwi ya mnaf mgham.

¹¹ Ka hanatá həŋ ŋa Pak ta tsa rina fisik ya. Ka tsaʼuwaftá həŋ ta us ka vlaŋtá gwal dra skwi ŋa Lazglafta, ka wutsikafta tsaha ya ta gwir, ta hlatá la Levi ta huta ta tsa rini ya.

¹² Ka pghaghutá həŋ ta sanlaha ma rini ŋa pla ghəŋ ŋa dray tsuh tsuh, ya dzaʼa lu dagafta taɓta dagatá la Israʼila ta uʼa taŋ ta uʼa taŋ, ŋa vlata taŋ ka skwa pla ghəŋ ŋa Yawe, manda ya nda vinda ma deftera Musa. Mantsa ya magata həŋ nda slaha guli.

¹³ Ka fasatá həŋ ta vu ta tsa slaɓalakwa tuwakha ŋa Pak ya manda skwi ta raku, ka dadatá həŋ ta tsa mbəhuha nda ghuɓa ya ta sigaha, ta sigata matusaha nda ya ta gədzehha. Ka gi dgə həŋ misimmisim ŋa mnduha demdem.

¹⁴ Tahula tsa, ka dadatá həŋ ta ya ta nzakway ka ŋa taŋ, nda gwal ta dra skwi ŋa Lazglafta, kabga gwal dra skwi ŋa Lazglafta zivira Haruna ná, ha ga rviɗik həŋ ta maga slna pla ghəŋ ŋa dray tsuh tsuh, nda ghwaviɗ tani. Tsaya, kəl la Levi ka da ŋa taŋ nda ŋa gwal dra skwi ŋa Lazglafta, zivira Haruna.

¹⁵ Ma vla slna taŋ gwal fa laha, mndəra la Asaf, taɓta skwi mnaf i Dawuda, nda Asaf, nda Hemaŋ, nda Yədutuŋ, slayaŋa mgham. Ta sladu gwal ta ngha wa tgha ta inda wa tghaha. Haɗ ya ta lavaghwi ma vla slna ni wu, kabga ta day day zwana ma taŋ la Levi ta ŋa hahəŋ.

¹⁶ Mantsa ya papayafta lu baɗ tsa fitik ya ta inda slnaha Yawe ŋa skala Pak, nda ya ŋa vla skwa pla ghəŋ ŋa dray tsuh tsuh ta gwira Yawe, taɓta skwi mnaf mgham Yusiya.

¹⁷ Ma tsa fitik ya, ka skalu tsa la Israʼila hada ya ta skala Pak, nda skala buradi kul haɗ is mida, ka fitik ndəfáŋ.

¹⁸ Ta skalaŋ a lu ta mndərga tsa skala Pak ya ma Israʼila daga ta fitika anabi Samuyel wu, haɗ ya mataba mghamha la Israʼila ta kəɗ skalatá Pak manda tsa skala Yusiya, nda gwal dra skwi ŋa Lazglafta, nda la Levi, nda inda la Yuda nda la Israʼila hada, nda gwal ta nzakw ma Ursalima ya wa.

¹⁹ Ta maghwaŋpəɗ tghasa vakwa Yusiya ta gá mgham, skala lu ta tsa skala Pak ya.

Mtakwa Yusiya

²⁰ Tahula inda tsaya, manda payəglafta Yusiya ta həga Yawe, ka laf Nəhu, mghama Masar guk nda vulu ma Karkəmis ta wa zala Yufratis. Ka sliʼaftá mgham Yusiya da gmata nda tsi.

²¹ Ka ghunaftá Nəhu ta gwal ghunay da tsi ŋa mnanata: « Nahgani ta zbə ka da iʼi ní, a mghama la Yuda? Sagha dika kagha a yu gita wu, ama sagha dika sana gá mgham ya ta dzaŋtá kuma nda iʼi yu. “Maga maga misimmisim,” ka Lazglafta nda iʼi. Ma dzə ka ta kuma nda Lazglafta, ya kawadaga nda iʼi, dá zaɗaghatá tsi, » kaʼa.

²² Ama ka kwalaghutá Yusiya ta mbəɗatá vgha, ka slahwaftá tsi ta vgha ŋa vulu nda tsi, kul fanatá sləməŋ ta Nəhu ŋa sna gwaɗa ta sagha da Lazglafta. Ka laha tsi ŋa gumata nda vulu nda tsi ma didiŋa Məgidu.

²³ Ma vulu lu tama, ka hatá lu ta mgham Yusiya nda hava. Ka mgham nda kwalvaha ni mantsa: « Klaghuwa kla ta iʼi, kabga nda bala yu katakata, » kaʼa.

²⁴ Ka klagaptá kwalvaha ni ma mwata plisa ni, ka famta ma sana mwata plisa ni, ka klaghata da Ursalima. Ka mtutá tsi, ka paɗamtá lu ma kula dzidzíha ni. Ka tawamtá inda la Yuda nda la Ursalima ta Yusiya.

²⁵ Ka tsigiŋtá anabi Yirməya ta laha ta taw ta ghəŋa Yusiya. Ha gita gwal falaha ka zgwana nda ya ka miʼaha ta hava tsa mtakwa ni ya ma laha ta ŋaɗa ghəŋa taŋ. Ka nzakw tsa lahaha ta taw ya ka skwa dzidzí da la Israʼila, ka vindamtá lu ta tsa laha ya ma ɗelewera laha ta taw.

²⁶ Pɗakwa slnaha Yusiya, nda skwi ya maga tsi tɗukwa taɓta skwi ya nda vinda ma zlaha Yawe,

²⁷ nda gwaɗaha ya gwaɗa tsi daga zlrafta ni ha kɗavakta ni ná, vivindam vivinda lu ma ɗelewera mghamha la Israʼila nda la Yuda.