2Rus 25 - Hdi

Gá mghama Amatsiya

¹ Hisambsak hutaf mida ima Amatsiya ta nzatá tsi ka mgham. Hisambsak təmbay mida vakwa ni ta gá mgham ma Ursalima. Yəhughadaŋ hga ma ni, si ma Ursalima.

² Ka mag tsi ta skwi tɗukwa ta wa ira Yawe, ama ma hya hya ŋuɗufa ni a wa.

³ Nghanata ni ta dihatá gá mgham ma dzva ni, ka pslatá tsi ta tsa kwalvaha ta dzatá da ni, mgham Yuʼas ya.

⁴ Ama psla a ta zwana taŋ manda ya nda vinda ma deftera zlaha Musa wu, ka tsa zlaha Yawe ya mnafta na: « Pslata a lu ta dadaha dabga dmakwa zwana taŋ wa. Pslata a lu ta zwani dabga dmakwa dadaha taŋ wa. Dər wa ta gatá dmaku, tsatsi dzaʼa dzata lu, » kəʼa ya.

⁵ Ka tskanatá Amatsiya ta la Yuda, ka dagaptá həŋ ta uʼa taŋ ta uʼa taŋ, nda maliha taŋ ta ghəŋa bakwa gwal vulu dəmbuʼ dəmbuʼ, nda maliha taŋ ta ghəŋa bakwa gwal vulu dərmək dərmək. Ka mbəɗaftá tsi ta inda la Yuda nda la Biŋyamiŋ, zgwana sliʼafta ni ta imi hisambsak ka laghwi ta kəma. Ka mutsaftá tsi ta zgwana dəmbuʼ hkən dərmək (300.000) prək ka vulu, nda gupa nda ya nda zalam.

⁶ Ka tsaftá tsi ta nzawa mnduha gwal viɗviɗ ka vulu dəmbuʼ dərmək (100.000) mataba la Israʼila, ka kfura tsedi kiluʼ dəmbuʼ hkən nda fwaɗ dərmək (3.400).

⁷ Ka lagha sana mnda Lazglafta, kaʼa nda tsi mantsa: « Mghama ɗa, ma pghə gwal vula la Israʼila ta kagha, kabga haɗ Yawe kawadaga nda inda la Ifrayim ta nzakway ka na la Israʼila na wa.

⁸ Ka lab la ka da vulu kawadaga nda həŋ, dzaʼa vulay ka nda ufatá vgha má mndani, dzaʼa zləmbaghis zləmba Lazglafta ta kəma ghuma gha, kabga mamu Lazglafta nda mbrakwa kataŋtá mndu, mamu nda mbrakwa zləmbiŋtá mndu guli, » kaʼa.

⁹ Ka Amatsiya nda tsa mnda Lazglafta ya mantsa: « Nu ká yu dzaʼa magay nda na kiluʼa tsedi dəmbuʼ hkən nda fwaɗ dərmək (3.400) ghada yu ta vlaŋtá bakwa vula la Israʼila na? » kaʼa. Ka tsa mnda Lazglafta ya mantsa: « Laviŋ lava Yawe ta vlaghatá ka malaghutá tsaya, » kaʼa.

¹⁰ Mantsa tama, ka dgatá Amatsiya ta vgha nda tsa bakwa mnduha ta sagha da tsi daga ma Ifrayim ya, ka vriŋtá tsi ta həŋ dzagha taŋ. Ama ka ɓasaftá tsa mnduha ya ta ŋuɗuf katakata nda la Yuda, ka vraghatá həŋ dzagha taŋ nda gufatá ŋuɗuf.

¹¹ Ka draftá Amatsiya ta ŋuɗuf, ka hlaghatá tsi ta mnduha ni da didiŋa Slughul. Hada, ka pslatá tsi ta la Seghir dəmbuʼ ghwaŋ (10.000).

¹² Ka kasaftá la Yuda ta gwal dəmbuʼ ghwaŋ (10.000) ta nda hafu. Ka hladaftá həŋ ta həŋ ta sana pyam, ka slisliŋwigiŋtá həŋ hada, ka huhunzuɓutá həŋ demdem.

¹³ Ama tsa bakwa mnduha vriŋ Amatsiya ta həŋ ŋa kwala taŋ dzaʼa da vulu mista ni ya, ka tamtá həŋ ta vgha ma luwaha la Yuda, daga ma Samari ha da Betʼhuruŋ. Ka pslatá həŋ ta mnduha dəmbuʼ hkən (3.000), ka zləɗaghatá həŋ ta huzla dagala.

Zata Yuʼas ta ghwa ta ghəŋa Amatsiya

¹⁴ Manda vragaghata Amatsiya tahula pslata ni ta la Idum, ka klagaghatá tsi ta lazglaftaha la Seghir, ka fata ka lazglaftaha ni. Ka tsəlɓu tsi ta tsəlɓu ŋa taŋ, ka dra urdiha ŋa taŋ.

