2Rus 27 - Hdi

Yutam, mghama la Yuda

¹ Hisambsak hutaf mida ima Yutam ta nzatá tsi ka mgham. Ka zatá tsi ta vaku ghwaŋpəɗ mkuʼ ta pala ma Ursalima. Yərusa hga ma ni, makwa Tsaduk.

² Ka mag tsi ta skwi tɗukwa ta wa ira Yawe, manda va ya si maga da ni Ghuziya, ama lam a da həga Yawe wa. Kulam nda tsa, ta dzaʼa ta kəma ta kəma mnduha nda maga ghwaɗaka.

³ Tsatsi ta baftá tsa wa tgha həga Yawe ma tsa vli ta slruta ya, ka papayanatá tsi ta ndəghata vliha ta matsak ta ghərzla Ghufel.

⁴ Ka babaftá tsi ta luwaha ta kwakwar ta ghwá la Yuda, mantsa ya matsakha huzlu, nda həgaha nda slara nda slara ma həga fuha.

⁵ Ka vulu tsi ta vulu nda mghama la Ghamuŋ, ka zatá tsi ta ghwa ta ghəŋa taŋ. Ka vlaŋtá la Ghamuŋ ta tsa vaku ya, ta kfura tsedi ka kiluʼ dəmbuʼ hkən nda fwaɗ dərmək (3.400), nda alkama ka buhu dəmbuʼ hkən mbsak (30.000), nda ŋa urz dəmbuʼ hkən mbsak (30.000). Tsaya skwi plana la Ghamuŋ, mantsa ya ta mahisa vaku nda mahkəna vaku.

⁶ Ka sgavaghatá mbrakwa Yutam, kabga dihana diha ta mbaɗa ɗina ta kəma Yawe, Lazglafta ni.

⁷ Pɗakwa slnaha Yutam, nda inda vuluha ni, nda inda skwiha maga tsi ná, vivindam vivinda lu ma ɗelewera mghamha la Israʼila nda la Yuda.

⁸ Hisambsak hutaf mida ima ni ta nzatá tsi ka mgham. Ka zatá tsi ta vaku ghwaŋpəɗ mkuʼ ta pala ma Ursalima.

⁹ Ka laghu Yutam da dzidzíha ni, ka paɗamtá lu ma luwa Dawuda. Ka lam zwaŋa ni Ahaz da gá mgham ma vla ni.