2Rus 34 - Hdi

Yusiya, mghama la Yuda

¹ Tghas ima Yusiya ta nzatá tsi ka mgham. Ka zatá tsi ta vaku hkən mbsak ndeŋ mida ta gá mgham ma Ursalima.

² Ka mag tsi ta skwi tɗukwa ta wa ira Yawe. Ka ksaftá ta tvi manda ŋa dzidza ni Dawuda, dzəmbiɗana a dər nda ga zeghwi dər nda ga zlaɓa wa.

³ Ta matghasa vakwa ni ta gá mgham, ma nzakwa ni ta ka zwaŋ, ka zlraftá tsi ta zba Lazglafta dzidza ni Dawuda. Ta maghwaŋpəɗ hisa vakwa ni, ka zlraftá tsi ta tsaɗiŋtá haɗika Yuda nda luwa Ursalima nda ma hliŋtá vliha tskal tsəkala nda skwa wuyayha Asera, nda tsatsatá skwa wuyayha, nda skwa wuyayha ka kfur nwap lu nda nwa.

⁴ Ka dzaɓiŋtá lu ta wa ira ni ta gwirha Baghalha, ka pasliŋtá tsi guli ta vla dra urdiha si nda ta ghəŋa ni, ka dzaɓiŋtá tsi ta skwa wuyayha Asera, nda tsatsatá skwa wuyayha, nda skwa wuyayha ka kfur nwap lu nda nwa, ka huʼanapta, ka wutsafta ta kuluha gwal si ta vla skwa pla ghəŋ ŋa tsa ghwaɗaka lazglaftaha ya.

⁵ Ka draftá tsi ta ghudzifha gwal dra skwi ŋa tsa ghwaɗaka lazglaftaha ya ta tsa gwirha si ta kəl həŋ ka pla ghəŋ ya. Mantsa ya kəʼa tsaɗiŋtá haɗika Yuda nda luwa Ursalima.

⁶ Mantsa ya guli magata tsi ma luwaha la Mənase, nda ŋa la Ifrayim, nda ŋa la Simghuŋ nduk nda luwaha la Naftali, nda ya ta kwakwarha ta wanaftá tsa luwaha ya.

⁷ Ka dzaɓiŋtá tsi, ka seseʼanaptá gwirha, nda skwa wuyayha Asera, nda tsatsatá skwa wuyayha, ka niŋta kuzlup. Ka pasliŋtá tsi ta inda vla dra urdiha ta haɗika la Israʼila demdem. Tahula tsa, ka vraktá tsi da Ursalima.

Slafta Hilkiya ta deftera zlahu ma həga Yawe

⁸ Ta maghwaŋpəɗ tghasa vakwa Yusiya ta gá mgham, ma fitika nzakwa ni tata tsaɗa tsa haɗik ya, nda tsa həga Lazglafta ya, ka ghunaftá tsi ta Safaŋ, zwaŋa Atsalyahu, nda Maghaseya, guvna luwa, nda Yuʼah, zwaŋa Yuʼahaz, mnda tskanatá ɗelewera gwaɗa ga mgham, ŋa dzaʼa da payanatá həga Yawe, Lazglafta ni.

⁹ Ka sliʼaftá həŋ ka laghwi slanaghatá Hilkiya mali ta ghəŋa gwal dra skwi ŋa Lazglafta. Ka vlaŋtá həŋ ta tsedi si kladagha lu da həga Lazglafta, ya si tskaf la Levi ta ngha wa tghaha da la Mənase, nda la Ifrayim, nda ya da pɗakwa la Israʼila demdem, mantsa ya da inda la Yuda, nda la Biŋyamiŋ, nda gwal ta nzakw ma Ursalima.

¹⁰ Ka pghanamtá lu ta tsa tsedi ya ma dzvu ta maliha ta nghanaghatá slna ma həga Yawe. Ka vlaŋtá hahəŋ guli ta gwal ta maga slna ma həga Yawe, ŋa vranaftá tsa həga ya manda va nzakwa ni si ghalya.

¹¹ Ka vlaŋtá həŋ ta gwal tsa dzaʼuwa, nda gwal ba həga ŋa skwa fifiɗatá palaha, nda udza dzaʼuwaha ŋa papaya həgaha ya zlanava mghama la Yuda huyam ya.

¹² Ka mag tsa mnduha ya ta tsa slna ya nda fatá ghəŋ. Ka pghatá lu ta həŋ mista i Yahat nda Ghuvadiya, la Levi ma mndəra la Mərari, nda Zakari, nda Məsulam, ma mndəra la Kehat ŋa nghapta ka həŋ. Tsa la Levi ya ná, midala həŋ demdem ka skalu nda huzla skalu.

¹³ Hahəŋ guli ta nghapta ka slna hla huzla nda inda gwal ta maga slna kavghakavgha. Mamu sanlaha ma la Levi guli ta vindi, maliha sanlaha, ngha wa tgha ŋa sanlaha.

¹⁴ Ma fitika hlagaptá tsedi hladagha lu da həga Yawe ná, ka slanaghatá Hilkiya, mnda dra skwi ŋa Lazglafta ta deftera zlaha Yawe ta vlata nda ma dzva Musa.

¹⁵ Ka Hilkiya nda Safaŋ, mnda vindi mantsa: « Slaf sla yu ta deftera zlaha Musa ma həga Yawe, » kaʼa. Ka vlaŋtá Hilkiya ta tsa defteri ya ta Safaŋ.

¹⁶ Ka klaghatá Safaŋ ta tsa defteri ya vlaŋtá mgham, ka rusanafta kazlay na: « Ta magay magay kwalvaha gha ta inda slna ya pghanam lu ta həŋ ma dzvu.

