2Rus 21 - Hdi

Gá mghama Yəhuram ma Yuda

¹ Ka laghu Yəhusafat da dzidzíha ni, ka paɗamtá lu ta vata dzidzíha ni ma luwa Dawuda. Ka lam zwaŋa ni Yəhuram da gá mgham ma vla ni.

² Mamu zwana ma ni ma Yəhuram, zwana Yəhusafat: I Ghazariya, nda Yəhiʼel, nda Zakari, nda Ghazaryahu, nda Mikaʼel, nda Səfatyahu. Inda taŋ ná, zwana Yəhusafat, mghama la Yuda həŋ.

³ Dganaf dga da taŋ ta həŋ ta mbəhuha ta malaghutá mbraku, ka kfura tsedi, nda dasu, nda skwiha ya ɗina ɗina, nda luwaha ma matsaka huzlu, ma Yuda. Ama ka zlanaŋtá tsi ta gá mgham ta Yəhuram, kabga tsatsi zumali.

⁴ Manda zlghafta Yəhuram ta gá mghama da ni, ka dihanatá tsi ta gá mghama ni, ka pslatá tsi ta zwana ma ni nda kafay, nda sanlaha ma maliha la Israʼila guli.

⁵ Hkən mbsak his mida ima Yəhuram ta nzatá tsi ka mgham. Tghas vakwa ni ta gá mgham ma Ursalima.

⁶ Ka ksaftá tsi ta saɗa mghamha la Israʼila manda ŋa la ga Ahav, kabga makwa Ahav klaf tsi. Ka mag tsi ta ghwaɗaka skwi ta wa ira Yawe.

⁷ Ama va a Yawe ta zaɗanatá la ga Dawuda wu, dabga dzratá wi ya dzraf tsi, nda ya dabga vəl tanaf tsi ta imi ta sləməŋ ta Dawuda nda mnay kazlay dzaʼa gɗa gɗa yu ta vlaŋtá pitirla, mantsa ya zivira ni guli kəʼa ya.

⁸ Ta fitika gá mghama Yəhuram, ka ganavatá la Idum ta sidi ta gá mghama la Yuda, ka famtá həŋ ta ŋa taŋ mgham.

⁹ Mantsa tama, ka laghu Yəhuram nda maliha ta maganatá slna, nda inda mwata plisha ni da Idum. Ka wanaftá la Idum tsatsi nda maliha ta ghəŋa muta plisha ni, ama ka ndaptá həŋ ga rviɗik ka hwayaghuta.

¹⁰ Daga ma tsa fitik ya, ka ganavatá la Idum ta sidi ta gá mghama la Yuda, mantsa ya nzakwa ni ha gita. Ma va tsa fitik ya ganavatá la Livna ta sidi ta la Yuda guli, kabga zlanavata Yəhuram ta Yawe, Lazglafta dzidzíha ni.

¹¹ Magaf maga vərɗa Yəhuram ta vla skwa wuyay tskal tskala ta ghwáha la Yuda. Ka hlamtá tsi ta la Ursalima da hliri, ka mbəɗiŋtá la Yuda ta tva Yawe.

¹² Ka vindanaftá anabi Iliya ta ɗelewer ta Yəhuram, kaʼa mantsa: « Wya ka Yawe, Lazglafta dzidza gha Dawuda: “Ksaf a ka saɗa da gha Yəhusafat, nda ŋa Asa mghama la Yuda wu,

¹³ ama ka ksaftá ka ta saɗa mghamha la Israʼila. Hlam hla ka ta la Yuda nda la Ursalima da hliri, manda ya maga la ga Ahav. Psla psla ka ta vərɗa zwana ma gha sa kuni ma huɗa turtuk, ka ŋərma mnduha ta malaghutá kagha ya.

¹⁴ Tsaya tama, wya Yawe dzaʼa ghunadaghatá zləmnda dagala dɗanaghatá mnduha gha, nda zwana gha, nda miʼa gha, nda inda skwiha gha.

¹⁵ Kagha ya, mghama ɗaŋwa hari dzaʼa ksaftá kagha, ŋa sgakwa ni nda sga inda fitik, ha ŋa saghwa hara gha dzibil” kaʼa, » kaʼa.

¹⁶ Ka gagaftá Yawe ta la Filisti nda la Arap ta sləvda nda la Kus, ŋa vulu nda Yəhuram.

¹⁷ Ka dɗanaghatá tsa mnduha ya ta la Yuda nda vulu, ka hlaghatá inda skwa gadghəl ma həga mgham. Ka hlaghatá həŋ guli ta zwana ni, nda miʼa ni. Haɗ sana zwaŋa ni ta pɗata ta ghəŋa Yəhuʼahaz sagəŋ gudzekw ya wa.

¹⁸ Tahula inda tsaya, ka dzuŋtá Yawe ta Yəhuram nda ɗaŋwa hari kul mbavata.

¹⁹ Ka sgaku tsi nda sga inda fitik. Ma kɗavakta mahisa vaku, ka saghwi hara Yəhuram dzibil dabga tsa ɗaŋwa ya, ka mtutá tsi ma duni katakata. Vanaŋ a mnduha ni ta vu wu, manda ya maga tsatsi nda dzidzíha ni ya wa.

²⁰ Hkən mbsak his mida ima ni ta lam tsi da gá mgham. Tghas vakwa ni ta gá mgham ma Ursalima. Ma mtuta ná, haɗ mndu ta hagaŋtá madəra ni wa. Ka lamtá lu ma luwa Dawuda, ama ma vla kula mghamha a wa.