2Rus 22 - Hdi

Ahaziya mghama la Yuda

¹ Ka famtá la Ursalima ta Ahaziya, zwaŋa Yəhuram ka zwaŋ gudzekw ya, da mgham ma vla da ni, kabga tsa bakwa sludziha ta lami da ghuɓu nda la Arap ya, psla psla həŋ ta inda la ka mali ka mali. Mantsa ya ka Ahaziya, zwaŋa Yəhuram, lam da gá mghama la Yuda.

² Fwaɗ mbsak his mida ima Ahaziya ta nzatá tsi ka mgham. Turtuk vakwa ni ta gá mgham ma Ursalima. Ghataliya hga ma ni, zigha Ghumri.

³ Ka ksaftá tsatsi guli ta saɗa la ga Ahav, kabga ma ni ta tiŋway da maga ghwaɗaka skwi nda ma vlaŋtá hiɗaku.

⁴ Ka mag tsi ta ghwaɗaka skwi ta wa ira Yawe manda ŋa la ga Ahav. Tahula mtatá da ni, ka nzatá tsa mnduha ya ka gwal vlaŋtá hiɗaku ta klamta da zaɗaku.

⁵ Nda ma snatá tsa hiɗakwa taŋ ya, ka laghu tsi da vulu kawadaga nda Yuram, mghama la Israʼila, zwaŋa Ahav, nda Hazaʼel, mghama la Aram, ma Ramut ma Gilghat. Hada, ka balanatá la Aram ta Yuram.

⁶ Ka vraghatá Yuram da luwa Yizrəghel, da zughula vgha ni balana la Aram ma Ramut ma vəl vulu nda Hazaʼel, mghama la Aram ya. Ka laha Ahaziya, zwaŋa Yəhuram, mghama la Yuda da Yizrəghel da nghanaghatá Yuram zwaŋa Ahav, kabga nda bala katakata.

⁷ Nda ɗvay Lazglafta kəl Ahaziya ka mutsafta zaɗaku ma lagha ni da Yuram. Ɓhadaghata ni, ka sab həŋ nda Yuram da guyaku nda Yehu, zivira Nimsi, mndu ya zbap Yawe nda ma pghanaghatá rɗi ŋa zaɗanatá la ga Ahav.

⁸ Ta magay magay Yehu ta skwi tsanagha lu ta guma ni ta la ga Ahav, ka guyatá tsi nda maliha la Yuda, nda zwana zwana ma ni ma Ahaziya ta maganatá slna ta Ahaziya, ka pslatá tsi ta həŋ.

⁹ Ka zbə Yehu ta Ahaziya, ka ksaftá lu ma Samari ta ɗifa hada. Ka kladaghatá lu da Yehu, ka dzatá lu. Ka paɗamtá lu, kabga ka lu na: « Tsa zigha Yəhusafat ta zba ndana Yawe nda hya hya ŋuɗufa ni yeya, » ka lu. Ta haɗ mndu ta pɗata ga la Ahaziya pɗaku prək ŋa gá mgham wa.

Zluʼata Ghatalya ta gá mghama

¹⁰ Nghay Ghataliya, ma ni ma Ahaziya ta mtatá zwaŋa ni, ka kurata tsa marakw ya ta zaɗanatá inda mndəra la ta gá mgham ma la Yuda.

¹¹ Ama ka klaftá Yəhusavghat, makwa mgham ta Yuʼas, zwaŋa Ahaziya mataba zwana mgham ta kum lu pslatá həŋ ya. Ka fatá tsi kawadaga nda mata gla ni, ma sana dzuguva ghəzləŋ ma həga Lazglafta. Mantsa ya ɗifanata Yəhusavghat ta Yuʼas ta wa ira Ghataliya ŋa kwala ni dzata. Tsa Yəhusavghat ya ná, makwa mgham Yəhuram ya, makuma ni ma Ahaziya, markwa Yəhuyada, mnda dra skwi ŋa Lazglafta.

¹² Ka zatá tsa zwaŋ ya ta vaku mkuʼ ta ɗifa kawadaga nda həŋ ma həga Lazglafta, ta gay gay Ghataliya ta mgham ta tsa haɗik ya.