2Rus 2 - Hdi

¹ Ka pghamtá Salumuŋ ta mnduha dəmbuʼ ndəfáŋ mbsak (70.000) ŋa hla skwi, mnduha dəmbuʼ tghas mbsak (80.000) ŋa raratsa palaha ta ghwá, nda mnduha dəmbuʼ hkən nda mkuʼ dərmək (3.600) ŋa nghapta ka gwal maga slna.

² Ka tsəghanaftá Salumuŋ ta lwi ta Hiram, mghama Tir: « Magiha maga ta iʼi, manda ya magana ka ta da ɗa Dawuda, tsəghanaf ka ta udzuha sedra, ŋa baftá həga nzakwa ni ya.

³ Ta kumay yu ta banaftá həga ŋa vlaŋtá sgit ta Yawe, Lazglafta ɗa, ŋa mbəl fanatá mbəhuha, ŋa dranatá urdi zɗa ziʼakwa ni ta kəma ni, ŋa gɗata ta vla gatuha ŋa ni inda fitik, nda ya ŋa vla skwa pla ghəŋ ŋa dray tsuh tsuh ga sərɗək nda ya ga hawu. Mantsa ya ŋa Sabatha, nda ngha tili, nda skala rfuha ŋa Yawe, Lazglafta mu. Nda nza tsaya ka skwi ŋa gɗata la Israʼila ta magay ŋa ɗekɗek.

⁴ Dagala dzaʼa nzakwa tsa həga dzaʼa bafta yu ya, kabga malaghu mala dagalata Lazglafta ŋni ka inda lazglaftaha.

⁵ Ama wa dzaʼa laviŋta banaftá həga, ya wya ŋaf a dər luwa ta luwa ta ghəŋa luwa na? Wa iʼi ŋa laviŋtá banaftá həga na? Ba vla dra urdi ta kəma ni kweŋkweŋ yeya dzaʼa laviŋta iʼi ta banafta.

⁶ Ndanana, ghunaɗif ghuna ta masəm ŋa maga slna nda dasu, nda kfura tsedi, nda ghuva tili, nda kfur, nda sləvdza dva ghuz, nda ya dvaŋdvaŋa, nda ya ka kubwalkubwal, nda sna ta slna taha skwa rka. Dzaʼa magay ta slna kawadaga nda gwal ka masəm ta vata iʼi ma Yuda nda ya ma Ursalima, gwal zabaɗip da ɗa Dawuda ya.

⁷ Tsəghaɗif tsəgha guli daga ma Ləvanuŋ ta udza sedra, nda ŋa bərus, nda ŋa saŋtal. Nda sna yu ɗina ɗina kazlay na mamu kwalvaha gha nda sna ta ɗatsa udzuha Ləvanuŋ kəʼa. Dzaʼa nzakway kwalvaha ɗa kawadaga nda kwalvaha gha,

⁸ ŋa papayaɗifta taŋ ta udzuha nda ndəgha. Tsa həga dzaʼa bafta yu ya ná, həga dagala ya, ɗina guli.

⁹ Dzaʼa vlaŋ vla yu ta kwalvaha gha, gwal dzaʼa psliha ta fuha ta buhwa hupa alkama dəmbuʼ mkuʼ mbsak (60.000), nda buhwa urz guli dəmbuʼ mkuʼ mbsak (60.000), nda litəra ima inabi dəmbuʼ fwaɗ dərmək nda fwaɗ mbsak (440.000), nda litəra rɗa zaytuŋ dəmbuʼ fwaɗ dərmək nda fwaɗ mbsak (440.000), » kaʼa.

¹⁰ Ka zlghanaftá Hiram mghama la Tir ta wi ta Salumuŋ, ka vindafta nda vinda ka tsəghanafta, kaʼa mantsa: « Ɗvu ɗva Yawe ta mnduha ni, kəl tsi ka famtá kagha da mgham ta ghəŋa taŋ, » kaʼa.

¹¹ Ka Hiram sganaghata guli mantsa: « Rfu da Yawe, Lazglafta la Israʼila ta magaftá luwa nda haɗik, ta vlaŋtá mgham Dawuda ta zwaŋ nda ɗifil ma ghəŋa ni, ta maga ɗasuwa, nda mahizl, dzaʼa laviŋta banaftá həga ta Yawe, nda həga gá mghama vərɗa tsatsi!

¹² Wya yu ta gi ghunədaghapta ndanana ta Huramʼabi, masəm ta pərɗaftá slna ni ya.

¹³ Zwaŋa sana marakw mataba kwagha la Daŋ ya, la Tir da ni. Nda sna ta maga slna nda dasu, nda kfura tsedi, nda ghuva tili, nda kfur, nda pala, nda udzu, mantsa ya nda sləvdzi ka dva ghuz, nda ya ka kubwalkubwal ka ya dvaŋdvaŋa a tsi, nda sləvdziha liŋ kulefeɗfeɗa. Nda sna guli ta taha rkaha, nda inda slna ya mnana lu. Dzaʼa magay ta slna kawadaga nda masəmha gha, nda ya nda masəmha rvera ɗa da gha Dawuda.

¹⁴ Ndanana, kdəkkdək rvera ɗa, ka tsəghaŋnafta kagha ta alkama, nda urz, nda rɗi, nda ima inabi ŋa kwalvaha gha manda ya taŋnaf ka ta imi ta sləməŋ.

¹⁵ Aŋni ya, dzaʼa psla psla ŋni ta udzuha ma Ləvanuŋ manda ya dzaʼa kumaŋta ka. Dzaʼa tsəghaghaf tsəgha ŋni ta habata ni ka ghəŋ ka ghəŋ nda ta drəf, ŋa laba ni ta imi ha da Yafu. Kagha dzaʼa hladafta da Ursalima, » kaʼa.

¹⁶ Ka mbəɗaftá Salumuŋ ta inda mayəm ta nzakw ta haɗika la Israʼila, gwal ya si mbəɗaf da ni Dawuda. Ka mutsaftá lu ta həŋ dəmbuʼ dərmək nda hutaf mbsak hkən mida nda mkuʼ dərmək (153.600).

¹⁷ Ka hlaʼatá tsi mataba taŋ ŋa hla skwi ta mnduha dəmbuʼ ndəfáŋ mbsak (70.000), dəmbuʼ tghas mbsak (80.000) ŋa raratsa palaha ta ghwá, dəmbuʼ hkən nda mkuʼ dərmək (3.600) ŋa nghapta ka mna slna ŋa mnduha.