2Rus 23 - Hdi

Lama Yuʼas zwaŋa mgham da gá mgham

¹ Ta mandəfáŋa vaku, ka draftá Yəhuyada ta ŋuɗuf, ka dzraftá tsi ta wi nda maliha ta ghəŋa bakwa gwal vulu dərmək dərmək (100): I Ghazaryahu zwaŋa Yəruham, nda Yismaghel zwaŋa Yəhuhanaŋ, nda Ghazaryahu zwaŋa Ghuvet, nda Maghaseya zwaŋa Ghadayahu, nda Ilisafat zwaŋa Zihri.

² Ka ranaftá həŋ ta haɗika la Yuda, ka tsakanatá la Levi ma inda luwaha la Yuda, nda mala gá həgaha la Israʼila. Tahula tsa, ka vraktá həŋ da Ursalima.

³ Ka dzraftá inda guyatá ghəŋa mnduha ta wi nda mgham ma həga Lazglafta. Ka Yəhuyada nda həŋ mantsa: « Wana zwaŋa mgham! Tsatsi raŋ gá mgham, manda va ya mna Yawe ta ghəŋa zivira Dawuda.

⁴ Wya skwi dzaʼa kuni da magay: Turtuk ma dgata ni hkən mataba ghuni, gwal dra skwi ŋa Lazglafta nda la Levi, na gwal dzaʼa lami da slna baɗ sabat, hahəŋ dzaʼa ngha viravira wa tgha.

⁵ Ta nzatá mahisa ŋəva ma həga mgham. Ta nzata mahkəna ŋəva guli ta wa tgha Yesut. Ta tskavata pɗakwa mnduha demdem ma daɓiha həga Yawe.

⁶ Yaha mndu da lami da həga Yawe, ba gwal dra skwi ŋa Lazglafta nda la Levi ta maga slna baɗ tsaya. Tsaha ya ná, dzaʼa laviŋ lava həŋ ta lami, kabga nda ghuɓa hahəŋ. Ama ka snata mnduha demdem ta skwi dzaʼa mnafta Yawe.

⁷ Dzaʼa wanaf wa la Levi dendesl ta mgham, dər wa nda huzla vulu ma dzvu. Dər wa dzaʼa lami da həga Lazglafta, dzaʼa dzadza lu. Kaghuni ya, ta vata mgham dzaʼa nzata kuni dər dzaʼa diga tsi, » kaʼa.

⁸ Ka magatá la Levi nda inda la Yuda manda ya mnanaf Yəhuyada, mnda dra skwi ŋa Lazglafta ta həŋ. Dər wati ma həŋ ta lagha nda mnduha taŋ, gwal dzaʼa sliʼafta ma slna baɗ fitika Sabat, nda gwal dzaʼa zlraftá slna baɗ tsa fitik ya, kabga zlana a Yəhuyada ta dər wati baku ŋa vraghuta dzagha ni wa.

⁹ Ka vlaŋtá Yəhuyada, mnda dra skwi ŋa Lazglafta ta maliha ta ghəŋa gwal vulu dərmək dərmək (100) ta gupaha, nda zalamha, nda ghwadziha, si ŋa mgham Dawuda, si pgha lu ma həga Lazglafta.

¹⁰ Ka pghatá tsi ta mnduha demdem ŋa ngha həga, nda ŋaŋa ta huzla vulu ma dzvu, ka wamtá mgham, ka nzatá ndər ta kəma gwir nda həga Lazglafta, daga nda ga zeghwi dikw nda ga zlaɓa tsa həga ya.

¹¹ Ka klagaptá tsi ta zwaŋa mgham, ka wanamtá zlembetsi ma ghəŋ, ka vlaŋtá ɗelewera dzratá wi, ka famtá həŋ ka mgham. Ka pghanaghatá i Yəhuyada nda zwana ni ta rɗi, ka həŋ mantsa: « Ta mblam ka hafa mgham! » ka həŋ.

¹² Snaŋta Ghataliya ta hlawa mnduha ta dzaʼa nda hwaya, ka zləzləva mgham, ka lagha tsi da taba mnduha ma həga Yawe.

¹³ Ta nghə tsi ná, wya mgham ta sladu ta vata guguɗi ta tva lami həga. Ta sladu maliha gwal vulu, nda gwal vya talakwa ta vata mgham, ta rfu inda mnduha tsa haɗik ya ka vya talakwa, nda gwal fa laha nda inda huzla ta pgha laha zləzləvu. Ka kuhwiŋtá Ghataliya ta lguta ni, ka wahata, kaʼa mantsa: « A dzratá wa ghuni ya! A dzratá wa ghuni ya! » kaʼa.

¹⁴ Ka mnanatá Yəhuyada ta gwaɗa ŋa maliha ta ghəŋa gwal vulu dərmək dərmək (100), kaʼa nda həŋ mantsa: « Ksidiŋwa ksa mataba mnduha, ka lab la mndu mista ni katsi, ka dzata kuni nda kafay, » kaʼa. Ka pyaftá mnda dra skwi ŋa Lazglafta ta dzata ma həga Yawe.

¹⁵ Ka ksaftá lu ka mbraku, ka klaghata da həga gá mgham nda ta tva lama plisha. Hada, ka dzatá həŋ.

Hlanata Yəhuyada ta vlaŋtá glaku ta Baghal

¹⁶ Ka dzraftá Yəhuyada ta wi, tsatsi, nda inda mnduha, nda mgham, ŋa nzakwa taŋ ka mnduha Yawe.

¹⁷ Ka laghu həŋ demdem da vla həga Baghal, ka dzaɓiŋtá həŋ, ka tasiŋtá həŋ tesneʼ ta gwirha ni, nda fwatuha ni dgum dguma. Ka dzatá həŋ ta kəma tsa gwirha ta Mataŋ, mnda dra skwi ŋa Baghal.

¹⁸ Ka fanamtá Yəhuyada ta nghapta ka həga Yawe ta gwal dra skwi ŋa Lazglafta ka la Levi, gwal si daganap Dawuda ka baku ka baku ma həga Yawe, ŋa vlata taŋ ta skwa pla ghəŋ ŋa dray tsuh tsuh ŋa Yawe, manda ya mnaf zlaha Musa. Ka maga həŋ ma rfu nda fa fa laha manda ya tsigiŋ Dawuda.

¹⁹ Ka pghatá tsi guli ta gwal ŋa ngha wa tgha ta wa tghaha həga Yawe, kada kwala dər wati ma mndu kul tsaɗaku ta lami dər má ta ghəŋa wu tsi.

²⁰ Ka hlaftá tsi ta maliha ta ghəŋa bakwa gwal vulu dərmək dərmək (100), nda mnduha dagaladagala, maliha ta ghəŋa mnduha, nda inda mnduha ta tsa haɗik ya tani. Ka klagatá tsi ta mgham ma həga Yawe, ka ɓhadaghatá həŋ da həga mgham nda ta vərɗa wa tgha, ka nzanaftá həŋ ta mgham ta dughurukwa gá mgham.

²¹ Ka rfu inda mnduha tsa haɗik ya ta rfu, ka nzatá vli leɓtekw ma luwa, tahula dzatá Ghataliya nda kafay ya kay.