¹⁷ Hlap hla həŋ kay ta tsa tsedi ma həga Yawe ya, ka pghanamta ma dzvu ta maliha ta nghanaghatá slna, nda gwal ta maga slna ma həga Yawe, » kaʼa.

¹⁸ Ka Safaŋ mnda vindi nda mgham mantsa: « Vliha vla Hilkiya mnda dra skwi ŋa Lazglafta ta defteri, » kaʼa. Ka dzaŋafta Safaŋ nda lwi dagala dagala ta kəma mgham.

Ghunafta Yusiya ta mnduha da anabi Hulda

¹⁹ Snanata mgham ta gwaɗaha ma tsa deftera zlahu ya ná, ka kwahiŋtá tsi ta lguta ni.

²⁰ Tahula tsa, ka mgham mnanaftá i Hilkiya nda Ahikam, zwaŋa Safaŋ, nda Ghavduŋ zwaŋa Mika, nda Safaŋ mnda vindi, nda Ghasaya kwalva mgham mantsa:

²¹ « Dagala gufatá ŋuɗufa Yawe ta ghəŋa iʼi nda pɗakwa la Israʼila, nda la Yuda, kabga maga a dzidzíha mu ta slna nda gwaɗaha Yawe ma na defteri slanagha lu na wa. Lawa ɗawaɗiptá ta ndana Yawe ta ghəŋa skwi ŋa magay, » kaʼa.

²² Ka sliʼaftá i Hilkiya nda mnduha ya zabap mgham, ka laghwi da slanaghatá anabi Hulda, markwa Salum, zwaŋa Tukhat, zigha Hasra, mnda nghapta ka lgutha ya. Ma lfiɗa ghərzla ma Ursalima ta nzakwa Hulda. Ka rusanaftá həŋ ta skwi ta maguta.

²³ Ka tsa marakw ya nda həŋ mantsa: « Wya ka Yawe, Lazglafta la Israʼila mnata: “Mnanawa mna ta tsa mndu ta ghunaghunakta da iʼi ya kazlay:

²⁴ Wya ka Yawe mnata: Dzaʼa kladagha kla yu ta zləmnda da tsa vli ya, nda ya ta ghəŋa mnduha ni, taɓta inda ksiʼiha nda vinda ma tsa defteri dzaŋaf lu ta kəma mghama la Yuda ya.

²⁵ Tsəhala zliha zla gwal ma Ursalima, ka laghwi dra urdi ŋa dray nda dra ŋa sanlaha ma lazglaftaha ŋa gaɗifta ɓasa ŋuɗuf, nda ma inda slna magaf həŋ nda dzva taŋ ya, nda gufa ŋuɗufa ɗa ta ghəŋa tsa vli ya, lɓavata a wa.

²⁶ Ama ka mnanata kuni ta mghama la Yuda ta ghunaghunakta ɗawaptá ndana Yawe na: Wya ka Yawe, Lazglafta la Israʼila mnata ta ghəŋa tsa gwaɗa snaŋ ka ya:

²⁷ Tsəhala ta haga madər ka, ka hanaganatá ka ta ghəŋa gha ta kəma Lazglafta ma snaŋta gha ta tsa gwaɗaha ta ghəŋa tsa vli ya, nda ya ta ghəŋa mnduha ni, kabga hanaganata gha ta ghəŋ ta kəma ɗa, ka kuhiŋtá ka ta lguta gha, ka tawatá ka ta taw ta kəma ɗa ya, iʼi guli ná, nda sna yu, ka Yawe mnata.

²⁸ Wana yu dzaʼa gwaghafta nda dzidzíha gha. Ma zɗaku dzaʼa ka da guya vgha nda həŋ ma kulu. Nghaŋta a ka ta inda zləmndaha dzaʼa klakta yu ta ghəŋa na vli na, nda ta ghəŋa mnduha ni ya wu,” » kaʼa.

Lfiɗglanafta Yusiya ta dzratá wi nda Yawe

²⁹ Ka ghunaftá mgham Yusiya ta gwal ghunay ŋa hagadaghatá inda la galata mnduha la Yuda nda ŋa la Ursalima.

³⁰ Ka ŋladaftá tsi da həga Yawe kawadaga nda inda la Yuda, nda inda la Ursalima, nda gwal dra skwi ŋa Lazglafta, nda la Levi, nda inda mnduha, sliʼafta ni ta zwani ha ta galata mnduha. Ka dzaŋaftá mgham ta wa sləməŋa inda taŋ ta inda gwaɗa ma deftera dzratá wi slanagha lu ma həga Yawe.

³¹ Tata sladu mgham ma vla slada ni, ka dzraftá tsi ta wi ta kəma Yawe. Ka fatá tsi ta ghəŋa ni ŋa dzaʼa mista Yawe nda hya hya ŋuɗufa ni, nda ya nda kɗavakta hafa ni, ŋa ŋanatá zlahuha ni, nda tva skwiha ni ta raku ka magay, nda ma maga slna nda gwaɗaha dzratá wi vindam lu ma tsa defteri ya.

³² Ka hlamtá tsi ta inda gwal ta nzakw ma Ursalima nda ya ta kwakwara la Biŋyamiŋ. Ka mag gwal ta nzakw ma Ursalima ta skwi taɓta dzratá wa Lazglafta dzidzíha taŋ ya.

³³ Ka hliŋtá Yusiya ta inda manzakɗaway ta inda kwakwara la Israʼila. Ka mblaftá tsi ta inda gwal ma Israʼila ŋa maga slna ŋa Yawe, Lazglafta taŋ. Ma inda nzakwa ni, mbəɗana a həŋ ta hul ta Yawe, Lazglafta dzidzíha taŋ wa.