¹⁵ Mantsa tama, ka gufaftá ŋuɗufa Yawe ta ghəŋa Amatsiya, ka ghunaftá tsi ta anabi da tsi, kaʼa nda tsi mantsa: « Kabgawu kəl ka ka hlagaghatá lazglaftaha tsa mnduha ya, ya wya trap tra həŋ ta zluʼagaptá mnduha taŋ ma dzva gha na? » kaʼa.

¹⁶ Ta gwaɗay gwaɗay ta tsa gwaɗa ya, ka Amatsiya nda tsi mantsa: « Zbaf zba ŋni ta kagha ŋa nzakway ka mnda vla hiɗaku ŋa mgham ra? Laghu la gha! Haf ha ta wa gha, ari ka dzaghata lu a na? » kaʼa. Ka haftá tsa anabi ya ta wa ni, ama kaʼa mantsa: « Nda sna yu, kura kura Lazglafta ta zaɗaghata, tsəhala mantsa ya maga ka, ka kagha kwalaghutá snatá hiɗakwa ɗa ya, » kaʼa.

Vula la Yuda nda la Israʼila

¹⁷ Tahula dzərkavata Amatsiya mghama la Yuda ta nda gwal ta vlaŋtá hiɗaku, ka ghunaftá tsi ta mndu da Yuʼas zwaŋa Yəhuʼahaz, zigha Yehu, mghama la Israʼila, kaʼa mantsa: « Sawi ka guyavata u nda vulu! » kaʼa.

¹⁸ Ka ghunaftá Yuʼas, mghama la Israʼila ta mndu ŋa mnay ŋa Amatsiya, mghama la Yuda, kaʼa mantsa: « Ma sana fitik, ka teka madzafdzafa la Ləvanuŋ ghunaftá mndu da mghama fwa sedra la Ləvanuŋ na: “Vlaŋ vla ta makwa gha ta zwaŋa ɗa ka markwa taŋ,” kaʼa. Ama ka lagha nimtaka la Ləvanuŋ da ŋalafta ta teka madzafdzaf.

¹⁹ Mantsa nzakwa ni, zaza ka ta la Idum, ka vlaghatá tsaya ta gla ghəŋ ha ka təŋafta ni. Nza nza mintgha gha! Kabgawu dzaʼa famta ka ta ghəŋa gha da slna tulekaku ya dzaʼa klaghaktá zaɗaku, nda la Yuda tani na? » kaʼa.

²⁰ Ama ka kwalaghutá Amatsiya ta snay. Tsaw nda ghada kurata Lazglafta ta vlatá həŋ ŋa zaɗaku kabga mbəɗaghuta taŋ ta vgha təv lazglaftaha la Idum.

²¹ Ka laf Yəhuwas, mghama la Israʼila. Ka guyatá tsa mghamha his ya nda vulu ma Betʼsemes luwa la Yuda.

²² Ka zunustá sludziha la Israʼila ta ghuvi ta sludziha la Yuda, ka hwayaghutá sludziha la Yuda dər wa dzagha ni.

²³ Ka ksutá Yuʼas, mghama la Israʼila ta Amatsiya, zwaŋa Yuʼas, zigha Ahaziya, mghama la Yuda ma Betʼsemes ka vuʼa, ka klaghata da Ursalima. Ka kuhwaptá matsaka Ursalima ka mitər his dərmək (200), daga ta wa tgha Ifrayim ha ta wa tgha Tuldi.

²⁴ Ka hlaghatá tsi ta inda dasu, nda tsedi, nda inda huzla ma həga Lazglafta ta nghapta Ghuvetʼidum, nda ya ma dzuguva ɗifa skwa gadghəl ma həga mgham. Ka kasaghatá tsi guli ta sanlaha ma mnduha ŋa vara həŋ nda vara, ka vraghatá tsi da Samari.

Mtakwa Amatsiya

²⁵ Ka zatá Amatsiya, zwaŋa Yuʼas, mghama la Yuda ta vaku ghwaŋpəɗ hutaf tahula mtatá Yuʼas, zwaŋa Yəhuʼahaz, mghama la Israʼila.

²⁶ Pɗakwa slnaha Amatsiya, daga zlrafta ni nda kɗavakta ni ná, vivindam vivinda lu ma ɗelewera vinda slnaha mghamha la Yuda nda la Israʼila.

²⁷ Daga ma tsa fitik ya, ka mbəɗanatá Amatsiya ta hul ta Yawe, ka dzraftá lu ta wi má ŋa dzata ma Ursalima, ka hwayaghatá tsi da Lahis. Ama ka ghunaftá lu ta mnduha da zbiŋta ma Lahis, ka dzatá lu hada.

²⁸ Ka vradanaghatá lu ta mbla ni ta plis, ka paɗamta ta vata dzidzíha ni ma luwa Dawuda.